Samuel omutivali 12:1-31
12 Jehova okwa li a tuma Natan kuDavid. Opo nee okwa ya kuye, ndele ta ti: “Opa li ovalumenhu vavali ve li moshilando shimwe, umwe oshipuna, namukwao ohepele.
2 Omulumenhu ou woshipuna okwa li e na eedi neengobe dihapu lela,
3 ashike omulumenhu ou wohepele ka li e na sha; okwa li ashike e na odjona yonghadi imwe inini, oyo a li a landa. Okwa li he i file oshisho nawa, ndele tai kulile puye pamwe novanamati vaye. Oya li hai li oukulya vanini ovo a li ha mono, nohai nu meholo laye nokunangala mekolo laye. Oya kala i li ngaashi okamonakadona kaye.
4 Lwanima, omulumenhu ou woshipuna, okwa li e uya okutalelwa po komweenda, ashike ina kufa nande oimwe yomeedi, ile yomeengobe daye, e i dipaele omweenda, oo e uya oku mu talela po. Ponhele yaasho, okwa ka kufa odjona yomulumenhu wohepele, ndele te i dipaele omulumenhu oo e uya oku mu talela po.”
5 Onghee David okwa li a handukila unene omulumenhu oo, ndele ta ti kuNatan: “Ohandi ane kuJehova Kalunga omunamwenyo kutya, omulumenhu oo okwa wana okufya!
6 Oku na yo okufuta odjona oyo lwoikando ine, omolwoshinima osho a ninga, nomolwaashi ina kenukila mukwao.”
7 Natan okwa tya kuDavid: “Omulumenhu oo oove! Jehova Kalunga kaIsrael okwa ti: ‘Onde ku vaeka u ninge ohamba yaIsrael, nonde ku xupifa momake aSaul.
8 Onde ku pa nehalo liwa eumbo lomwene woye, nonda yandja ovakulukadi vomwene woye momake oye. Onde ku pa yo eumbo laIsrael neumbo laJuda. Ashike ngeenge osho kasha li she ku wanena, onda li natango nda hala oku ku ningila shihapu.
9 Omolwashike wa shekifa ondjovo yaJehova mokuninga osho shii momesho aye? Owa dipaifa Uria, Omuheti, neongamukonda! Nokonima eshi we mu dipaifa kOvaammoni neongamukonda, owa kufa po omukulukadi waye a ninge woye.
10 Paife eongamukonda itali di mo meumbo loye, molwaashi owa shekifa nge, eshi wa kufa po omukulukadi waUria, Omuheti, a ninge omukulukadi woye.’
11 Jehova okwa ti: ‘Ohandi ke ku etela oupyakadi tau di meumbo loye, notashi ka ningwa moipafi yoye. Ohandi ke ku kufa ovakulukadi voye, ndele handi va yandje komulumenhu umwe,* nota ka nangala novakulukadi voye moshanga shomutenya.
12 Nonande owe shi ninga meholeko, ame ohandi ke shi ninga moipafi yOvaisrael aveshe, nomoshanga shomutenya.’”
13 Opo nee David okwa tya kuNatan: “Onda nyona kuJehova.” Natan okwe mu nyamukula a ti: “Jehova ota dimi po* enyono loye. Ito fi.
14 Ndele molwaashi ino fimaneka Jehova moshinima osho, omonamati woye, oo opo a dalwa, oku na okufya shili.”
15 Opo nee Natan okwa ya keumbo laye.
Jehova okwa etela omukifi okaana oko David a dalelwa komukulukadi waUria.
16 David okwa pula ekwafo kuKalunga kashili omolwokaana oko kokamati. Okwa li yo e lidilika nokwa ya monduda yaye, ndele ta nangala pedu oufiku aushe.
17 Ovakulunhu vomeumbo laye ova fikama puye nova kendabala oku mu pendula po pedu, ashike okwa anya okupenduka po noka li a lya pamwe navo.
18 Okaana oka ka fya mefiku etiheyali, ashike ovapiya vaDavid ova li va tila oku mu lombwela kutya okaana oka fya. Ova ti: “Eshi okaana ka li ke na omwenyo otwa li twa popya naye, ashike ka li a pwilikina kufye. Ongahelipi hatu dulu oku mu lombwela kutya okaana oka fya? Otashi dulika a ka ninge oshinima shii.”
19 Eshi David a mona ovapiya vaye tava nongofolelafana, okwa li a didilika kutya okaana oka fya. Onghee okwa pula ovapiya vaye a ti: “Okaana oka fya?” Ova ti: “Heeno oka fya.”
20 Opo nee David okwa penduka po, nokwe likosha, ta vava omaadi, ta djala oikutu imwe nokwa ya keumbo laJehova, ndele te linyongamene. Konima yaasho, okwa shuna keumbo* laye, nokwa pula a pewe oikulya, ndele ta li.
21 Ovapiya vaye ove mu pula va ti: “Omolwashike to ningile ngaho? Eshi okaana ka li ke na omwenyo, owa li to lidilike nowa li to lili, ndele diva ashike eshi okaana ka fya, owa penduka, ndele to hovele okulya.”
22 Okwa nyamukula a ti: “Eshi okaana ka li ke na omwenyo, onda li handi lidilike nokulila, nonde lipopila nda ti: ‘Olyelye e shi shii ngeenge Jehova ota file nge onghenda, ndele ta kaleke okaana nomwenyo?’
23 Paife eshi ka fya, omolwashike ndi na okulidilika? Mbela ohandi dulu oku ka alula? Ame ohandi dulu okuya kuko mombila, ashike ko itaka dulu okwaalukila kwaame.”
24 Opo nee David okwa hekeleka omukulukadi waye, Batseba. Okwa ya kuye, ndele ta nangala naye. Lwanima, Batseba okwa dala okaana okamati, ndele taka lukwa Salomo.* Jehova okwa li e ka hole,
25 nokwa li a tuma ondjovo okupitila momuprofeti Natan, opo ka lukwe Jedidiya,* molwaashi okwa li ke holike kuJehova.
26 Joab okwa twikila okulwifa Rabba shOvaammoni, nokwa kwata ko oshitukulwa shimwe shoshilando, omo mwa li ombala yohamba.*
27 Opo nee Joab okwa tuma ovatumwa kuDavid a ti: “Onda lwifa Rabba, nonda kwata ko oshilando shomeva.*
28 Ongela paife omatangakwaita amwe, ndele to nangele oshilando osho noku shi kwata ko. Ngeenge hasho, ohandi ke shi kwata ko, ndele tashi ningi shange.”*
29 Onghee David okwa ongela omatangakwaita aeshe, nokwa ya kuRabba, ndele te shi lwifa noku shi kwata ko.
30 Opo nee okwa dula ko oshikoloni osho sha li komutwe woshikalunga Malkam. Ondjudo yasho oya li oshitalenti* shoshingoli, pamwe noumanya vondilo, nosha li sha dikwa komutwe waDavid. Moshilando okwa li yo a kufa mo oixuulwa* ihapu neenghono.
31 Okwa kufa mo ovanhu ovo va li moshilando, ndele te va pe oilonga yokuteta omamanya, yokulonga noivela i na eememo, nomakuva nokufoloma eedopi. Osho osho David a ningila oilando aishe yOvaammoni. Xuuninwa, David nomatangakwaita aeshe ova shuna kuJerusalem.
Eshangelo lopedu
^ Ile “komulumenhu mukweni.”
^ Ile “kufa po.”
^ Ile “kombala.”
^ La dja koshitya shOshiheberi tashi ti “Ombili.”
^ Tali ti “E holike kuJah.”
^ Ile “oshilando shouhamba.”
^ Tashi dulika tashi ulike keedjo domeva omoshilando.
^ Eln., “tashi ifanwa nedina lange.”
^ Oshitalenti shimwe oshi fike peekilograma 34,2. Tala Oshiwedelwako B14.
^ Ile “omaliko oo a xupa po konima yolwoodi.”
