Samuel omutivali 13:1-39
13 Omonamati waDavid, Absalom, okwa li e na omumwainakadona muwa, Tamar, nomonamati waDavid, Amnon, okwa li a hokwa unene Tamar.
2 Amnon okwa li a wililwa po neenghono, molwaashi okwa li a halelela omumwaina Tamar, osheshi Tamar okwa li okakadona elela, nosha li tashi monika shidjuu kuAmnon, opo e mu ningile osho a hala.
3 Amnon okwa li e na kaume kopofingo Jonadab, omonamati waSimea, omumwaina waDavid, na Jonadab okwa li e na eendunge unene.
4 Jonadab okwa pula Amnon a ti: “Omona wohamba, omolwashike ongula keshe ho kala wa polimana? Lombwele nge.” Amnon okwe mu nyamukula a ti: “Onda hokwa neenghono Tamar, omumwaina womumwameme Absalom.”
5 Jonadab okwe mu nyamukula a ti: “Nangala kombete, ndele to livelifa. Ngeenge xo okwe uya oku ku tala, mu lombwela to ti, ‘Alikana, lombwela omumwameme Tamar e uye a pe nge oikulya. Ngeenge okwa longekida oikulya, oyo hai pewa ovanaudu,* ohandi ke i lya tai di meke laye.’”
6 Onghee Amnon okwa nangala te livelifa, nohamba oye uya oku mu tala. Amnon okwa lombwela ohamba a ti: “Alikana, tuma omumwameme Tamar e uye a mbakele nge oikuki ivali* moipafi yange, opo ndi i lye tai di meke laye.”
7 Opo nee David okwa tumina Tamar etumwalaka, tali ti: “Alikana, inda keumbo lamumwanyoko Amnon, ndele to mu longekidile oikulya.”*
8 Onghee Tamar okwa ya keumbo lamumwaina Amnon, oko Amnon a li a nangala. Opo nee okwa lunga olumbololo, ndele ta ningi oikuki moipafi yaye.
9 Okwa kufa oshipana, ndele te mu pe oikuki a lye. Ashike Amnon okwa anya okulya, ndele ta ti: “Amushe djeni po pwaame!” Opo nee ova dja po puye.
10 Amnon okwa tya kuTamar: “Eta oikulya* monduda yokunangala, opo ndi i lye tai di meke loye.” Onghee Tamar okwa kufa oikuki* oyo a longekida, ndele te i twala komumwaina Amnon monduda yokunangala.
11 Eshi e mu etela a lye, Amnon okwe mu kwata, ndele ta ti: “Mumwameme, ila u nangale naame.”
12 Tamar okwa tya kuye: “Ahawe, mumwameme! Ino fifa nge ohoni, osheshi oshinima osho inashi ningwa nale muIsrael. Ino ninga oshinima osho shitondifa.
13 Ohandi ke lididimikila ngahelipi oshinima osho shififa ohoni? Oto ka talika ko umwe womovanhu ovo va ninga oinima itondifa muIsrael. Alikana, pula epitikilo kohamba, itai ku anyene nge.”
14 Amnon okwa anya okupwilikina kuye, ndele te mu dulu eenghono nokwe mu fifa ohoni, eshi e mu kwata onghonga.
15 Konima eshi Amnon a nangala naye, okwa hovela okukala e mu tonde unene shi dulife pohole oyo a li e mu hole nayo. Amnon okwa tya kuye: “Fikama, dja po pwaame!”
16 Opo nee Tamar okwa tya kuye: “Ahawe, mumwameme, molwaashi ngeenge owa lekele nge, otashi naipike unene onghalo, shi dulife osho wa ningila nge!” Ashike Amnon okwa anya okupwilikina kuye.
17 Opo nee Amnon okwa ifana omupiya waye umwe omunyasha, ndele ta ti: “Alikana, ila mo omunhu ou, ndele to mu patele pondje.”
18 (Tamar okwa li a djala oshikutu she likalekelwa,* oikutu oyo ya li hai djalwa kovanakadona veehamba, oukadona elela.) Onghee omupiya waAmnon okwa twala Tamar pondje, ndele ta pate po.
19 Tamar okwe lifundila omute momutwe, ndele ta pombaula oshikutu shaye shiwa osho a li a djala, nokwa ya ta kwena e likwete ombadamutwe.
20 Opo nee Absalom okwa tya komumwaina Tamar: “Amnon oye e ku ningila oshinima osho shii? Omumwameme, shimwenena ashike, molwaashi oo omumwanyoko. Ino kala to lipula noshinima osho.” Opo nee Tamar okwa kala e likalela keumbo lamumwaina Absalom.
21 Eshi ohamba David ya uda oinima aishe oyo, oya li ya handuka unene. Ashike David ka li a hala okuudifa nai omonamati waye Amnon, molwaashi okwa li e mu hole neenghono, noye a li oshiveli shaye.
22 Absalom ina popya sha naAmnon, kutya nee oshii, ile oshiwa, osheshi okwa li e mu tonda, molwaashi okwa fifa ohoni omumwainakadona, Tamar.
23 Konima yeedula mbali, ovakululi veedi vaAbsalom ova li puBaal-hasor, popepi naEfraim, na Absalom okwa li a shiva ovanamati vohamba aveshe.
24 Onghee Absalom okwe uya kohamba, ndele ta ti: “Omupiya woye ota kululifa eedi daye. Alikana ohamba, natu ye pamwe naave nosho yo ovapiya voye.”
25 Ashike ohamba oya tya kuAbsalom: “Ahawe mumati wange, ngeenge otwa i atushe, otashi ka kala omutengi kwoove.” Nonande okwa kala te mu pula, ka li a hala okuya, ndele okwe mu nangeka noupuna.
26 Absalom okwa tya: “Ngeenge ove ito i, pitike nge ndi ye nomumwameme Amnon.” Ohamba oye mu nyamukula ya ti: “Omolwashike u na okuya naye?”
27 Ashike Absalom okwa kala te mu pula, opo a lekele Amnon novanamati aveshe vohamba va ye naye.
28 Absalom okwa lombwela ovapiya vaye a ti: “Kaleni tamu konenene Amnon mu tale ngeenge omutima waye otau hafe omolwomaviinyu, nongeenge onde mu lombwele kutya, ‘Mu ponokeleni!’ Omu na oku mu dipaa. Inamu kala mwa tila. Aame handi mu lombwele. Kaleni mwa pama nomu na ouladi.”
29 Ovapiya vaAbsalom ova ningila Amnon ngaashi naanaa Absalom e va lombwela. Opo nee ovanamati vakwao vohamba ova fikama, nakeshe umwe okwa londa kemwili laye, ndele tava faduka po.
30 Ofimbo va li mondjila, David okwa lombwelwa kutya: “Absalom okwa dipaa ovanamati aveshe vohamba nokape na oo a xupa po.”
31 Opo nee ohamba oya fikama noya pombaula oikutu yayo, ndele tai nangala pedu, novapiya vayo aveshe ova li va fikama va pombaula oikutu yavo.
32 Onghee Jonadab, omonamati waSimea, omumwaina waDavid, okwa tya: “Inamu diladilifa omwene wange kutya ova dipaa ovanamati aveshe vohamba, molwaashi Amnon oye ashike a fya. Osho osha ningwa palombwelo laAbsalom, oo a tokola osho shi ningwe okudja efiku olo Amnon a fifa ohoni omumwainakadona Tamar.
33 Omwene wange ohamba, ino pwilikina* konghundana oyo tai ti, ‘Ovanamati aveshe vohamba ova fya,’ molwaashi Amnon oye ashike a fya.”
34 Pefimbo opo, Absalom okwa faduka po. Opo nee omunangeli eshi a tala, okwa mona ovanhu vahapu tave uya tava di kondjila oyo i li konima yaye popepi nomhunda.
35 Onghee Jonadab okwa tya kohamba: “Tala, ovanamati vohamba ova aluka, ngaashi ashike omupiya woye a popya.”
36 Eshi a mana okupopya, ovanamati vohamba ove uya, tava lili mokule; ohamba novapiya vayo aveshe ova lila unene.
37 Absalom okwa faduka po, ndele ta i kuTalmai, omonamati waAmmihud, ohamba yaGesur. David okwa lila omonamati waye oule womafiku mahapu.
38 Konima eshi Absalom a faduka po, ndele ta i kuGesur, okwa kala oko oule weedula nhatu.
39 Ohamba David oya kala ya halelela i ye kuAbsalom, molwaashi oya li ya xupula omolwefyo laAmnon.
Eshangelo lopedu
^ Ile “oikulya oyo ipu.”
^ Eln., “oikuki ivali i li molupe lomutima.”
^ Ile “oikulya oyo ipu.”
^ Ile “oikulya oyo ipu.”
^ Eln., “oikuki i li molupe lomutima.”
^ Ile “oshikutu shoulenga.”
^ Eln., “ino shi tula komutima.”
