Samuel omutivali 16:1-23
16 Eshi David a dja ko koxulo yomhunda, okwa shakenekwa kuSiba, omupiya waMefiboset, e li neendongi mbali da humbata omingome 200, oikuki 100 yomandjebele makukutu, oikuki 100 yoiimati yopokwenye* nosho yo oshitoo sha kula shomaviinyu.
2 Opo nee ohamba oya pula Siba ya ti: “Omolwashike wa etela oinima ei?” Siba okwe i nyamukula a ti: “Eendongi odokulondwa kovaneumbo vohamba, omungome noiimati yopokwenye oyokuliwa kovalumenhu ovanyasha, nomaviinyu ookunuwa kwaavo ve li mombuwa va loloka.”
3 Ohamba oya pula ya ti: “Omonamati* womwene woye oku li peni?” Siba okwa tya kohamba: “Oku li muJerusalem, molwaashi okwa ti, ‘Nena Ovaisrael otava hoolola nge ndi ninge ohamba ngaashi tatekulu.’”
4 Ohamba oya tya kuSiba: “Tala, oinima aishe yaMefiboset oyoye.” Siba okwa nyamukula a ti: “Ohandi tu eengolo koshipala shoye. Omwene wange ohamba, file nge onghenda.”
5 Eshi ohamba David ya fika muBahurim, omulumenhu womepata laSaul wedina Simei, omonamati waGera, okwe uya kuyo, ndele te i ula eendjovo dii.
6 Simei okwa li ta kupula ohamba David nomamanya, novapiya vayo aveshe nosho yo ovanhu aveshe novanaenghono ovo va li kolulyo nokolumosho layo.
7 Simei okwa ula nai ohamba a ti: “Fikama po apa, dja po apa mulumenhu ove u na etimba lohonde! Ove omunhu wongaho!
8 Jehova okwe ku alulila owii, molwaashi owa dipaa Saul nowe mu kufa ouhamba, onghee Jehova okwa yandja ouhamba komonamati woye Absalom. Paife owa hangwa koupyakadi, molwaashi ou na etimba lohonde!”
9 Abisai, omonamati waSerua, okwa tya kohamba: “Omolwashike ombwa ei ya fya tai ula omwene wange ohamba eendjovo dii? Alikana, pitike nge ndi ye ndi ka tete ko omutwe waye.”
10 Ashike ohamba oya pula ya ti: “Ohandi mu longifa shike nye ovana vaSerua? Mu efeni a ule nge eendjovo dii, osheshi pamwe Jehova okwa ti, ‘Ula David eendjovo dii!’ Osheshi olyelye ta ka tya, ‘Omolwashike to ningile ngaho?’”
11 David okwa tya kuAbisai nokovapiya vaye aveshe: “Ngeenge omonamati wange, oo a dja mwaame, okwa hala okudipaa nge,* mbela Omubenjamin ita dulu okudipaa nge? Mu efeni a ule nge eendjovo dii, pamwe Jehova okwe mu lombwela a ninge ngaho!
12 Otashi dulika Jehova a mone okuhepekwa kwange, na Jehova ota ka nangeka nge noupuna ponhele yeendjovo dii odo nda ulwa nena.”
13 Opo nee David novakwaita vaye ova twikila okuya nondjila, ofimbo Simei a li ta ende komunghulo womhunda va taalela kombinga imwe, na Simei okwa li te va ula eendjovo dii, te va kupula nomamanya note va fundile omadu.
14 Lwanima, ohamba naaveshe ovo va li pamwe nayo ova fika oko va li tava i, va loloka, ndele tava fuda po.
15 Opo nee Absalom novalumenhu aveshe Ovaisrael ova fika muJerusalem, na Ahitofel okwa li pamwe navo.
16 Eshi Husai, Omuarki, kaume* kaDavid e uya kuAbsalom, okwa tya kuAbsalom: “Ohamba, kala nomwenyo mule! Ohamba, kala nomwenyo mule!”
17 Onghee Absalom okwa pula Husai a ti: “Mbela ngaho owa ulikila ngoo kaume koye David ohole i na oudiinini? Omolwashike ino ya pamwe nakaume koye?”
18 Opo nee Husai okwa tya kuAbsalom: “Ahowe, onda ama kombinga yaao Jehova a hoolola, ovanhu ava nosho yo ovalumenhu aveshe Ovaisrael. Ohandi kala pamwe naave.
19 Natango onda ti: Nandi longele lyelye? Mbela hamonamati waye? Ngaashi ashike nda longela xo, ohandi ke ku longela.”
20 Absalom okwa tya kuAhitofel: “Pe nge omayele. Natu ninge ngahelipi?”
21 Ahitofel okwa tya kuAbsalom: “Nangala novakulukadi vaxo vopomunghulo, ovo a fiya tava pashukile eumbo.* Opo nee Ovaisrael aveshe otava ka uda kutya owe litondifa kuxo, notashi ka pameka aveshe ovo have ku yambidida.”
22 Onghee ova dika etwali laAbsalom kombada yeumbo, na Absalom okwa nangala novakulukadi vaxe vopomunghulo moipafi yOvaisrael aveshe.
23 Pefimbo opo omayele aAhitofel okwa li a talika ko e li ngaashi* eendjovo daKalunga kashili. David naAbsalom ova li ve lineekela momayele aeshe oo Ahitofel ha yandje.
Eshangelo lopedu
^ Eenghwiyu nosho yo tashi dulika omadaakala.
^ Ile “Omutekulu.”
^ Ile “omwenyo.”
^ Ile “omuyandjimayele.”
^ Ile “ombala.”
^ Ile “e li ngaashi oo ha pula.”
