Samuel omutivali 17:1-29
17 Ahitofel okwa tya kuAbsalom: “Alikana, pitike nge ndi hoolole ovalumenhu 12 000, opo tu ka shikule David oufiku wonena.
2 Ohandi ke mu vakela ofimbo a loloka nokuhe na eenghono,* nohandi ke mu tilifa; ovanhu aveshe ovo e li navo otava ka faduka po nohandi ka dipaa ashike ohamba.
3 Opo nee ovanhu aveshe ohandi ke va alulila kwoove. Ngeenge omulumenhu oo to kongo okwa fi, ovanhu aveshe otava ka alukila kwoove notava ka kala ve na ombili.”
4 Ediladilo olo ola li tali wapalele Absalom novakulunhu aveshe vaIsrael.
5 Absalom okwa tya: “Alikana, ifaneni yo Husai, Omuarki, tu ude kutya ye ote shi tile ngahelipi.”
6 Onghee Husai okwe uya kuAbsalom, ndele Absalom ta ti kuye: “Aa omayele twa pewa kuAhitofel. Mbela natu katuke metwokumwe nomayele aye? Ngeenge hasho, tu lombwela.”
7 Husai okwa tya kuAbsalom: “Omayele oo mwa pewa kuAhitofel itaa wapalele pomhito ei.”
8 Husai okwa weda ko a ti: “Ou shi shii kutya xo novakwaita vaye ovanaenghono nova handuka unene,* ngaashi emwangha la kanifila ounimwena valo mofuka. Natango, xo omukwaita omunaenghono, noita kala mokati kovanhu oufiku.
9 Paife ngaha oku na okukala a hondama mulimwe lomomakololo,* ile monhele imwe i lili; nongeenge okwe tu ponokele tete, ovanhu ovo tave ke shi uda otava ka tya, ‘Ovanhu ovo va ama kombinga yaAbsalom ova findwa!’
10 Nokuli nomulumenhu omuladi ngaashi onghoshi* ota dulu okukwatwa koutile, molwaashi Israel ashishe oshi shii kutya xo omulumenhu omunaenghono, novalumenhu ava ve li pamwe naye ovaladi.
11 Ohandi ku pe omayele aa: Ongela Ovaisrael aveshe pwoove, okudja kuDan fiyo okuBer-seba, nava kale vahapu ngaashi ehekedu lopefuta, ndele to va wilike va ka lwe.
12 Ohatu ke mu ponokela ngaashi omume tai wile pedu keshe apa hatu ke mu hanga, kape na oo ta ka xupa po, kutya nee oye, ile ovalumenhu ovo e li navo.
13 Ngeenge okwa hondama moshilando, natu yeni pamwe nOvaisrael aveshe, ndele hatu shi hanauna po, nokukokololela omakuma asho mefilu, fiyo osheshi inapa fyaala sha.”
14 Opo nee Absalom novalumenhu aveshe Ovaisrael ova ti: “Omayele aHusai, Omuarki, oku dule omayele aAhitofel!” Osheshi Jehova oye e va ningifa* vaha shikule omayele aAhitofel, opo Jehova a dule okweetela Absalom oupyakadi.
15 Lwanima, Husai okwa tya komupristeri Sadok naAbjatar: “Aa omayele oo Ahitofel a pa Absalom novakulunhu vaIsrael, ashike ame onde va pa omayele aa:
16 Lombwela diva David noku mu londwela to ti: ‘Ino kala mombuwa* pomataulukilo omulonga waJordan oufiku wonena, ndele tauluka omulonga nopehe na okwoongaonga, ngeenge hasho, ohamba novanhu aveshe ovo ve li pamwe nayo otava ka hanaunwa po.’”*
17 Jonatan naAhimas ova li hava di muEn-rogel; onghee omupiya okakadona okwa ya noku va lombwela, ndele tava ka lombwela ohamba David, molwaashi kava li va hala okumonika eshi tava i moshilando.
18 Ashike ova monika komulumenhu omunyasha, ndele ta ka lombwela Absalom. Onghee ovalumenhu ovo vavali ova dja po diva, ndele tava i keumbo lomulumenhu umwe muBahurim, oo a li e na ondungu moluumbo laye. Ova ya mondungu,
19 nomukulukadi womulumenhu oo okwa uvika ko nelapi, ndele ta undu ko oilya ya xuwa. Onghee kapa li nande oumwe e shi didilika.
20 Ovapiya vaAbsalom ove uya keumbo oko haku di omukulukadi oo, ndele tave mu pula kutya: “Ahimas naJonatan ove li peni?” Omukulukadi okwa nyamukula a ti: “Ova pita po va yuka komulonga.” Opo nee ovalumenhu ove ke va konga, ndele inave va mona, onghee ova shuna kuJerusalem.
21 Konima eshi ovalumenhu ovo va ya, Jonatan naAhimas ova dja mo mondungu, ndele tava ka lombwela ohamba David. Ove mu lombwela va ti: “Fikama diva, ndele to tauluka omulonga, osheshi Ahitofel okwa yandja elombwelo, opo u ponokelwe.”
22 Diva David novanhu aveshe ovo va li pamwe naye ova fikama, ndele tava tauluka omulonga waJordan. Ongula inene eshi eluwa la tenda, aveshe ova li va mana okutauluka omulonga waJordan.
23 Eshi Ahitofel a mona kutya omayele aye inaa tulwa moilonga, okwa londa kondongi, ndele ta i keumbo laye koshitukulwa shavo. Konima eshi a yandja omalombwelo kovaneumbo laye, okwe limangeleka.* Onghee okwa fya, ndele ta pakwa ponhele opo pa pakwa ooxekulululwa.
24 Lwanima, David okwa ya kuMahanaim, na Absalom okwa tauluka omulonga waJordan pamwe novalumenhu aveshe Ovaisrael.
25 Absalom okwa hoolola Amasa a pashukile etangakwaita ponhele yaJoab; Amasa, omonamati womulumenhu wedina Itra, Omuisrael, oo a li a nangala naAbigail, omonakadona waNahas, omumwainakadona waSerua, ina yaJoab.
26 Israel naAbsalom ova onga onhanda moshitukulwa shaGilead.
27 Diva eshi David a fika muMahanaim, Sobi, omonamati waNahas, a dja kuRabba shOvaammoni, Makir, omonamati waAmmiel, a dja kuLo-debar, naBarsillai, Omugilead, a dja kuRogelim,
28 ove mu etela eembete, oiyaxa, eembiya dedu, oilya yo-wheat noyo-barley, oufila, oilya ya yofwa, omapoke, oukunde, oilya ya fengwa,
29 omaadi eenyiki, ombuta, eedi nosho yo eshini.* Ova etela David novanhu ovo a li navo oinima aishe oyo, opo va lye, osheshi ova ti: “Ovanhu ova fya ondjala, va loloka nova fya enota mombuwa.”
Eshangelo lopedu
^ Ile “ehe na eenghono momake.”
^ Ile “nove na ehandu komwenyo.”
^ Ile “momalambo.”
^ Eln., “oo omutima waye u li ngaashi omutima wonghoshi.”
^ Ile “lombwela.”
^ Ile tashi dulika, “momaluhaela.”
^ Eln., “ponwa po.”
^ Ile “liponda.”
^ Eln., “eshini la kukutikwa.”
