Samuel omutivali 18:1-33
18 David okwa valula ovalumenhu ovo a li navo, nokwa nangeka po omalenga taa pashukile omayovi nomalenga taa pashukile omafele e va wilike.
2 Opo nee David okwe va lekela ve li meengudu dopatatu, ongudu imwe oi li mepashukilo* laJoab, imwe omepashukilo lomumwaina waJoab, Abisai, omonamati waSerua, naikwao oi li mepashukilo laIttai, Omugat. Ohamba oya tya kovalumenhu ovo: “Naame ohandi i pamwe nanye.”
3 Ashike ova ti: “Ove ku na okuya, osheshi ngeenge otwa faduka po, itave ke tu kenukila;* nongeenge etata lomufye ola dipawa, kave na ko nasha nafye, molwaashi ove ou fike povanhu 10 000 vomufye. Onghee oshi li xwepo u kale to tu kwafele okudja moshilando.”
4 Ohamba oya tya kuvo: “Ohandi ningi keshe osho tashi mu wapalele.” Opo nee ohamba oya fikama pomunghulo womuvelo woshilando, novakwaita aveshe ova pita po ve li meengudu domafele nodomayovi.
5 Ohamba oya lombwela Joab, Abisai naIttai tai ti: “Ungaungeni nawa nomulumenhu oo omunyasha, Absalom, omolwange.” Ovalumenhu aveshe ova li ve udite ko eshi ohamba tai lombwele ovakulunhu aveshe vomatangakwaita shi na sha naAbsalom.
6 Ovakwaita ova li va dja mo moshilando va ka shakeneka Israel, nolwoodi ola lwilwa mofuka yaEfraim.
7 Ovaisrael ova li va findwa mofuka kovapiya vaDavid, nopa li pa dipawa ovanhu vahapu neenghono efiku olo, ovalumenhu 20 000.
8 Olwoodi olo ola li le lihanena moshitukulwa ashishe. Ovanhu ovo va fila mofuka ova li vahapu neenghono ve dulife ovo va dipawa neongamukonda efiku olo.
9 Absalom okwe ke lihanga ashike a taalelafana novapiya vaDavid. Absalom okwa li a londa kemwili, nemwili ola ya momuti wa kula, oo wa li u na oitai yeliindakana, ndele omutwe waye tau patekene pokati koitai yomuti oo wa kula, nokwa fyaala momuti a endjelela,* ofimbo emwili, olo a li a londa kulo, la ya.
10 Opo nee okwa monika komunhu umwe, ndele ta lombwele Joab ta ti: “Tala, onda mona Absalom a endjelela momuti wa kula.”
11 Joab okwa nyamukula oo e mu lombwela, a ti: “Ngeenge owe mu mona, omolwashike ino mu dipaela opo, ndele ta wile pedu? Ngeno owe shi ningile, ngeno onde ku pa oisilveri omulongo nosho yo ekwamo.”
12 Ndele omulumenhu oo okwa tya kuJoab: “Nonande ngeno onda li handi pewa oisilveri 1 000, itandi dulu okuyelulila omonamati wohamba eke lange, molwaashi otwa uda eshi ohamba tai mu lombwele nye naAbisai naIttai, tai ti, ‘Kashi na nee mbudi kutya oove lyelye, pashukila omulumenhu omunyasha Absalom.’
13 Ngeno kanda li nda dulika, ndele handi mu dipaa,* ngeno ohamba itai kala inai shi uda, naave ngeno ino dula okwaamena nge.”
14 Opo nee Joab okwa ti: “Itandi mane po vali efimbo lange naave!” Onghee okwa kufa eemboxa* nhatu da kula meke laye, ndele ta tu Absalom pomutima, oo a li a endjelela momuti e na omwenyo.
15 Omupiya umwe, oo a li a humbata oilwifo yaJoab, okwe uya, ndele ta denge Absalom fiyo osheshi a fya.
16 Onghee Joab okwa shika enghuma a kangheke olwoodi, novalumenhu ovo va li tava taataa Israel, ova aluka.
17 Ova kufa Absalom nove ke mu ekela melambo la kula mofuka, ndele tava ongele kuye onduba yomamanya ya kula. Opo nee Ovaisrael aveshe ova shuna komaumbo avo.
18 Eshi Absalom a li e na omwenyo, okwa li a kufa emanya, ndele te lidikile ongudimanya mEfilu lOhamba, nokwa ti: “Kandi na omonamati oo ta kaleke po edina lange li dimbulukiwe.” Onghee okwe lilukila ongudimanya oyo, nohai ifanwa Edimbulukomanya laAbsalom fiyo okunena.
19 Ahimas, omonamati waSadok, okwa ti: “Alikana, nandi tondoke ndi ka lombwele ohamba onghundana oyo, molwaashi Jehova okwa ungaunga nayo pauyuki, eshi e i mangulula kovatondi vayo.”
20 Ashike Joab okwa tya kuye: “Nena ito twala onghundana oyo, oto i twala efiku limwe, ashike nena ito ka popya onghundana oyo, molwaashi omonamati wohamba okwa fya.”
21 Joab okwa tya kOmukushi: “Inda u ka lombwele ohamba osho wa mona.” Onghee Omukushi okwe linyongamena Joab, ndele ta faduka po.
22 Ahimas, omonamati waSadok, okwa tya natango kuJoab: “Kashi na nee mbudi kutya oshike tashi ka ningwa po, alikana pitike nge naame ndi shikule Omukushi.” Ashike Joab okwa ti: “Mumati wange, omolwashike u na okuya, ngeenge ku na onghundana oyo to ka popya?”
23 Okwa ti vali: “Kashi na nee mbudi kutya oshike tashi ka ningwa po, pitike nge ndi ye.” Onghee Joab okwa tya kuye: “Faduka po!” Ahimas naye okwa ya nondjila oyo ya enda koshitukulwa shaJordan* nokwa pitilila Omukushi.
24 David okwa li e li omutumba pokati komivelo mbali doshilando, nomunangeli okwa li a londa pombada yomuvelo oo wa ama kekuma. Eshi a yelula omesho, okwa mona omulumenhu ta tondoka e li oye aeke.
25 Onghee omunangeli okwa ingida nokwa lombwela ohamba. Ohamba oya ti: “Ngeenge oku li oye aeke, okwe uya okupopya sha.” Eshi a ehena popepi elela,
26 omunangeli okwa mona natango omulumenhu umwe ta tondoka. Opo nee omunangeli okwa ingida omupashukili woposhivelo ta ti: “Tala, otaku di vali omulumenhu umwe ta tondoka e li oye aeke!” Ohamba oya ti: “Oo naye okwe uya okupopya sha.”
27 Omunangeli okwa ti: “Omulumenhu oo nda mona tete ta tondoka okwa fa Ahimas, omonamati waSadok.” Ohamba oya tya: “Ye omulumenhu e li nawa, ohe uya okupopya eenghundana diwa.”
28 Ahimas okwa ingida ohamba ta ti: “Ondi na onghundana iwa!” Opo nee okwe linyongamena ohamba, oshipala sha twa pedu. Ndele ta ti: “Jehova Kalunga koye na tangwe, oo a finda ovalumenhu ovo va tukululila oshibofa* omwene wange ohamba!”
29 Onghee ohamba oya ti: “Omulumenhu omunyasha Absalom oku li ngoo nawa?” Ahimas okwa nyamukula a ti: “Onda mona ongudu inene yovanhu, eshi Joab a tuma omupiya wohamba nosho yo ame,* ashike kandi shii kutya oshike sha ningwa po.”
30 Ohamba oya ti: “Ehena oku, ndele to kala ofika apa.” Opo nee okwa ehena ko, nokwa kala ofika opo a lombwelwa.
31 Eshi Omukushi a fika, okwa ti: “Omwene wange ohamba, tambula ko onghundana ei: Nena eli, Jehova okwa holola ouyuki, eshi e ku mangulula momake ovanhu aveshe, ovo va li ve ku tukululila oshibofa.”
32 Ashike ohamba oya tya kOmukushi: “Omulumenhu omunyasha Absalom oku li ngoo nawa?” Omukushi okwa ti: “Ovatondi aveshe vomwene wange ohamba naaveshe ovo va li ve ku tukululila oshibofa, opo ve ku etele oshiponga nava ningilwe ngaashi omulumenhu oo omunyasha!”
33 Osho osha li sha udifa nai ohamba, noya ya ponduda yopombada lwopomuvelo, ndele tai ende tai lili, tai ti: “Omona wange Absalom, omona wange, omona wange Absalom! Ngeno aame nda file ponhele yoye, omona wange Absalom, omona wange!”
Eshangelo lopedu
^ Eln., “meke.”
^ Eln., “omitima davo itadi ke lipula nafye.”
^ Eln., “pokati keulu nedu.”
^ Ile “handi kengelele omwenyo waye.”
^ Ile tashi dulika, “omaonga.” Eln., “eedibo.”
^ Eln., “koshitukulwa.”
^ Eln., “va yelulila omake.”
^ Eln., “omupiya woye.”
