Samuel omutivali 2:1-32
2 Lwanima, David okwa pula Jehova a ti: “Nandi ye kushimwe shomoilando yomuJuda?” Jehova okwe mu nyamukula a ti: “Inda.” Opo nee David okwa pula a ti: “Nandi ye peni?” Okwa nyamukula a ti: “Inda kuHebron.”
2 Onghee David okwa ya novakulukadi vaye vavali, Ahinoam wokuJisreel, naAbigail, omufiyekadi waNabal, Omukarmel.
3 David okwa ya yo novakwaita vaye ovo va li pamwe naye, keshe umwe noukwaneumbo waye, nova ka kala moilando oyo ya dingilila Hebron.
4 Ovalumenhu vomuJuda ove uya, nova vaeka David a ninge ohamba yepata laJuda.
Ova lombwela David va ti: “Ovalumenhu vokuJabes-gilead ovo va paka Saul.”
5 Onghee David okwa tuma ovatumwa kovalumenhu vomuJabes-gilead, ndele te va lombwele ta ti: “Jehova ne mu nangeke noupuna, molwaashi omwa ulikila omwene weni, Saul, ohole i na oudiinini eshi mwe mu paka.
6 Jehova ne mu ulikile ohole i na oudiinini, nonokutya ye omulineekelwa. Ohandi ke mu fila yo onghenda, molwaashi mwa ninga oshinima osho.
7 Kaleni mwa pama, osheshi omwene weni Saul okwa fya, nepata laJuda ola vaeka nge ndi ninge ohamba yalo.”
8 Ashike Abner, omonamati waNer, ondjai yetangakwaita laSaul, okwa kufa Isboset, omonamati waSaul, noku mu twala kuMahanaim,
9 ndele te mu ningi ohamba a pangele Gilead, Ovaasuri, Jisreel, Efraim, Benjamin naIsrael ashishe.
10 Isboset, omonamati waSaul, okwa li e na omido 40, eshi a ninga ohamba yaIsrael, nokwa pangela oule weedula mbali. Ashike epata laJuda ola li tali yambidida David.
11 Efimbo* olo David a kala ohamba muHebron, ta pangele epata laJuda, ola li eedula heyali neemwedi hamano.
12 Mokweendela ko kwefimbo, Abner, omonamati waNer nosho yo ovapiya vaIsboset, omonamati waSaul, ova dja mo muMahanaim va ya kuGibeon.
13 Joab, omonamati waSerua, nosho yo ovapiya vaDavid navo ova ya, ndele tava shakene petale laGibeon. Ongudu imwe oya kala omutumba kombinga imwe yetale, nongudu ikwao okombinga ikwao yetale.
14 Hauxuuninwa, Abner okwa tya kuJoab: “Ovalumenhu ovanyasha nava fikame va ye molwoodi* komesho yetu.” Opo nee Joab okwa ti: “Nava fikame.”
15 Ova fikama, ndele tava hoolola Ovabenjamin 12 vomongudu yaIsboset nosho yo 12 movapiya vaDavid, opo va ye kolwoodi.
16 Keshe umwe okwa kwata mukwao meexwiki nove litwa nomaongamukonda, ndele aveshe tava fi. Onghee onhele oyo i li muGibeon, oya li hai ifanwa Helkat-hasurim.
17 Olwoodi olo la luwa mefiku olo ola li la kwata moiti, ndele Abner novakwaita vaIsrael ova li va findwa kovapiya vaDavid.
18 Ovanamati vatatu vaSerua, Joab, Abisai naAsahel, opo va li, na Asahel okwa li e na onhapo ngaashi omenye.
19 Asahel okwa taataa Abner, noina kandukila kolulyo, ile kolumosho, eshi ta taataa Abner.
20 Abner okwa keuka, ndele ta pula ta ti: “Asahel, oove ngoo?” Okwe mu nyamukula a ti: “Heeno, aame.”
21 Opo nee Abner okwa tya kuye: “Kandukila kolulyo, ile kolumosho nokukwata ko umwe womovalumenhu ovanyasha, ndele to mu kufa oinima yaye.” Ashike Asahel ka li a hala oku mu efa.
22 Abner okwa tya vali kuAsahel: “Ino taataa nge vali. Omolwashike ndi na oku ku dipaa? Ohandi ka dula ngahelipi okushakenifa omesho nomumwaxo Joab?”
23 Ashike ka li a hala oku mu efa. Onghee Abner okwe mu twa medimo noshitako sheonga, nola ka mbadukila kombuda yaye. Okwe lidenga po, ndele ta file opo. Keshe oo he uya ponhele opo pa fila Asahel, oha kanghama po oule wokafimbo.
24 Opo nee Joab naAbisai ova shikula Abner. Eshi etango la li tali ningine, ove uya poshikulundudu shaAmma, popepi naGia, pondjila ya yuka kombuwa yaGibeon.
25 NOvabenjamin oko ve liongela oko, va dingilila Abner, ndele tava fikama koxulo yoshikulundudu shonhumba.
26 Opo nee Abner okwa ingida Joab a ti: “Fiyo onaini tamu kala nokulwifafana nomaongamukonda? Ku shii kutya oilanduliko otai ka kala inyikifa oluhodi? Fiyo onaini to kala ino lombwela ovanhu va efe po okutaataa ovamwaxe?”
27 Joab okwa nyamukula a ti: “Ohandi ane kuKalunga kashili kutya, ngeno ku popile, ngeno ovanhu ova twikila okushikula ovamwaxe fiyo ongula.”
28 Joab okwa shika enghuma, novakwaita vaye ova efa po okutaataa Israel, nolwoodi ola xula.
29 Abner novakwaita vaye ova enda muAraba oufiku aushe, nova tauluka omulonga waJordan, ndele tava taulula mefilu,* nohauxuuninwa ova ya muMahanaim.
30 Eshi Joab a aluka kokushikula Abner, okwa ongaleka ovanhu aveshe. Asahel nosho yo ovapiya vamwe 19 vaDavid ova fya.
31 Ashike ovapiya vaDavid ova finda Ovabenjamin nosho yo ovakwaita vaAbner, novakwaita vavo 360 ova fya.
32 Ova kufa Asahel nove mu paka mombila yaxe, oyo i li muBetlehem. Opo nee Joab novakwaita vaye ova enda oufiku aushe, nova fika muHebron eshi eluwa tali tende.
Eshangelo lopedu
^ Eln., “Omuvalu womafiku.”
^ Ile “mefiyafano.”
^ Ile tashi dulika, “va taulula muBitron ashishe.”
