Samuel omutivali 24:1-25
24 Jehova okwa li a handukila neenghono Ovaisrael, eshi umwe a lombwela David,* a ti: “Inda u ka valule Israel naJuda.”
2 Onghee ohamba oya tya kuJoab, ondjai yetangakwaita, oo a li pamwe naye: “Alikana, inda komapata aeshe aIsrael, okudja kuDan fiyo okuBer-seba nokushanga ovanhu, opo ndi shiive omuvalu wavo.”
3 Ashike Joab okwa tya kohamba: “Jehova Kalunga koye na hapupalife ovanhu lwe 100, nomesho omwene wange ohamba nae shi mone, ndele omolwashike omwene wange ohamba wa hala okuninga oshinima sha tya ngaho?”
4 Ashike ohamba oya anya okupwilikina kuJoab nosho yo kovakulunhu vetangakwaita. Onghee Joab novakulunhu vetangakwaita ova dja po pohamba, ndele tava i va ka shange Ovaisrael.
5 Ova tauluka omulonga waJordan nokwoonga onhanda puAroer, kolukadi* loshilando pokati kefilu, ndele tava i va yuka kOvagad, nova onga onhanda muJaser.
6 Konima yaasho ova ya kuGilead nokoshilando shaTagtim-hodsi, ndele tava twikile okuya kuDan-jaan nokudingilila Sidon.
7 Opo nee ova ya kohotengulu yomuTirus nokoilando aishe yOvahevi noyOvakaanan, nohauxuuninwa ova xulila muNegeb shaJuda, muBer-seba.
8 Ova pita moilando aishe, ndele tava i kuJerusalem pexulilo leemwedi omuwoi nomafiku 20.
9 Joab okwa yandja omuvalu wovanhu ovo a shanga kohamba. Israel okwa li e na ovakwaita 800 000 va homata omaongamukonda, na Juda okwa li e na ovalumenhu 500 000.
10 Ashike eliudo* laDavid ola li tali mu vele ombedi konima eshi a valulifa ovanhu. Opo nee David okwa tya kuJehova: “Onda nyona unene eshi nda ninga oshinima eshi. Jehova, alikana dimina po omupiya woye omolwenyono olo, osheshi onda katuka filufilu shihe li pandunge.”
11 Eshi David a penduka ongula, ondjovo yaJehova oye uya komuprofeti Gad, omuxunganeki waDavid, tai ti:
12 “Inda u ka lombwele David to ti, ‘Jehova okwa ti: “Ohandi ku pe u hoolole poinima itatu. Hoolola po osho ndi na oku ku ningila.”’”
13 Opo nee Gad okwe uya kuDavid, ndele ta ti kuye: “Mbela medu loye namu uye ondjala oule weedula heyali? Ile kala to tewatewa kovatondi voye oule weemwedi nhatu? Ile moshilongo shoye namu uye oudu wolutapo oule womafiku atatu? Diladila nawa paife kutya ondi na oku ka nyamukula ngahelipi ou a tuma nge.”
14 David okwa tya kuGad: “Osho oshidjuu neenghono kwaame. Alikana, natu handukilwe kuJehova, molwaashi oku na onghenda inene, ashike inatu handukilwa nande kovanhu.”
15 Opo nee Jehova okwa tumina Israel oudu wolutapo okudja ongula fiyo opefimbo olo la nunwa, novanhu 70 000 okudja kuDan fiyo okuBer-seba ova fya.
16 Eshi omweengeli a yelula eke laye ta aneke Jerusalem, e shi hanaune po, Jehova okwe lialuluka* omolwehandukilo olo, ndele ta ti komweengeli oo ta hanauna po ovanhu: “Osha wana! Shunifa eke loye pedu.” Omweengeli waJehova okwa li popepi noshipale shaArauna, Omujebusi.
17 Eshi David a mona omweengeli, oo a li ta dipaa ovanhu, okwa tya kuJehova: “Aame nda nyona; aame nda ninga osho sha puka, ndele eedi edi oda ninga shike? Alikana, aame u handukila pamwe neumbo latate.”
18 Gad okwe uya kuDavid mefiku olo, ndele ta ti kuye: “Inda, ndele to tungile Jehova oaltari koshipale shaArauna, Omujebusi.”
19 Onghee David okwa ya palombwelo laGad ngaashi Jehova a popya.
20 Eshi Arauna a tala pedu nokwa mona ohamba nosho yo ovapiya vayo va yuka kuye, diva Arauna okwa ya nokulinyongamena ohamba oshipala shaye sha twa pedu.
21 Arauna okwa pula ta ti: “Omolwashike omwene wange ohamba e uya komupiya waye?” David okwe mu nyamukula a ti: “Onde uya okulanda ko oshipale shoye ndi tungile Jehova oaltari, opo ehandukilo, olo a tumina ovanhu, li lote.”
22 Ashike Arauna okwa tya kuDavid: “Omwene wange ohamba ne shi kufe po, ndele ta yandje osho she mu wapalela.* Tambula eengobe u ke di yambe po di li exwikiloyambo, oshilei* nosho yo eendjoko di ka ninge oikuni.
23 Oinima aishe ei ohandi* i pe ohamba.” Opo nee Arauna okwa tya kohamba: “Jehova Kalunga koye ne ku file onghenda.”
24 Ashike ohamba oya nyamukula Arauna ya ti: “Ahawe, ondi na oku i landa ko kwoove kondado yonhumba. Itandi ka yambela Jehova Kalunga kange omayambo inandi a futila.” Onghee David okwa landa ko oshipale nosho yo eengobe keesekeli* 50 doisilveri.
25 David okwa tungila ko Jehova oaltari noku mu yambela omaxwikiloyambo nosho yo omayambo oukumwe. Opo nee Jehova okwa uda ekemo laDavid ponhele yovanhu, nehandukilo, olo a li a tumina Ovaisrael, ola lota.
Eshangelo lopedu
^ Ile “eshi David a lombwelwa.”
^ Ile “kolulyo.”
^ Eln., “omutima.”
^ Ile “okwa nyika oluhodi.”
^ Eln., “osho shiwa momesho oye.”
^ Ile “oiti yokuxwifa.”
^ Eln., “Arauna.”
^ Osekeli imwe oi fike peegrama 11,4. Tala Oshiwedelwako B14.
