Deuteronomion 15:1-23
15 “Pexulilo lomudo keshe omutiheyali, ou na okumangulula vakweni meendjo.
2 Ovanhu ove na okumangululwa ngaha: Keshe oo a lilwa eendjo ota ka mangulula mukwao meendjo odo e na. Ke na okupula mukwao, ile omumwaxe ofuto kefininiko, molwaashi otaku ka ingidwa emanguluko olo, opo Jehova a fimanekwe.
3 Omunailongo oto dulu oku mu pula ofuto kefininiko, ndele omumwaxo ku na oku mu pula keshe osho e ku indila.
4 Ashike mokati keni inamu kala nande oumwe a hepa, osheshi Jehova ote ke mu nangeka noupuna filufilu medu olo Jehova, Kalunga keni, te mu pe mu kale mo li li efyuululo,
5 ndele ongeenge ashike tamu dulika filufilu kondaka yaJehova, Kalunga keni, nokudiinina filufilu oipango aishe oyo handi mu pe nena.
6 Osheshi Jehova, Kalunga keni, ote mu nangeke noupuna ngaashi e mu udanekela, notamu ka yandja eendjo* koiwana ihapu, ashike nye itamu ka pumbwa oku i ehela, notamu ka pangela oiwana ihapu, ndele yo itai ke mu pangela.
7 “Ngeenge umwe womovamwaxo okwa ningi ohepele moilando yeni yomedu olo Jehova, Kalunga keni, te mu pe, inamu kukutika omutima weni, ile mu anyene* omumwaxo oo a hepa.
8 Omu na oku mu kamutululila eke leni nehalo liwa nomu na oku mu pa eendjo* dakeshe osho a pumbwa, ile osho ehe na.
9 Lungameni muha kale nomadiladilo aa mai momitima deni kutya: ‘Omudo omutiheyali, omudo wokumangulula ovanhu meendjo, owa fika,’ ndele tamu kala inamu pa sha omumwaxo oo a hepa omolwouluva weni. Ngeenge okwa kuu kuJehova omolweni, otashi ka kala enyono kunye.
10 Omu na oku mu pa nehalo liwa, nokamu* na oku mu pa nomunyengutima, nokungaho, Jehova, Kalunga keni, ota ka nangeka noupuna oilonga yeni aishe.
11 Medu leni otamu ka kala alushe eehepele. Nomolwaasho handi mu lombwele kutya: ‘Omu na okukamutululila eke leni ovafininikwa novamwaxo ovo va hepa ve li medu leni, tamu shi ningi nehalo liwa.’
12 “Ngeenge umwe womovamwaxo, omulumenhu, ile omukainhu Omuheberi, owe mu lande po, ndele te ku longele eedula hamano, momudo omutiheyali ou na oku mu mangulula.
13 Ngeenge owe mu mangulula, ino mu lekela eenyala dongaho.
14 Ou na oku mu pa sha nehalo liwa moufita woye, moilikolomwa yoye yomepya,* momaadi oo wa henga nomomaviinyu omoshikolelo shoye. Ngaashi ashike Jehova, Kalunga koye, e ku nangeka noupuna, naave osho u na oku mu pa.
15 Dimbuluka kutya owa li omupika medu laEgipiti, na Jehova, Kalunga koye, okwe ku xupifa. Nomolwaasho handi ku lombwele u ninge ngaha nena.
16 “Ndele ngeenge okwe ku lombwele kutya: ‘Itandi di po pwoove,’ molwaashi oku ku hole novaneumbo loye, shaashi okwa kala a hafa ofimbo e li naave,
17 ou na oku mu twala komuvelo, ndele to mu tyuula nonhisho kokutwi kwaye, nota ningi omupiya woye onghalamwenyo yaye aishe. Ou na okuninga sha faafana nomupiya woye okakadona.
18 Ino shi tala ko shidjuu ngeenge we mu mangulula, ndele ta di po pwoove, molwaashi oilonga yaye oyo e ku longela oule weedula hamano oi dulife luvali pwaayo yomunailonga oo a kutwa, na Jehova, Kalunga koye, okwa kala te ku nangeke noupuna mukeshe shimwe.
19 “Ou na okuyapulila Jehova, Kalunga koye, ongobe yoye yondume keshe, oyo ya dalwa tete, nosho yo odi yondume noshikombo shoshindume keshe, osho sha dalwa tete. Ino longifa nandenande ongobe* yoye, oyo ya dalwa tete, noino kulula odi, ile oshikombo osho sha dalwa tete.
20 Ove novaneumbo loye omu na oku i lila koshipala shaJehova, Kalunga keni, omudo keshe, monhele oyo Jehova ta ka hoolola.
21 Ashike ngeenge oi na oupyakadi wa sha, ya lemana, ya twika, ile i na vali oupyakadi umwe wa kwata moiti, ku na oku i yambela Jehova, Kalunga koye.
22 Ou na oku i lila moilando* yeni; omunhu a koshoka naao ina koshoka, aveshe otava dulu oku i lya, ngaashi tamu li omenye, ile oholongo.
23 Ashike ku na okulya ohonde yayo, ndele ou na oku i tilashi medu ngaashi omeva.
Eshangelo lopedu
^ Ile “notamu ka pewa oinima oyo tai ulike kutya otava ka futa eendjo deni.”
^ Eln., “mu kumatele eke leni.”
^ Ile “notamu ka pewa oinima oyo tai ulike kutya ota ka futa eendjo deni.”
^ Eln., “omitima deni.”
^ Ile “yoposhipale.”
^ Eln., “omhedi.”
^ Eln., “moivelo.”
