Deuteronomion 23:1-25
23 “Omulumenhu oo a lutulwa, eshi omatondo aye a tyanghaulwa, ile oilyo yaye youlumenhu ya tetwa mo, ke na okuya meongalo laJehova.
2 “Omunhu oo a dalwa kondje yohombo ina pitikwa okuuya meongalo laJehova. Oludalo laye alishe, kutya nee epupi etimulongo, inali pitikwa okuya meongalo laJehova.
3 “Omuammoni, ile Omumoab, ina pitikwa okuya meongalo laJehova. Oludalo lavo, kutya nee epupi etimulongo, inali pitikwa okuya meongalo laJehova,
4 molwaashi inave mu kwafela oikulya nomeva, eshi mwa li tamu di muEgipiti, naashi va futa Bileam, omonamati waBeor, womuPetor shaMesopotamia, e mu finge.*
5 Ashike Jehova, Kalunga keni, okwa anya okupwilikina kuBileam. Ponhele yaasho, Jehova, Kalunga keni, okwa lundululila efingo menangeko noupuna leni, molwaashi Jehova, Kalunga keni, oku mu hole.
6 Onghee hano, monghalamwenyo yeni aishe inamu va kwafela va kale nombili, ile va hepuluke.
7 “Inamu tonda Omuedom, molwaashi oku li omumwaxo.
Inamu tonda Omuegipiti, molwaashi omwa li ovanailongo moshilongo shavo.
8 Epupi etitatu loludalo lavo otali dulu okuya meongalo laJehova.
9 “Ngeenge omwa ongo onhanda mu lwife ovatondi veni, omu na okuhenuka keshe osho shii.*
10 Ngeenge omulumenhu okwa kala ina koshoka, molwaashi ta di omaxu oludalo ofimbo a kofa, oku na okuya kondje yonhanda noke na okwaalukila mo.
11 Oku na okulikosha nomeva komatango, nota dulu okushuna monhanda, eshi etango tali ningine.
12 Omu na okuhoolola onhele ye likalekelwa* yokulikwafelela kondje yonhanda, naako oko mu na okuya.
13 Moilongifo yeni omu na okukala mu na okaxupulo. Ngeenge tamu ke likwafela kondje yonhanda, omu na okufa elambo nokaxupulo oko nokufufila onyata yeni.
14 Jehova, Kalunga keni, oku li mokati konhanda yeni, opo e mu xupife nokuyandja ovatondi veni momake eni. Onhanda yeni oi na okukala iyapuki, opo aha mone sha shififa ohoni mokati keni nokuha dje po punye.
15 “Kamu na okuyandja omupika komwene waye, ngeenge okwa faduka po omwene waye, ndele te uya kunye.
16 Ota dulu okukala ha di mokati keni monhele keshe oyo a hoolola okukala mushimwe shomoilando yeni, keshe opo a hala okukala. Kamu na okuungaunga naye nai.
17 “Hakakadona Okaisrael taka ningi ombwada,* nokape na omulumenhu Omuisrael e na okuninga ombwada.
18 Kamu na okutwala ofuto oyo ya futwa omukainhu ombwada, ile ofuto oyo ya futwa* omulumenhu ombwada* meumbo laJehova, Kalunga keni, opo mu wanife po eano, molwaashi aveshe ove li oshinima shitondifa kuJehova, Kalunga keni.
19 “Inamu futifa omumwaxo oishoshela, kutya nee oishoshela yoimaliwa, yoikulya, ile yakeshe osho tashi dulu okuyandjelwa oishoshela.
20 Otamu dulu okufutifa omunailongo oishoshela, ashike kamu na okufutifa omumwaxo oishoshela, opo Jehova, Kalunga keni, a nangeke noupuna oilonga yeni aishe medu omo tamu i mu ka kale.
21 “Ngeenge omwa ningi eano kuJehova, Kalunga keni, inamu ongaonga oku li wanifa po, molwaashi Jehova, Kalunga keni, okwa teelela mu li wanife po filufilu. Ngeenge hasho, otamu nyono.
22 Ngeenge omwa kala inamu ninga eano, itamu kala mu na etimba lenyono.
23 Ou na okudiinina eendjovo odo wa popya, nokuwanifa po osho wa ana nokanya koye shi li eyambo lehalo liwa kuJehova, Kalunga keni.
24 “Ngeenge owa i moshikunino shamukweni shomandjebele, oto dulu okulya omandjebele fiyo osheshi wa* kuta, ndele ku na okutula amwe moshikwatelwa u ye nao.
25 “Ngeenge owa i mepya lamukweni mu na oilya, oto dulu okupweya nomake oye oilya oyo ya pya, ndele ku na okuteta oilya yamukweni noshikashulifo.
Eshangelo lopedu
^ Ile “ningile owii.”
^ Ile “sha nyata.”
^ Sha hala okutya, elambo.
^ Ile “ombwada yomotembeli.” Tashi dulika tashi ulike komunhu oo e lininga ombwada, onga onghedi yokulongela oikalunga yOvakaanan.
^ Ile “ya likolwa.”
^ Eln., “ombwa.”
^ Ile “omwenyo.”
