Ehololo laJohannes 6:1-17
-
Odjona ya kufa ko oipatifo ihamano yotete (1-17)
6 Ndele onda mona Odjona ya kufa ko shimwe shomoipatifo iheyali, nonda uda shimwe shomoinamwenyo ine sha ingida nondaka ya fa engungumo, sha ti: “Ila!”
2 Opo nee onda mona onghambe itoka nomulondi wayo e na outa noikuti. Okwa dikwa oshishani nokwa ya a ka finde ovatondi vaye.
3 Eshi ya kufa ko oshipatifo oshitivali, onda uda oshinamwenyo oshitivali tashi ti: “Ila!”
4 Onda mona vali onghambe itilyana, nomulondi wayo okwa li e na eongamukonda linene nokwa pitikwa a nyone po ombili kombada yedu, opo ovanhu va dipaafane.
5 Eshi Odjona ya kufa ko oshipatifo oshititatu, onda uda ondaka yoshinamwenyo oshititatu tai ti: “Ila!” Opo nee onda mona onghambe ilaula, nomulondi wayo okwa li e na oiyelekifo ivali meke laye.
6 Onda uda ondaka mokati koinamwenyo oyo ine ya ti: “Olitela imwe yoilya yo-wheat oi na odenari,* neelitela nhatu doilya yo-Barley odi na odenari; omaadi eemono nomaviinyu naa kwatwe nawa.”
7 Eshi ya kufa ko oshipatifo oshitine, onda uda ondaka yoshinamwenyo oshitine tai ti: “Ila!”
8 Opo nee onda mona onghambe itwima onghundu, nedina lomulondi wayo Efyo. Ombila* oya li ye mu shikula i li popepi naye, nova li va pitikwa va dipae oshitine shedu* neongamukonda lile, nondjala, nomukifi wa kwata moiti nosho yo noilyani yokombada yedu.
9 Eshi ya kufa ko oshipatifo oshititano, onda mona koshi yoaltari eemwenyo* daavo va dipawa omolweendjovo daKalunga nomolwaashi va li hava udifa.
10 Ova ingida mokule tava ti: “Omwene Omunamapangelo aeshe, omuyapuki nomunashili, fiyo onaini to kala ino tokola nokuhandukila ovadipai vetu ovo ve li kombada yedu?”
11 Ova li va pewa oikutu itoka, ndele tava lombwelwa va teelele okafimbo kanini fiyo osheshi omuvalu wovamwaxe novapiya vakwao ovo va li pokudipawa ngaashi vo we lixwa po.
12 Eshi a kufa ko oshipatifo oshitihamano, opa ningwa ekakamo ledu linene, nonda mona etango la laula ngaashi oshikutu shilaula,* omwedi wa tilyana ngaashi ohonde,
13 neenyofi da wila kombada yedu ngaashi omangongwa omukwiyu a shikwa ko komhepo idjuu.
14 Eulu ola li la tonywa ngaashi omushangwatonywa nola kana po, neemhunda nosho yo eenhunhu adishe oda li da dja peenhele dado.
15 Opo nee eehamba dokombada yedu, ovakwanepangelo, ovawiliki vomatangakwaita, oipuna, ovanaenghono, ovapika novamangululwa aveshe ova hondama momakololo nomomamanya eemhunda.
16 Ova kala tava lombwele eemhunda nomamanya tava ti: “Tu tuvikileni noku tu amena kwaao e li omutumba kolukalwapangelo nokehandu lOdjona.
17 Ndele molwaashi efiku lavo lehandu ole uya, olyelye ta dulu okuxupa?”
Eshangelo lopedu
^ Oshimaliwa shoshisilveri shaRoma shi fike pondjabi yefiku limwe.
^ Ile “Hades,” sha hala okutya koufi. Tala omafatululo oitya.
^ Eln., “omunhu umwe womovanhu vane.”
^ Eemwenyo otadi ulike kohonde yavo oyo ya tikila koaltari.
^ Oshikutu osho osha fa oshako ya longwa molududi loshinamwenyo.
