Exodus 10:1-29
10 Jehova okwa tya kuMoses: “Inda kuFarao, molwaashi onde mu efa, ye novapiya vaye va kukutike omitima davo, opo ndi ulike omadidiliko ange aa moipafi yaye,
2 nopo u dule okuhepaululila ovana voye novatekulu voye nghee nda hepeka Egipiti neenghono, nonokutya omadidiliko elipi nda longa mokati kavo, noto ka shiiva filufilu kutya aame Jehova.”
3 Moses naAron ova ya kuFarao, ndele tava ti kuye: “Jehova, Kalunga kOvaheberi, okwa ti, ‘Fiyo onaini to anye okudulika kwaame? Lekela oshiwana shange, opo shi ka longele nge.
4 Ashike ngeenge owa anye okulekela oshiwana shange, ohandi ka tumina oshipaxu moshilongo shoye mongula.
5 Oshipaxu osho otashi ka uvika edu alishe, noitali ka dula vali okumonika. Otashi ka lya po oinima oyo mwa xupifilwa po keemhawe, notashi ka lya po omiti adishe odo da mena momudingonoko.
6 Otashi ka yada momaumbo oye, momaumbo ovapiya voye aeshe nomomaumbo aeshe omuEgipiti, nouhapu washo inau monika nande onale kooxo nokooxokulululwa, okudja eshi va kala moshilongo eshi fiyo okunena.’” Opo nee ova piluka, ndele tava di po puFarao.
7 Ovapiya vaFarao ova tya kuye: “Fiyo onaini ovalumenhu ovo tava twikile oku tu etela oupyakadi?* Va lekela, opo va ka longele Jehova, Kalunga kavo. Hano ku wete kutya Egipiti osha nyonauka?”
8 Opo nee Moses naAron ova alulilwa kuFarao, ndele ta ti kuvo: “Indeni mu ka longele Jehova, Kalunga keni. Oolyelye tamu i navo?”
9 Moses okwa tya: “Ohatu i novanyasha vetu, ovakulunhu vetu, ovanamati vetu, ovanakadona vetu, eedi detu neengobe detu, molwaashi ohatu ka ningila Jehova oshivilo.”
10 Farao okwa tya kuvo: “Ngeenge onde mu lekele novana veni, Jehova oku li pamwe nanye shili. Osha yela kutya omwa hala oku ka longa oukolokoshi.
11 Itashi ningwa! Shapo otamu i ashike novalumenhu veni mu ka longele Jehova, molwaashi osho osho mwa pula.” Opo nee ova tewa po puFarao.
12 Okudja opo, Jehova okwa tya kuMoses: “Yelula eke loye kombada yedu laEgipiti, opo oshipaxu shi uye muEgipiti ashishe noshi lye po oimeno aishe yomoshilongo, oyo ya xupifwa po keemhawe.”
13 Opo nee Moses okwa yelula odibo yaye kombada yedu laEgipiti, na Jehova okwa pepifa omhepo yokoushilo moshilongo efiku olo alishe noufiku aushe. Ongula eshi kwasha, omhepo yokoushilo oya eta oshipaxu.
14 Oshipaxu osho oshe uya medu alishe laEgipiti, noshe lihanena moshitukulwa ashishe shaEgipiti. Osha li shihapu neenghono. Inamu kala nande onale oshipaxu shihapu shi fike opo, noitashi ka kala mo vali shihapu ngaho.
15 Osha li sha uvika edu alishe lomoshilongo shaEgipiti, nosha li sha laulika oshilongo ashishe. Osha li sha lya po oimeno aishe yomoshilongo noiimati aishe yomiti odo da fiwa po keemhawe. Medu alishe laEgipiti inamu fyaala nande omuti, ile oshimeno shi na omafo.
16 Opo nee Farao okwa ifana diva Moses naAron, ndele ta ti: “Onda nyona kuJehova, Kalunga keni, nokunye.
17 Kwafelei nge mu dimine nge po omolwenyono lange, ndele tamu indile kuJehova, Kalunga keni, a kufe po pwaame ehandukilo eli la kwata moiti.”
18 Opo nee okwa* dja po puFarao, ndele ta ka indila kuJehova.
19 Jehova okwa ningifa omhepo i piluke, noya ninga omhepo idjuu yokouninginino, ndele tai pepe po oshipaxu, noye shi twala mEfuta Litilyana. MuEgipiti ashishe kamwa li mwa fyaala nande oshipaxu shimwe.
20 Ashike Jehova okwa li a efa Farao a kukutike omutima waye, na Farao ka li a lekela Ovaisrael.
21 Jehova okwa tya kuMoses: “Yelula eke loye we li yukifa keulu, opo medu alishe laEgipiti mu holoke omilaulu, omilaulu fokofoko.”
22 Moses okwa yelula diva eke laye e li yukifa keulu, nomedu alishe laEgipiti omwa li omilaulu fokofoko oule womafiku atatu.
23 Kava li ve wetafane, nakeshe umwe okwa kala oule womafiku atatu opo a hangika. Ashike apeshe opo pa li hapa di Ovaisrael opa li ouyelele.
24 Opo nee Farao okwa ifana Moses, ndele ta ti: “Indeni mu ka longele Jehova. Otamu fiye po ashike eedi deni neengobe deni. Nokuli novana veni otamu dulu okuya navo.”
25 Moses okwa tya: “Ove oto tu pe yo* omayambo nomaxwikiloyambo, ndele hatu ke a yambela Jehova, Kalunga ketu.
26 Oimuna yetu nayo ohatu i nayo. Kape na oshimuna* sha pitikwa shi fyaale po, molwaashi ohatu ka longifa imwe yomuyo, eshi hatu longele Jehova, Kalunga ketu. Katu shii kutya oshike hatu ka yamba, eshi hatu ka longela Jehova, fiyo osheshi twa fika oko.”
27 Ashike Jehova okwa li a efa Farao a kukutike omutima waye, na Farao ka li a hala okulekela ovanhu.
28 Farao okwa tya kuye: “Dja po pwaame. Ino hetekela vali nandenande okuuya ko kwaame, osheshi efiku olo to uya ko, oto fi.”
29 Opo nee Moses okwa ti: “Ngaashi ashike wa popya, itandi ka hetekela vali nandenande okuuya ko kwoove.”
Eshangelo lopedu
^ Eln., “okukala omwiyo kufye.”
^ Tashi dulika Moses.
^ Ile “pitike tu kale tu na.”
^ Eln., “ekondo.”
