Exodus 11:1-10
11 Jehova okwa lombwela Moses, a ti: “Ohandi ka tumina Farao naEgipiti ehandukilo limwe vali. Konima yaasho, Farao ote ke mu lekela mo omu. Eshi te ke mu lekela mo, ote ke mu taataa mo filufilu.
2 Paife lombwela ovanhu kutya, ovalumenhu novakainhu aveshe ove na okweehela ovashiinda shavo oshisilveri noshingoli.”
3 Jehova okwa ningifa Ovaegipiti va file oshiwana shaye onghenda. Natango, Moses okwa ka kala a fimanekwa unene medu laEgipiti, mokati kovapiya vaFarao nomokati kovanhu.
4 Opo nee Moses okwa tya: “Jehova okwa ti, ‘Ohandi ka ya muEgipiti mokati koufiku,
5 noiveli aishe yomedu laEgipiti otai ka fya, okudja ngoo koshiveli shaFarao, oo e li kolukalwapangelo laye, fiyo okoshiveli shomupiya okakadona, oo ta longo poshini shokukweya, nosho yo oimuna aishe oyo ya dalwa tete.
6 Medu alishe laEgipiti otamu ka kala elilaano linene olo inali kala mo nande onale, noitali ka kala mo vali.
7 Kape na nande ombwa tai ka weda* Ovaisrael, ovanhu, ile oimuna, opo mu shiive kutya Jehova ota dulu okutongola pokati kOvaegipiti nOvaisrael.’
8 Ovapiya voye aveshe otave ke uya shili kwaame, ndele tave linyongamene nge, tava ti, ‘Inda, ove novanhu voye aveshe nave ku shikule.’ Nokonima yaasho, ohandi ka dja mo.” Opo nee Moses okwa dja po puFarao a fula onya.
9 Onghee Jehova okwa tya kuMoses: “Farao ita ka pwilikina kunye, opo oikumwifilonga yange i hapupale medu laEgipiti.”
10 Moses naAron ova li va longa oikumwifilonga ihapu moipafi yaFarao, na Jehova okwa efa Farao a kukutike omutima waye, noka li a lekela Ovaisrael va dje mo muEgipiti.
Eshangelo lopedu
^ Eln., “upika elaka layo.”
