Exodus 16:1-36
16 Eshi ongudu aishe yOvaisrael ya dja mo muElim, oya ya mombuwa yaSin, pokati kaElim naSinai, momafiku 15 omwedi omutivali, konima eshi ya dja medu laEgipiti.
2 Ongudu aishe yOvaisrael oya li ya hovela okungongotela Moses naAron mombuwa.
3 Ovaisrael ova kala tava ti kuvo: “Ngeno Jehova okwe tu dipaele neke laye medu laEgipiti, eshi twa li omutumba peembiya dombelela, naashi twa li hatu li omungome wa wana. Paife omwe tu eta mombuwa mu dipaife ongudu aishe ei kondjala.”
4 Jehova okwa tya kuMoses: “Ohandi mu lokifile omungome okudja meulu, nakeshe umwe oku na oku ke litoolela omungome waye we mu yeleka efiku nefiku, opo ndi va yeleke ndi tale, ngeenge otava ende pamhango yange, ile hasho.
5 Ndele mefiku etihamano, ngeenge tava longekida omingome odo va toola, odi na okukala di dulife luvali pwaado va kala hava toola efiku keshe.”
6 Moses naAron ova tya kOvaisrael aveshe: “Konguloshi, otamu ka shiiva filufilu kutya Jehova oye e mu kufa mo medu laEgipiti.
7 Mongula ongula, otamu ka mona oshinge shaJehova, osheshi Jehova okwa uda eshi tamu mu ngongotele. Ofye oolyelye eshi tamu tu ngongotele?”
8 Moses okwa weda ko a ti: “Eshi Jehova te ke mu pa ombelela konguloshi nosho yo omungome wa wana ongula, otamu ka mona kutya Jehova okwa uda okungongota kweni, eshi tamu mu ngongotele. Ofye oolyelye mu tu ngongotele? Hafye tamu ngongotele, ndele otamu ngongotele Jehova.”
9 Moses okwa lombwela Aron, a ti: “Lombwela ongudu aishe yOvaisrael to ti, ‘Ileni popepi koshipala shaJehova, osheshi okwa uda okungongota kweni.’”
10 Diva eshi Aron a popya nongudu aishe yOvaisrael, oya piluka noya taalela kombuwa, ndele tala, oshinge shaJehova osha holoka moshilemo.
11 Jehova okwa popya vali naMoses, a ti:
12 “Onda uda okungongota kwOvaisrael. Va lombwela kutya, ‘Eshi taku wiwile,* otamu ka lya ombelela, nongula otamu ka lya omingome fiyo mwa kuta, notamu ka shiiva filufilu kutya aame Jehova, Kalunga keni.’”
13 Onguloshi oyo, opa li pe uya oudila voimote, ndele tave lihanene monhanda, nongula eshi kwasha, onhanda aishe oya li ya wilwa komume.
14 Eshi omume ya wa ko, opa li oumuma vanini va li va uvika edu alishe mombuwa ngaashi olumi.
15 Eshi Ovaisrael va mona ounima ovo, ova hovela okupulafana tava ti, “Oshike osho?” molwaashi kava li ve shi shii kutya oshike. Moses okwa tya kuvo: “Omungome oo mwa pewa kuJehova mu lye.
16 Jehova okwa ti: ‘Keshe umwe na toole shi fike pwaasho she mu yeleka. Omu na okukufa keshe umwe oshiyelekifo shogomer,* she likolelela komuvalu wovanhu ovo ve li momatwali eni.’”
17 Ovaisrael ova hovela okuninga ngaho. Ova ongela ounima ovo, vamwe ova toola vahapu, navamwe ova toola vanini.
18 Eshi ve va yeleka moshiyelekifo shogomer, ou a toola vahapu ka li a xupifa po sha, naau a toola vanini okwa li e na sha wana. Keshe umwe okwa toola shi fike pwaasho she mu yeleka.
19 Opo nee Moses okwa tya kuvo: “Kape na oo e na okuxupifa po sha shomongula.”
20 Ashike kava li va pwilikina kuMoses. Eshi vamwe va xupifa po ounima ovo vefiku lomongula, ova li va ninga omainyo, notava nyika, na Moses okwa li e va handukila.
21 Ongula keshe, ova li hava ka toola keshe umwe shi fike pwaasho she mu yeleka. Ngeenge omutenya wa tu, ounima ovo ova li hava hengumuka po.
22 Mefiku etihamano, ova toola omingome lwomapa avali, omunhu keshe oiyelekifo ivali yogomer. Omalenga aeshe ongudu yOvaisrael okwe uya, ndele taa lombwele Moses.
23 Opo nee okwa tya kuo: “Eshi osho Jehova a popya. Mongula efiku letulumuko,* eshabata liyapuki laJehova. Telekeni osho mwa pumbwa okuteleka nokufulukifa osho mwa pumbwa okufulukifa, naasho sha xupa po shi tuvikileni shi ninge shefiku lomongula.”
24 Onghee ove va tuvikila fiyo omefiku la shikula ko ngaashi Moses e va lombwela, ndele kava li tava nyika nokava li ve na omainyo.
25 Opo nee Moses okwa ti: “Nena lyeni po eshi mwa tuvikila, molwaashi nena eshabata laJehova. Itamu va hange po pondje nena.
26 Otamu va toola omafiku ahamano, ashike mefiku etiheyali, efiku lEshabata, itapa ka kala sha.”
27 Ndele nande ongaho, ovanhu vamwe ova ya ngeno ve ke va toole mefiku etiheyali, ndele inava hanga ko sha.
28 Opo nee Jehova okwa tya kuMoses: “Fiyo onaini tamu anye okudulika koipango yange nokeemhango dange?
29 Kaleni mu shi shii kutya Jehova okwe mu pa Eshabata. Nomolwaasho te mu pe omungome womafiku avali mefiku etihamano. Keshe umwe oku na okukala opo e li. Kape na ou e na okudja po opo a hangwa mefiku etiheyali.”
30 Opo nee ovanhu ova dana Eshabata* mefiku etiheyali.
31 Ovaisrael ova luka omungome oo “omanna.”* Omanna okwa li matoka ngaashi eemuma doshihemba hashi ifanwa korianda, nomulyo womana owa li wa fa woshikuki sha ya omaadi eenyiki.
32 Moses okwa ti: “Eshi osho Jehova a popya, ‘Yadekeni oshiyelekifo shogomer omanna, ndele tamu a tuvikile, opo omapupi okomesho a dule okumona omungome oo nde mu pa mu lye mombuwa, eshi nde mu kufa medu laEgipiti.’”
33 Onghee Moses okwa tya kuAron: “Kufa oshiyuma, ndele to tula mo omanna a yada oshiyelekifo shogomer, noku a yandja koshipala shaJehova a tuvikililwe omapupi okomesho.”
34 Ngaashi Jehova a lombwela Moses, Aron okwe a tula popepi nOipelende yOumbangi, opo a tuvikilwe efimbo lile.
35 Ovaisrael ova lya omanna oule weedula 40, fiyo osheshi ve uya medu omo va hanga ovanhu. Ova kala tava li omanna, fiyo osheshi va fika peengaba daKaanan.
36 Oshiyelekifo shogomer otashi i mo lwomulongo moshiyelekifo shoefa.*
Eshangelo lopedu
^ Eln., “Pokati komaufiku avali.”
^ Eelita 2,2 lwaapo. Tala Oshiwedelwako B14.
^ Ile “lokudana eshabata.”
^ Ile “ova tulumukwa.”
^ Tashi dulika sha dja koutumbulilo wOshiheberi “Oshike osho?”
^ Oefa imwe oi fike peelita 22. Tala Oshiwedelwako B14.
