Exodus 18:1-27
18 Jetro, omupristeri womuMidian, xemweno yaMoses, okwa uda ashishe osho Kalunga a ningila Moses nosho yo Ovaisrael, nanghee Jehova a kufa Ovaisrael muEgipiti.
2 Jetro, xemweno yaMoses, okwa kala naSippora, omukulukadi waMoses, eshi Moses e mu lekela a ye kuye
3 pamwe novanamati vaye vavali. Omonamati umwe okwa lukwa Gersom,* osheshi Moses okwa ti, “Onda ninga omunailongo medu eli lihe fi letu,”
4 namukwao okwa lukwa Elieser,* osheshi okwa ti, “Kalunga katate oye ekwafo lange, ou a xupifa nge keongamukonda laFarao.”
5 Jetro, xemweno yaMoses, pamwe novanamati vaMoses nomukulukadi waMoses ove uya kuMoses mombuwa opo a li a onga onhanda komhunda yaKalunga kashili.
6 Opo nee okwa tumina Moses ondjovo, a ti: “Ame, xomweno Jetro, ohandi uya kwoove pamwe nomukulukadi woye novanamati vaye vavali.”
7 Moses okwa ya a ka shakeneke xemweno, nokwa twa eengolo, ndele te mu xupita. Keshe umwe okwa pula mukwao kombinga yonghalonawa yaye, ndele tava i metwali.
8 Moses okwa lombwela xemweno oinima aishe oyo Jehova a ningila Farao naEgipiti ponhele yOvaisrael nosho yo omaudjuu aeshe oo va pita muo molweendo lavo, nanghee Jehova e va xupifa.
9 Jetro okwa li a hafela oinima aishe iwa oyo Jehova a ningila Ovaisrael, eshi e va xupifa muEgipiti.*
10 Opo nee Jetro okwa ti: “Jehova na tangwe, ou e mu xupifa muEgipiti nokuFarao nosho yo oo a xupifa ovanhu momafininiko omuEgipiti.
11 Paife ondi shi shii kutya Jehova oku dule filufilu ookalunga aveshe, omolwoshinima osho a ningila ovo va ungaunga nai noshiwana shaye.”
12 Jetro, xemweno yaMoses, okwa etela Kalunga exwikiloyambo nomayambo, na Aron nosho yo ovakulunhu aveshe vaIsrael ove uya okulya pamwe naxemweno yaMoses koshipala shaKalunga.
13 Mefiku la shikula ko, Moses okwa kala omutumba ngaashi shito, opo a tokole ovanhu, novanhu ova kala va fikama komesho yaye okudja ongula fiyo okonguloshi.
14 Eshi xemweno yaMoses a mona ashishe osho Moses a li ta ningile ovanhu, okwa ti: “Ovanhu oto va ningi ngahelipi ngaho? Omolwashike u li omutumba apa oove auke, ofimbo ovanhu aveshe ve ku fikamena okudja ongula fiyo okonguloshi?”
15 Moses okwa tya kuxemweno: “Ovanhu ohave uya kwaame, opo va pule ewiliko laKalunga.
16 Ngeenge opa holoka oupyakadi, ohau etwa kwaame nohandi tokola pokati komunhu nomunhu, ndele handi va shiivifile etokolo laKalunga kashili neemhango daye.”
17 Xemweno yaMoses okwa tya kuye: “Osho to ningi kashiwa.
18 Oto ka loloka filufilu, ove novanhu ovo ve li pamwe naave, molwaashi omutengi oo oudjuu kwoove noito dulu oku u humbata oove auke.
19 Pwilikina kwaame. Ohandi ku pe omayele, na Kalunga ote ke ku nangeka noupuna. Ove ou li omukalelipo wovanhu koshipala shaKalunga kashili, nou na okutwala omaupyakadi koshipala shaKalunga kashili.
20 Ou na oku va honga eenghedimhango neemhango noku va shiivifila ondjila oyo ve na okweenda nayo nosho yo oilonga oyo ve na okulonga.
21 Ashike ou na okuhoolola muvo ovalumenhu ovanaendunge ovo hava tila Kalunga, ve shii okulineekelwa nove tonde eliko loukengeleledi, noku va nangeka po ve li omalenga va pashukile ovanhu. Omalenga taa pashukile omayovi, omalenga taa pashukile omafele, omalenga taa pashukile omilongo nhano nomalenga taa pashukile omilongo.
22 Ove na okutokola ovanhu, ngeenge pa holoka oupyakadi,* nove na ashike okweeta kwoove oupyakadi keshe wa kwata moiti, vo nava tokole omaupyakadi aeshe oo manini. Shi ninga shipu kwoove mokuhumbata omutengi pamwe navo.
23 Ngeenge owa ningi ngaashi nda ti, ndele Kalunga naye te shi ku lombwele, oto ka dula okuhumbata omutengi, nakeshe umwe ota ka ya keumbo a mbilipalelwa.”
24 Moses okwa pwilikina diva kuxemweno, nokwa ninga ashishe osho a popya.
25 Moses okwa hoolola ovalumenhu ovanaendunge mOvaisrael aveshe, nokwe va nangeka po va kale tava pashukile ovanhu ve li omalenga. Omalenga taa pashukile omayovi, omalenga taa pashukile omafele, omalenga taa pashukile omilongo nhano nomalenga taa pashukile omilongo.
26 Omalenga oo okwa kala haa tokola ovanhu ngeenge pa holoka oupyakadi. Ngeenge oupyakadi owa kwata moiti, okwa li have u twala kuMoses, ndele ngeenge oupyakadi oo omunini, okwa li haa ningi etokolo.
27 Okudja opo, Moses okwa lekela xemweno, ndele ta i koshilongo shavo.
Eshangelo lopedu
^ Tali ti “Okukala omunailongo.”
^ Tali ti “Kalunga kange oye ekwafo.”
^ Eln., “meke lOvaegipiti.”
^ Eln., “efimbo keshe.”
