Exodus 2:1-25
2 Pefimbo olo, omulumenhu umwe womepata laLevi okwa li a hombola omonakadona waLevi.
2 Omukainhu oo okwa li a ninga oufimba, ndele ta dala okaana okamati. Eshi a mona kutya okaana okawa, okwa kala e ka holeka oule weemwedi nhatu.
3 Eshi a li ita dulu vali oku ka holeka, okwa kufa okambaba* ka tungwa nomwiidi womanenge, ndele te ka fili nomunoko* nosho yo neka nokwa tula mo okaana, ndele te ka tula mokati keembungu komunghulo womulonga waNil.
4 Ashike omumwainakadona wokaana oko okwa li a fikama kokule, a tale osho taka ningilwa.
5 Eshi omonakadona waFarao a li e ke likosha momulonga waNil, ovapiya vaye ovakainhu ova li tava ende komunghulo womulonga oo. Opo nee okwa mona okambaba ke li mokati keembungu, ndele ta tumu divadiva omupiya waye okakadona e ke ka tale.
6 Eshi e ka tuula, okwa hanga mo okaana okamati taka kwena. Okwa li e ka etela onghenda, ndele ta ti: “Aka okamwe komounona vOvaheberi.”
7 Omumwaina wako okwa tya komonakadona waFarao: “Nandi ke ku talele omukainhu omwali, Omuheberi, e uye e ku nyamifile okaana oko?”
8 Omonakadona waFarao okwa tya kuye: “Inda.” Opo nee okakadona oka ya diva, ndele taka ka tala ina yokaana.
9 Omonakadona waFarao okwa tya kuye: “Tambula okaana aka u ke ka nyamifile nge, nohandi ke ku futa.” Omukainhu oo okwa tambula ko okaana, ndele te ke ka nyamifa.
10 Eshi okaana ka kula, okwe ka twala komonakadona waFarao, nomonakadona waFarao okwa kala nako onga okamonamati kaye. Okwe ka luka Moses,* ndele ta ti: “Onde ka luka edina olo, molwaashi onde ka kufa momeva.”
11 Eshi Moses a kula,* efiku limwe okwa li a ya a ka tale nghee Ovaheberi vakwao tava hepekwa noilonga idjuu. Opo nee okwa mona Omuegipiti ta denge Omuheberi umwe womovamwaina vaye.
12 Onghee okwa talaatala keembinga adishe, ndele ina mona ko omunhu, opo nee okwa dipaa Omuegipiti noku mu fudika medu.
13 Mefiku la landula ko, okwa ya kuvo nokwa hanga ovalumenhu vavali Ovaheberi tava lu. Onghee okwa tya kwaao e na epuko: “Omolwashike to dengele mukweni?”
14 Omulumenhu oo okwa tya: “Olyelye e ku hoolola u ninge omupangeli nomutokoli wetu? Ile owa hala okudipaa nge ngaashi wa dipaa Omuegipiti?” Moses okwa li a tila, ndele te lipopile ta ti: “Hamba oshinima osha shiivika shili.”
15 Eshi Farao e shi uda, okwa kala a hala okudipaa Moses. Ashike Moses okwa faduka po Farao, nokwa ya a ka kale kedu laMidian, ndele ta kala omutumba pomufima.
16 Omupristeri womuMidian okwa li e na ovanakadona vaheyali, nova li va ka teka, noku ka tila omeva momatemba va xwiile oimuna yaxe.
17 Ndele ovafita ove uya nove va taataa po ngaashi shito. Opo nee Moses okwa fikama, ndele ta kwafele* ovakainhu ovo nokwa xwiila oimuna yavo.
18 Eshi va ya keumbo kuxe Rehuel,* okwe va pula, a ti: “Osha enda ngahelipi opo mu uye diva keumbo nena?”
19 Ova nyamukula va ti: “Omuegipiti umwe okwe tu amena kovafita, ndele te tu tekele omeva nokuxwiila oimuna yetu.”
20 Okwa pula ovanakadona, a ti: “Omulumenhu oo oku li peni? Omolwashike mwe mu fiila ko? Ke mu taleni, opo e uye a lye pamwe nafye.”
21 Konima yaasho, Moses okwa dimina okukala naxe youkadona ovo. Opo nee Rehuel okwa yandja omonakadona waye Sippora a hombolwe po kuMoses.
22 Lwanima, Sippora okwa ka dala okaana okamati, na Moses okwe ka luka Gersom,* ndele ta ti, “Onda ninga omunailongo medu eli lihe fi letu.”
23 Eshi pa pita efimbo lile,* ohamba yaEgipiti oya ka fya, ashike Ovaisrael ova twikila okukema nokungongota, molwaashi ova li moupika. Ova kala tava pula Kalunga kashili e va kwafele.
24 Mokweendela ko kwefimbo, Kalunga okwa li a uda ekemo lavo nokwa li a dimbuluka ehangano olo a li a ninga naAbraham, Isak naJakob.
25 Onghee Kalunga okwa li a tala Ovaisrael nokwa mona okuhepekwa kwavo.
Eshangelo lopedu
^ Ile “okakefa.”
^ Sha hala okutya, omunoko wa fa oo hau longifwa oteya.
^ Tali ti “Okukufa mo,” sha hala okutya, okuxupifwa momeva.
^ Ile “Eshi Moses ta ende ta nghonopala.”
^ Ile “amene.”
^ Sha hala okutya, Jetro.
^ Tali ti “Okukala omunailongo.”
^ Eln., “omafiku mahapu.”
