Exodus 20:1-26
20 Opo nee Kalunga okwa popya eendjovo adishe edi:
2 “Aame Jehova, Kalunga koye, ou nde ku kufa medu laEgipiti, meumbo loupika.
3 Aame ashike u na okulongela, ndele ku na okulongela ookalunga vamwe.
4 “Ino liningila oshihongwafano, ile efano loshinima keshe shi li pombada meulu, ile shi li kombada yedu, ile momeva koshi yedu.
5 Inamu i twila eengolo noinamu efa mu pukifwe mu i longele, osheshi ame, Jehova, Kalunga keni, aame Kalunga ou a teelela okulongelwa oye aeke, ou ta handukile ovana omolwomanyono ooxe, epupi etitatu nepupi etine laavo ve tonde nge,
6 ashike omapupi omayovi aavo ve hole nge nohava diinine oipango yange ohandi a ulikile ohole i na oudiinini.
7 “Edina laKalunga koye, Jehova, ino li longifa moinima yongaho, osheshi Jehova ita kala ina handukila ou ha longifa edina laye moinima yongaho.
8 “Dimbuluka efiku lEshabata, opo u li kaleke liyapuki.
9 Ou na okulonga oilonga idjuu, noilonga ikwao aishe momafiku ahamano,
10 ashike efiku etiheyali eshabata laJehova, Kalunga keni. Onghee ino longa sha nande, kutya nee oove, omonamati woye, omonakadona woye, omupiya woye omulumenhu, omupiya woye okakadona, oimuna yoye, ile omunailongo, oo e li meenhele doye.*
11 Osheshi moule womafiku ahamano Jehova omo a shita eulu, edu, efuta noinima aishe oyo i li mo, nokwa hovela okutulumukwa mefiku etiheyali. Nomolwaashi Jehova a nangeka noupuna efiku etiheyali nokwe li yapula.
12 “Fimaneka xo nanyoko, opo u kale nomwenyo efimbo lile medu olo Jehova, Kalunga koye, te ku pe.
13 “Ino dipaa.
14 “Ino nyona ohombo.
15 “Ino vaka.
16 “Ino popya oipupulu, ngeenge to yandje oumbangi u na sha namukweni.
17 “Ino haluka eumbo lamukweni. Ino haluka omukulukadi wamukweni, omupiya waye omulumenhu, omupiya waye okakadona, ongobe yaye yomhedi, ondongi yaye, ile oinima yamukweni aishe.”
18 Ovanhu aveshe ova li ve udite omingungumo, ewi lenghuma nova mona oushelu nomwifi tau lundumuka momhunda. Eshi va mona oinima oyo, oye va ningifa va kale tava kakama, ndele tava kala ofika kokule.
19 Onghee ova tya kuMoses: “Oove u popya nafye, nohatu ka pwilikina, ashike ino efa Kalunga oye a popye nafye, molwaashi otwa tila kutya pamwe ohatu ka fya.”
20 Opo nee Moses okwa tya kovanhu: “Inamu kala mwa tila, osheshi Kalunga kashili okwe uya oku mu yeleka, opo mu twikile okukala hamu mu tila nomuha nyone.”
21 Ovanhu ova kala va fikama kokule, ashike Moses okwa ehena koshilemo shilaula oko Kalunga kashili a li.
22 Opo nee Jehova okwa tya kuMoses: “Eshi osho u na okulombwela Ovaisrael to ti, ‘Omwa mona eshi nda popya nanye okudja meulu.
23 Inamu liningila ookalunga voisilveri mu va longele pamwe naame, noinamu liningila ookalunga voingoli.
24 Omu na okutungila nge oaltari yedu, ndele tamu yambele ko omaxwikiloyambo, omayambo oukumwe,* eengobe needi deni. Ohandi ke uya kunye nohandi ke mu nangeka noupuna ponhele keshe opo nda ningifa edina lange li dimbulukiwe.
25 Ngeenge omwa tungile nge oaltari yomamanya, inamu i tunga tamu longifa omamanya a tetwa noilongifo.* Osheshi ngeenge omwa longifa oilongifo yeni oku i tunga, otamu i nyateke.
26 Kamu na okuya koaltari yange tamu londele keetalapa, opo oilyo yeni yopaumwene* iha monike.’
Eshangelo lopedu
^ Eln., “moivelo yoye.”
^ Ile “omayambo eni ombili.”
^ Ile “tamu longifa omamanya a hongwa.”
^ Eln., “epenge leni.”
