Exodus 33:1-23
33 Jehova okwa tya vali kuMoses: “Inda nondjila yoye pamwe novanhu ovo wa kufa medu laEgipiti. Indeni kedu olo nda anena Abraham, Isak naJakob, nda ti: ‘Ohandi ke li yandja koludalo leni.’
2 Ohandi ka tuma omweengeli e mu tetekele komesho, nota ka taataa mo Ovakaanan, Ovaamori, Ovaheti, Ovaperesi, Ovahevi nOvajebusi.
3 Inda kedu olo tali kunguluka omashini nomaadi eenyiki. Ashike ame itandi kala mokati keni, molwaashi nye ovatangalali,* notashi dulika ndi mu hanaune po mondjila.”
4 Eshi ovanhu va uda eendjovo odo dikukutu, ova hovela okulila, nokapa li nande oumwe womuvo a djala oikwaivela.
5 Jehova okwa tya kuMoses: “Lombwela Ovaisrael to ti, ‘Nye ovatangalali.* Ohandi dulu okuya mokati keni mepakumo leisho, ndele handi mu hanauna po. Onghee paife, inamu kala mwa djala oikwaivela yeni fimbo handi tale osho handi mu ningile.’”
6 Ovaisrael inava djala vali* oikwavela yavo, okudja pomhunda yaHoreb okuyuka komesho.
7 Opo nee Moses okwa kufa etwali laye, ndele te ke li dika kondje yonhanda, oule woshinano shinini okudja ponhanda, nokwe li luka etwali lokwoongalela. Keshe oo ta pula ewiliko kuJehova oku na okuya ketwali lokwoongalela, olo li li kondje yonhanda.
8 Diva ngeenge Moses a i ketwali olo, ovanhu ohava fikama poivelo yomatwali avo, nohava kala tava tale Moses, fiyo osheshi a ya metwali olo.
9 Diva ngeenge Moses a i metwali olo, oluudi loshilemo ohali uya, ndele tali fikama poshivelo shetwali ofimbo Kalunga ta popi naMoses.
10 Ngeenge ovanhu aveshe va mono oluudi loshilemo la fikama poshivelo shetwali olo, keshe umwe oha fikama, ndele ta tu eengolo poshivelo shetwali laye.
11 Jehova okwa popya naMoses oshipala noshipala, ngaashi ashike omunhu ta popi nomunhu mukwao. Ngeenge Moses a alukile konhanda, Josua, omonamati waNun, omupiya nomuyakuli waye, iha di mo metwali.
12 Onghee Moses okwa tya kuJehova: “Tala, owa lombwela nge kutya, ‘Kwatela komesho ovanhu ava,’ ashike ino lombwela nge kutya olyelye to tumu a ye pamwe naame. Natango, owa ti, ‘Ondi ku shii kedina,* nowa filwa onghenda koshipala shange.’
13 Alikana, ngeenge onda filwa onghenda koshipala shoye, shiivife nge eendjila doye, opo ndi ku shiive nondi twikile okufilwa onghenda koshipala shoye. Dimbuluka yo kutya, oshiwana eshi ovanhu voye.”
14 Kalunga okwa ti: “Ame* ohandi i pamwe naave, nohandi ke ku pa etulumuko.”
15 Opo nee Moses okwa tya kuye: “Ngeenge ove* ito i pamwe nafye, ino tu lekela tu dje po apa.
16 Ovanhu otava ka shiiva ngahelipi kutya onda filwa onghenda koshipala shoye, ame novanhu voye? Mbela hangeenge wa i pamwe nafye, opo ame novanhu voye tu kale twa yooloka ko kovanhu aveshe ovo ve li kombada yedu?”
17 Jehova okwa tya natango kuMoses: “Ohandi ka ninga yo osho wa pula, molwaashi owa filwa onghenda koshipala shange nondi ku shii kedina.”
18 Opo nee okwa tya: “Alikana, ulikile nge oshinge shoye.”
19 Ashike Kalunga okwa ti: “Ohandi ke ku ningifa u mone ouwa wange aushe, nohandi ka hepaulula koshipala shoye edina laJehova; ohandi ka kenukila oo handi kenukile, nohandi ka fila onghenda oo handi file onghenda.”
20 Okwa weda ko a ti: “Ito dulu okumona oshipala shange, molwaashi kape na omunhu ta dulu okumona nge, ndele ta kala nomwenyo.”
21 Jehova okwa ti vali: “Apa ope na onhele i li popepi naame. Kala ofika kemanya.
22 Ngeenge oshinge tashi piti po, ohandi ke ku tula mekololo lemanya, nohandi ke ku amena neke lange, fiyo osheshi nda pita po.
23 Konima yaasho, ohandi ka kufa po eke lange, noto ka mona ombuda yange. Ashike oshipala shange itashi dulu okumonika.”
Eshangelo lopedu
^ Eln., “omu na eefingo dikukutu.”
^ Eln., “omu na eefingo dikukutu.”
^ Eln., “ova dula ko.”
^ Ile “Onde ku hoolola.”
^ Eln., “Oshipala shange.”
^ Eln., “oshipala shoye.”
