Exodus 36:1-38
36 “Besaleel ota ka longa pamwe naOholiab nosho yo ovalumenhu aveshe ve na ounghulungu,* ovo Jehova a pa ounongo neendunge, opo va dule okushiiva nghee ve na okulonga oilonga aishe iyapuki ngaashi ashike Jehova a popya.”
2 Opo nee Moses okwa ifana Besaleel naOholiab novalumenhu aveshe ovo ve na ounghulungu, ovo Jehova a tula ounongo momitima davo, nakeshe oo e linyengifwa komutima waye e liyambe a longe oilonga.
3 Opo nee ova kufa kuMoses omayambidido aeshe oo Ovaisrael va eta omolwoilonga iyapuki. Ashike ova twikila okweeta kuye omayambidido ehalo liwa, ongula keshe.
4 Onghee konima eshi va tameka oilonga iyapuki, ovalongi aveshe ve na ounghulungu ova li tave uya va landulafana,
5 nova li tava lombwele Moses, tava ti: “Ovanhu otava eta omayambidido mahapu neenghono e dulife pwaao a pumbiwa shi na sha noilonga oyo Jehova a popya i longwe.”
6 Opo nee Moses okwa yandja elombwelo ku ningwe eshiivifo monhanda aishe, tali ti: “Ovalumenhu novakainhu, inamu eta vali oinima omolwomayambidido mayapuki.” Okudja opo, ovanhu inava kala vali tava eta sha.
7 Oinima oya li ya wana okulongifwa oilonga aishe oyo ya li i na okulongwa, noya li nokuli ya pitilila.
8 Onghee ovalongi aveshe ve na ounghulungu ova tunga etwalihangano nomalapi omulongo oku li uvika, a longwa meengodi diwa doliina da hodilwa, meengodi dimbulau, molududi leedi lipeepela nomoshiyata shitilyana; okwe* a hondja e na omafano ovakerubi.
9 Elapi keshe ola li li na oule womukokomoko womaludimbo* 28, nounene womaludimbo 4. Omalapi aeshe okwa li e fike pamwe.
10 Opo nee okwa hondjela kumwe omalapi atano, nomalapi makwao atano okwe a hondjela kumwe.
11 Konima yaasho, okwa hondjela ko oukongo vongodi imbulau komingenge delapi opo a shakenena. Okwa ninga yo sha faafana komungenge welapi likwao olo li li komunghulo waapo a shakenena.
12 Okwa ninga oukongo 50 kelapi limwe, noukongo 50 komungenge welapi likwao opo taa shakene, opo a dule okutaalelafana, eshi taa patelwa kumwe.
13 Xuuninwa, okwa ninga ouhakifo 50 voshingoli nokutula kumwe omalapi nouhakifo ovo, opo etwalihangano li ninge oshitukulwa shimwe.
14 Opo nee okwa ninga omalapi okombada yetwalihangano molududi loikombo. Okwa ninga omalapi 11.
15 Elapi keshe ola li li na oule womukokomoko womaludimbo 30 nounene womaludimbo 4. Omalapi aeshe 11 okwa li e fike pamwe.
16 Okwa li a hondjela kumwe omalapi atano, nokwa hondjela kumwe makwao ahamano.
17 Okwa li a ninga eembululu 50 komungenge welapi olo li li komunghulo wamakwao opo taa shakene, nokwa ninga yo eembululu 50 komungenge welapi likwao olo li li komunghulo opo taa shakene.
18 Okwa li yo a ninga ouhakifo 50 vongopolo vokukwatela kumwe omalapi a ninge oshitukulwa shimwe.
19 Okwa li a ninga ofaila yokuuvika etwalihangano ya longwa moipa yeedi deendume, ya fumikwa moluvala litilyana, nofaila ya longwa moipa yeembwa domomeva, opo di uvike etwalihangano.
20 Opo nee okwa ninga eelama detwalihangano da longwa moiti yomwoonde, da yukilila.
21 Olama keshe oya li i na oule wopombada womaludimbo omulongo nounene woludimbo limwe netata.
22 Olama keshe oya li i na oupilangi vavali* koshi va shaama. Eelama adishe detwalihangano osho a li e di ninga ngaho.
23 Okwa li a ninga eelama kombinga yokolukadi yetwalihangano, eelama 20, da taalela kolukadi.
24 Opo nee okwa ninga oikwatelwamhadi 40 yoshisilveri yokuya koshi yeelama 20, koshi yolama imwe okwa li ku na oikwatelwamhadi ivali yokutula oupilangi vayo vavali, nokoshi yolama keshe ya shikula ko okwa li ku na oikwatelwamhadi ivali yokutula oupilangi vayo vavali.
25 Kombinga ikwao yetwalihangano, kombinga yokolundume, okwa li a ningila ko eelama 20,
26 oikwatelwamhadi 40 yoshisilveri, oikwatelwamhadi ivali okoshi yolama imwe, nokoshi yolama keshe ya shikula ko okwa li oikwatelwamhadi ivali.
27 Koshitukulwa osho shi li konima yetwalihangano kouninginino, okwa li a tula ko eelama hamano.
28 Okwa li a ninga eelama mbali di kale onga eengudi domeehuke mbali dokonima yetwalihangano.
29 Eengudi oda li da ningwa moitukulwa ivali ya faafana, ya tulwa kumwe okudja pedu fiyo opombada, da twa moshikongo shotete. Osho a li a ninga ngaho eengudi mbali domeehuke.
30 Adishe kumwe oda li eelama hetatu pamwe noikwatelwamhadi yado 16 yoshisilveri, koshi yolama keshe oikwatelwamhadi ivali.
31 Okwa li yo a ninga eenghambo moiti yomwoonde, nhano odeelama dokombinga imwe yetwalihangano
32 neenghambo dikwao nhano odeelama, odo di li kombinga ikwao yetwalihangano, neenghambo dikwao nhano odeelama, odo di li kouninginino wetwalihangano, koshitukulwa shokonima.
33 Okwa ninga vali onghambo ya enda pokati keelama, ya dja kohuke imwe fiyo okohuke ikwao.
34 Eelama okwa li e di vaeka noshingoli, nokwe di ningila oikongo yoshingoli, i li oikwatifo yeenghambo, neenghambo okwe di vaeka noshingoli.
35 Okwa li a ninga etukulifolapi la longwa meengodi dimbulau, molududi leedi lipeepela, moshiyata shitilyana nosho yo meengodi diwa doliina da hodilwa. Okwa li e li hondja li na omafano ovakerubi.
36 Okwa li a ninga eengudi nhee moiti yomwoonde, nokwe di vaeka noshingoli, pamwe noulekifo voshingoli, ndele te di tula moikwatelwamhadi ine yoshisilveri.
37 Okwa li yo a ninga oshiidilifoyata* shoposhivelo shetwalihangano sha tungwa meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa, ya hondjelwa kumwe,
38 nosho yo eengudi dalo nhano noulekifo vado. Okwe di vaeka koxulo nosho yo oupatifo vado noshingoli, ashike oikwatelwamhadi yado itano oya li yongopolo.
Eshangelo lopedu
^ Eln., “omulumenhu keshe e na omutima u na eendunge.”
^ Sha hala okutya, Besaleel.
^ Oludimbo limwe oli fike peesendimeta 44,5. Tala Oshiwedelwako B14.
^ Ile “outi va yukilila.”
^ Ile “elapi.”
