Exodus 39:1-43
39 Ova hondja nawa oikutu yokuyakula monhele iyapuki, ya longwa meengodi dimbulau, molududi leedi lipeepela nomoshiyata shitilyana. Ova li va hondjela Aron oikutu iyapuki, ngaashi ashike Jehova a li a lombwela Moses.
2 Okwa ninga okatetahema koshingoli, a longifa eengodi dimbulau, olududi leedi lipeepela, oshiyata shitilyana neengodi diwa doliina da hodilwa.
3 Ova hambula oupapa voshingoli, fiyo va pepuka filufilu, ndele te va tete ngaashi eengodi, opo va longele kumwe neengodi dimbulau, nolududi leedi lipeepela, noshiyata shitilyana noliina iwa, noya li ya hondjelwa kumwe.
4 Ova li ve ka ningila oitukulwa ivali ya hondjelwa kumwe, oyo ya hondjelwa pombada yomapepe ako avali.
5 Omwiya,* oo wa li wa hondjelwa kokatetahema woku ka manga nawa ka kale ponhele, owa li wa longwa moinima ya faafana, moshingoli, meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa, ngaashi ashike Jehova a li a lombwela Moses.
6 Opo nee ova tula oumanya vaoniks moukongo voshingoli, ndele tava shange ko omadina ovanamati vaIsrael, ngaashi ovanhu tava tula ko oshihako.
7 Okwa tula oumanya ovo vavali koitukulwa yokomapepe yokatetahema va kale oudimbulukifomanya kovanamati vaIsrael, ngaashi ashike Jehova a li a lombwela Moses.
8 Opo nee okwa ninga okapapa koponhulo ngaashi omuhondji onghulungu, ka longwa ngaashi okatetahema, moshingoli, meengodi dimbulau, molududi leedi lipeepela, moshiyata shitilyana nomeengodi diwa doliina da hodilwa.
9 Oka li ke na eehuke nhee di fike pamwe ngeenge ka tulwa kumwe. Ova ninga okapapa koponhulo, oko ngeenge ka tulwa kumwe, ka li ke na oule nounene u fike peke la xwaananekwa.*
10 Ova li ve ka tula omikweyo nhee doumanya. Momukweyo wotete ova li va tula mo okamanya korubi, kotopas nokoemerald.
11 Momukweyo omutivali okamanya kotekois, kosafire nokoyasper.
12 Momukweyo omutitatu okamanya koleshema,* koagate nokoametisti.
13 Momukweyo omutine okamanya kokrisolit, kaonikis nokojadi. Ova li va patelwa mouhakifo voshingoli.
14 Oumanya ovo ova li ve lile po omadina ovanamati vaIsrael 12, nomadina okwa li a shangwa ngaashi oshihako, nedina keshe ola li li lile po limwe lomomapata 12.
15 Kokapapa koponhulo ova li va ningila ko oulyenge va pandwa, ngaashi eengodi doshingoli elela.
16 Ova li yo va ninga ouhakifo vavali voshingoli nosho yo oukongo vavali voshingoli, ndele tava patele oukongo ovo vavali keexulo mbali dokapapa koponhulo.
17 Konima yaasho, ova tula eengodi mbali doshingoli moukongo vavali ovo ve li keexulo dokapapa koponhulo.
18 Opo nee ova tula eexulo mbali deengodi mbali mouhakifo vavali, ndele tave di patele moitukulwa yokomapepe komesho yokatetahema.
19 Natango ova ninga oukongo vavali voshingoli, ndele tave va tula keexulo mbali, odo di li meni komungenge wokapapa koponhulo, da taalela okatetahema.
20 Opo nee ova ninga oukongo vavali voshingoli nove va tula komesho yokatetahema, pedu loitukulwa ivali yokomapepe nopombada yaapo omwiya* oo wa hondjwa wa mangela okatetahema.
21 Xuuninwa, ova li va manga okapapa koponhulo nongodi imbulau, ya mangela oukongo vako moukongo vokatetahema, opo okapapa koponhulo ka kale ponhele imwe kokatetahema, pombada yomwiya,* oo wa hondjwa, ngaashi ashike Jehova a li a lombwela Moses.
22 Okwa ninga yo okandjafa kehe na omaoko, akeshe ka ningwa meengodi dimbulau, ngaashi omunduluki woiyata onghulungu, kokudjalela koshi yokatetahema.
23 Okandjafa, oko kehe na omaoko, oka li ka patuluka pokati kako, ngaashi okandjafa komukwaita. Ombululu yofingo oya li ya dingililwa komuhondjo wa kola, opo kaha pomboke noupu.
24 Natango, komingenge dokandjafa, oko kehe na omaoko, ova hondjela ko oinima ya fa oiimati yomuti wogranati ya ningwa neengodi dimbulau, nolududi leedi lipeepela noshiyata shitilyana, ya hondjelwa kumwe.
25 Opo nee ova ninga oungedjo voshingoli elela nove va tula pokati koinima oyo ya fa oiimati yomuti wogranati, ya dingilila omungenge aushe wokandjafa, oko kehe na omaoko, ve li pokati koinima oyo ya fa oiimati yomuti wogranati;
26 ova li va lumbakanifa oungedjo noinima oyo ya fa oiimati yomuti wogranati, okangedjo noshinima osho sha fa oiimati yomuti wogranati, ya dingilila omungenge aushe wokandjafa oko kehe na omaoko, oko ka li haka longifwa mokuyakula, ngaashi ashike Jehova a li a lombwela Moses.
27 Ova ningila Aron novanamati vaye oikutu yokombada moliina iwa ya hondjwa komunduluki woiyata,
28 nelapi lokulimanga komutwe la longwa moshiyata shiwa sholiina, nembale lokomutwe la longwa moshiyata shiwa sholiina, noumbulukweva vaxupi* voliina va longwa meengodi diwa doliina da hodilwa,
29 nelapi lokulimanga komutwe la longwa meengodi diwa doliina da hodilwa, meengodi dimbulau, molududi leedi lipeepela nomoshiyata shitilyana, ya hondjelwa kumwe, ngaashi ashike Jehova a li a lombwela Moses.
30 Xuuninwa, ova ninga okapapa taka vema ke li edidiliko liyapuki, li na sha nokunangekwa po,* moshingoli elela nova shanga ko eshangelo, ngaashi omunhu ta shange ko edidiliko, tali ti: “Ouyapuki owaJehova.”
31 Ova mangela ko kuko ongodi imbulau, opo va dule oku ka mangela kelapi lokulimanga komutwe, ngaashi ashike Jehova a li a lombwela Moses.
32 Onghee oilonga aishe yetwalihangano, sha hala okutya yetwali lokwoongalela, oya li ya pwa, nOvaisrael ova li va ninga ashishe osho Jehova a lombwela Moses. Osho naanaa va ninga.
33 Opo nee ova twala kuMoses etwalihangano, etwali noilongifo yalo aishe: oupatifo valo, eelama dalo, eenghambo dalo, eengudi dalo noikwatelwamhadi yalo,
34 ofaila yalo yoku li uvika ya longwa moipa yeedi deendume ya fumikwa moluvala litilyana, ofaila yalo yoku li uvika, ya longwa moipa yeembwa domomeva, elapi lokwiidila poshivelo;
35 oshikefa shOipelende yOumbangi neepala dasho noshituviko shasho;
36 oshitaafula noilongifo yasho aishe nosho yo omungome wokutalika;
37 oshikwatelwalamba shoshingoli elela neelamba dasho, eelamba di li momukweyo noilongifo yasho aishe nomahooli okutemifa eelamba;
38 oaltari yoshingoli, omaadi okuvaeka, oitwimifo yedimba liwa, oshiidilifoyata* shoposhivelo shetwali;
39 oaltari yongopolo nodalate yayo yokuyofela yongopolo, eepala dayo, noilongifo yayo aishe, noshiyaxa nosho yo oshitenda shasho oko tashi tenhekwa;
40 omalapi oo a endjelela momunghulo woshihale, eengudi dasho noikwatelwamhadi yado, oshiidilifoyata* shoposhivelo shoshihale, eengodi dasho noutenda vasho, noilongifo aishe oyo ya longifwa moilonga yometwalihangano, sha hala okutya, etwali lokwoongalela;
41 oikutu ya hondjwa nawa yokuyakula monhele iyapuki, oikutu iyapuki yomupristeri Aron, noikutu yovanamati vaye, opo va longe ve li ovapristeri.
42 Ovaisrael ova longa oilonga aishe metwokumwe noinima aishe oyo Jehova a li a lombwela Moses.
43 Eshi Moses a konakona oilonga yavo aishe, okwa mona kutya ova longa naanaa ngaashi Jehova a popya, na Moses okwe va nangeka noupuna.
Eshangelo lopedu
^ Ile “Ekwamo lomoshiya la hondjwa.”
^ Sha hala okutya, eesendimeta 22,2 lwaapo. Tala Oshiwedelwako B14.
^ Emanya londilo lihe shiivike nawa, tashi dulika tali ulike kemanya loamber, lohiasint, laopala, ile lotoumaline.
^ Ile “ekwamo lomoshiya.”
^ Ile “yekwamo lomoshiya.”
^ Ile “oumbulukweva vokoshi.”
^ Ile “oshikoroni shiyapuki.”
^ Ile “elapi.”
^ Ile “elapi.”
