Exodus 9:1-35
9 Jehova okwa lombwela Moses, a ti: “Inda kuFarao, ndele to mu lombwele kutya, ‘Jehova, Kalunga kOvaheberi, okwa ti ngaha: “Lekela oshiwana shange, opo shi ka longele nge.
2 Ashike ngeenge oto anye oku shi lekela shi ye, noto shi kondjele,
3 tala, eke laJehova otali ka hanga oimuna yoye oyo i li momudingonoko. Eenghambe, eendongi, eengamelo, eengobe needi otai ka hangwa komukifi wa nyika oshiponga.
4 Jehova ota ka tongola filufilu pokati koimuna yOvaisrael noimuna yOvaegipiti, nokape na shimwe shOvaisrael tashi ka fya.”’”
5 Natango, Jehova okwa tula po eufwafimbo, a ti: “Osho Jehova ote shi ningi mongula moshilongo.”
6 Jehova osho okwe shi ninga mefiku la shikula ko, noimuna aishe yOvaegipiti oya hovela okufya, ndele kape na nande oshimuna shOvaisrael sha fya.
7 Eshi Farao a pula ovapiya vaye, tala, kapa li nande oshimuna shOvaisrael sha fya. Ashike Farao okwa twikila okukukutika omutima waye, noka li a lekela ovanhu.
8 Jehova okwa lombwela Moses naAron, a ti: “Yadekeni omake eni omute wa dja moshiyofelo, na Moses oku na oku u umbila momhepo moipafi yaFarao.
9 Otau ka ninga ondwi medu alishe laEgipiti, notau ka etela ovanhu noinamwenyo oitumba medu alishe laEgipiti.”
10 Onghee ova kufa omute moshiyofelo, ndele tava fikama komesho yaFarao, na Moses okwe u umbila momhepo, nowa etela ovanhu noinamwenyo oitumba.
11 Ovapristeri veemhule kava li tava dulu okukala ofika komesho yaMoses omolwoitumba, osheshi oya li ya kwata ovapristeri veemhule nosho yo Ovaegipiti aveshe.
12 Ashike Jehova okwa li a efa Farao a kukutike omutima waye, na Farao ka li a pwilikina kuvo, ngaashi ashike Jehova a li a lombwela Moses.
13 Opo nee Jehova okwa lombwela Moses, a ti: “Pita ongula inene, ndele to ka teelela Farao u li ofika, noku mu lombwela kutya, ‘Jehova, Kalunga kOvaheberi, okwa ti: “Lekela oshiwana shange, opo shi ka longele nge.
14 Paife ohandi ke ku hepeka nomahandukilo ange aeshe, ove novapiya voye, novanhu voye, opo u shiive kutya kombada yedu alishe kaku na umwe a fa nge.
15 Onda li handi dulu okulongifa eke lange ndi ku denge nosho yo ovanhu voye nomukifi wa nyika oshiponga, nowa li to dulu okudimwa ko* kombada yedu.
16 Ndele onde ku efa u kale po omolwetomheno eli: ndi ku ulikile eenghono dange, opo edina lange li shiivifwe kombada yedu alishe.
17 Ndi shii natango oto linenepeke noino hala okulekela oshiwana shange shi ye?
18 Mongula pefimbo eli, ohandi ka lokifa odula i na eemhawe dinene, odo inadi monika mo nale muEgipiti okudja pehovelo lasho fiyo opaife.
19 Onghee hano, lombwela ovapiya voye va twale oimuna yoye aishe noinima yoye aishe meenhele dokuyaama. Ovanhu noinamwenyo aishe, oyo tai ka hangwa poluhaela inai twalwa meumbo, otai ka fya ngeenge oya dengwa keemhawe.”’”
20 Omupiya waFarao keshe oo a fimaneka etumwalaka laJehova okwa twala diva ovapiya vaye noimuna yaye meumbo,
21 ndele keshe oo ina pwilikina ketumwalaka laJehova okwa fiya ovapiya vaye noimuna yaye poluhaela.
22 Jehova okwa tya kuMoses: “Yelula eke loye we li yukifa keulu, opo ku dje eemhawe di uye medu alishe laEgipiti, kovanhu, koinamwenyo nokoimeno aishe oyo i li medu laEgipiti.”
23 Onghee Moses okwa yelula odibo yaye e i yukifa keulu, na Jehova okwa li a tuma omingungumo neemhawe, nokombada yedu okwa wila omundilo.* Jehova okwa kala nokulokifa odula i na eemhawe medu laEgipiti.
24 Omwa li eemhawe, nomokati keemhawe omwa li omundilo tau shela. Eemhawe odo oda li didjuu neenghono. Inadi holoka mo nande onale muEgipiti nghee mwe uyile ovanhu.
25 Eemhawe oda li da dipaa keshe shimwe sha li poluhaela medu alishe laEgipiti, okudja komumhu fiyo okoshinamwenyo. Oda li yo da hanauna po oimeno aishe noda teyaula po omiti adishe odo da li momudingonoko.
26 MuGosen, omo mwa li Ovaisrael, omo ashike mwaha li eemhawe.
27 Opo nee Farao okwa tuma Moses naAron, ndele te va lombwele ta ti: “Oshikando eshi onda nyona. Jehova omuyuki, ashike ame novanhu vange otwa ninga epuko.
28 Indileni Jehova a xulife po omingungumo neemhawe daye. Opo nee ohandi ke mu lekela nehalo liwa, noitamu ka kala mo vali nandenande.”
29 Onghee Moses okwa tya kuye: “Ngeenge onda di mo moshilando, ohandi ka yelula omake ange kuJehova. Omingungumo otadi ka xula po, neemhawe itadi ka kala po vali, opo u shiive kutya edu olaJehova.
30 Ashike ove novapiya voye, ondi shi shii nale kutya nonande ongaho, itamu ka tila Jehova Kalunga.”
31 Oimeno yomundele noilya yo-barley oya li ya hanaunwa po, molwaashi oilya yo-barley oya hangwa ya dala, noimeno yomundele oya hangwa ya tula ko eenhemo.
32 Ashike oilya yo-wheat nosho yo okalya kaya li ya hanaunwa po, molwaashi oya li inini natango.*
33 Moses okwa li a dja mo moshilando puFarao, ndele ta yelula omake aye kuJehova, nomingungumo neemhawe oda li da xula po, nodula kaya li vali tai loko kombada yedu.
34 Eshi Farao a mona kutya odula, eemhawe nomingungumo oya xula po, okwa nyona vali, ndele ta kukutike omutima waye, ye nosho yo ovapiya vaye.
35 Farao okwa twikila okukukutika omutima waye, noka li a lekela Ovaisrael, ngaashi ashike Jehova a li a popya okupitila muMoses.
Eshangelo lopedu
^ Ile “okukombololwa po.”
^ Tashi dulika tau ulike kokashelu ke na eenghono.
^ Ile “oyo ya li ya mena xuuninwa.”
