Josua 18:1-28
18 Ongudu aishe yOvaisrael oya li ya ongala muSilo, nova dika etwali lokwoongalela oko, ndele tava nangala* edu.
2 Ashike opa li natango omapata aheyali Ovaisrael a xupa po oo a li inaa pewa efyuululo pashihoololifo.
3 Onghee Josua okwa tya kOvaisrael: “Fiyo onaini tamu twikile okwaanya okuya medu olo Jehova, Kalunga kooxokulululwa, e mu pa?
4 Pei nge ovalumenhu vatatu mepata keshe ndi va tume; ove na okuya tava ende medu alishe nokudidilika nghee tali dulu okutukulwa. Opo nee ove na okwaalukila kwaame.
5 Ove na oku li litukulila moitukulwa iheyali. Juda ota kala moshitukulwa shaye kolukadi, neumbo laJosef otali kala moshitukulwa shalo kolundume.
6 Ashike nye li meteni, noku li tukula moitukulwa iheyali, ndele tamu etele nge ondungefaneko yeni, nohandi ke mu umbila oshihoololifo oku moipafi yaJehova, Kalunga ketu.
7 Ndele Ovalevi itava ka pewa oshitukulwa mokati keni, molwaashi oupristeri waJehova oo efyuululo lavo; Gad, Ruben nosho yo etata lepata laManasse ova kufa nale efyuululo kombinga yokoushilo womulonga waJordan, olo Moses, omupiya waJehova, e va pa.”
8 Ovalumenhu ova li ve lilongekida okuya, na Josua okwa lombwela ovo tava ka meta edu, a ti: “Indeni, ndele tamu endaenda nedu alishe, noku li meta, ndele tamu alukile kwaame, nohandi ke mu umbila oshihoololifo muSilo moipafi yaJehova ndi mu tukulile edu.”
9 Opo nee ovalumenhu ova ya, ndele tava endaenda medu, tave li mete noku li tukula moitukulwa iheyali, sha hala okutya, oilando, nove i shanga membo. Konima yaasho, ova shuna kuJosua konhanda muSilo.
10 Josua okwe va umbila oshihoololifo muSilo moipafi yaJehova. Josua okwa tukulila Ovaisrael edu ofimbo a li oko, epata keshe oshitukulwa shalo.
11 Epata laBenjamin pamaludi avo ola kwatwa koshihoololifo, noshitukulwa osho pashihoololifo shalo osha li pokati koludalo laJuda noludalo laJosef.
12 Kombinga yokolundume, ongaba yavo oya tamekela komulonga waJordan, ndele tai i fiyo omefilu laJeriko kolundume, ndele tai di komhunda kombinga yokouninginino, noya twa mombuwa muBet-aven.
13 Ongaba oyo oya twikila okudja opo fiyo okuLus, kolukadi lefilu laLus, sha hala okutya, Betel, nongaba oya ya fiyo okuAtarot-addar komhunda oyo i li kolukadi laBet-horon shomefilu.
14 Kombinga yokouninginino okwa tendwa ongaba ya enda kombinga yokolukadi, okudja komhunda oyo i li popepi naBet-horon kolukadi, noya xulila kuKiriat-baal, sha hala okutya, Kiriat-jearim, oshilando shaJuda. Kombinga yokouninginino osho kwa li ngaho.
15 Ombinga yokolukadi oya dja komunghulo waKiriat-jearim, nongaba oya tamunuka mo kombinga yokouninginino, ndele tai i fiyo okofifiya yaNeftoa.
16 Ongaba oyo oya ya fiyo okomunghulo womhunda oyo i li popepi nEfilu laHinnom,* olo li li mEfilu laRefaim kolundume, noya ya fiyo okEfilu laHinnom, kefilu lOvajebusi, kolukadi, fiyo okuEn-rogel.
17 Oya li ya tendwa kombinga yokolundume, ndele tai tamunuka mo fiyo okuEn-semes noya ya fiyo okuGelilot, osho shi li popepi noshikulundudu shaAdummim, noya ya fiyo okemanya laBohan, omonamati waRuben.
18 Oya twikila ya yuka kolufilu lokolundume popepi naAraba, ndele tai i fiyo okuAraba.
19 Ongaba oyo oya twikila fiyo okolundume lefilu laBet-hogla, noya xulila kolundume lomunghulofuta wEfuta lOmongwa,* kombinga yokolukadi kexulilo lomulonga waJordan. Ongaba yokolukadi osho ya li ngaho.
20 Omulonga waJordan oo wa li ongaba kombinga yokoushilo. Olo olo la li efyuululo loludalo laBenjamin pamaludi avo, she likolelela keengaba dalo keembinga adishe.
21 Oilando yepata laBenjamin pamaludi avo oya li: Jeriko, Bet-hogla, Emek-kesis,
22 Bet-araba, Semaraim, Betel,
23 Avim, Para, Ofra,
24 Kefar-aammoni, Ofni nosho yo Geba, oilando 12 nomikunda dayo.
25 Gibeon, Rama, Beerot,
26 Mispe, Kefira, Mosa,
27 Rekem, Irpeel, Tarala,
28 Sela, Ha-elef, Jebusi, sha hala okutya, Jerusalem, Gibea nosho yo Kiriat, oilando 14 nomikunda dayo.
Olo olo la li efyuululo loludalo laBenjamin pamaludi avo.
Eshangelo lopedu
^ Ile “kwata ko.”
^ Eln., “efilu lovanamati vaHinnom.”
^ Sha hala okutya, Efuta la Fya.
