Josua 24:1-33
-
Josua ta endulula ondjokonona yaIsrael (1-13)
-
Tava kunghililwa va longele Jehova (14-24)
-
“Ndele ame novaneumbo lange, ohatu ka longela Jehova” (15)
-
-
Ehangano olo Josua a ninga nOvaisrael (25-28)
-
Efyo laJosua nosho yo epako laye (29-31)
-
Omakipa aJosef a pakwa muSekem (32)
-
Efyo laEliaser nosho yo epako laye (33)
24 Josua okwa ongaleka omapata aeshe aIsrael muSekem, ndele ta ifana ovakulunhu vaIsrael, ovawiliki vavo, ovatokoli vavo novaleli vavo, ndele tava fikama moipafi yaKalunga kashili.
2 Josua okwa lombwela ovanhu aveshe, a ti: “Eshi osho Jehova, Kalunga kaIsrael, a popya: ‘Ooxokulululwa ovo va li ko nalenale ova li hava di kombinga ikwao yomulonga,* na Tera, xe yaAbraham, naxe yaNahor, ova kala hava longele ookalunga vamwe.
3 “‘Opo nee onda kufa xokulululwa Abraham kombinga ikwao yomulonga,* ndele handi mu endifa medu alishe laKaanan nokuhapupalifa oludalo laye. Onde mu pa Isak;
4 na Isak onde mu pa Jakob naEsau. Lwanima, Esau onde ke mu pa omhunda yaSeir i li emona laye, na Jakob noludalo laye ova ya kuEgipiti.
5 Opo nee onda ka tuma Moses naAron, nonda tumina Egipiti omahandukilo, ndele handi mu kufa mo.
6 Eshi nda li handi pitifa mo ooxo muEgipiti, Ovaegipiti ova li tava shikula ooxo nomatemba oita novalondinghambe fiyo okEfuta Litilyana. Eshi mwe uya pefuta,
7 ooxo ova hovela okupula ekwafo kuJehova, onghee onda tula omulaulu pokati keni nOvaegipiti nokweeta efuta kombada yavo, ndele tali va tuvikile, nomwa mona nomesho eni osho nda ninga muEgipiti. Omwa kala hamu di mombuwa eedula* dihapu.
8 “‘Onghee onde mu twala medu lOvaamori, ovo va li hava di kombinga ikwao* yomulonga waJordan, ndele tave mu lwifa. Ashike onde va yandja momake eni, opo mu dule okunangala edu lavo, nonde va hanauna po moipafi yeni.
9 Opo nee Balak, omonamati waSippor, ohamba yaMoab, okwa fikama, ndele ta lwifa Ovaisrael nokwa li a tuma Bileam, omonamati waBeor, e mu finge.
10 Ashike inandi pwilikina kuBileam. Onghee okwe mu nangeka noupuna lwoikando, nonde mu xupifa mo momake aye.
11 “‘Opo nee omwa tauluka omulonga waJordan, ndele tamu uya muJeriko. Ovawiliki* vaJeriko, Ovaamori, Ovaperesi, Ovakaanan, Ovaheti, Ovagirgas, Ovahevi nOvajebusi ove mu lwifa, ashike onde va yandja momake eni.
12 Onda li nde va ningifa va kwatwe koumbada,* noumbada oo owe va ningifa ve mu faduke po moipafi yeni, ngaashi eehamba mbali dOvaamori da ninga. Inamu va finda omolweongamukonda leni, ile outa weni.
13 Onghee onde mu pa edu olo inamu longa, noilando oyo inamu tunga, ndele tamu kala hamu di omo. Ohamu li moikunino yomandjebele nokomiti deemono odo inamu twika.’
14 “Onghee tileni Jehova noku mu longela filufilu noudiinini* nomoshili nokukufa mo ookalunga ovo ooxokulululwa va longela kombinga ikwao yomulonga* nomuEgipiti, ndele tamu longele Jehova.
15 Ngeenge oshii kunye okulongela Jehova, hoololeni nena oo tamu ka longela, ngeenge ookalunga ovo ooxokulululwa va longela kombinga ikwao yomulonga,* ile ookalunga vOvaamori vomedu olo mu li, ndele ame novaneumbo lange, ohatu ka longela Jehova.”
16 Opo nee ovanhu ova nyamukula va ti: “Kashi li pandunge okweefa po Jehova nokulongela ookalunga vamwe.
17 Jehova, Kalunga ketu, oye e tu kufa mo nootate muEgipiti meumbo loupika, a longa omadidiliko aa manene moipafi yetu, a kala noku tu wilika mondjila aishe oyo twa enda, nomokati koiwana aishe omo twa pita.
18 Jehova okwa taataa mo ovanhu aveshe, mwa kwatelwa Ovaamori ovo va li hava di medu eli. Onghee nafye ohatu ka longela Jehova, molwaashi oye Kalunga ketu.”
19 Opo nee Josua okwa lombwela ovanhu, ta ti: “Itamu dulu okulongela Jehova, molwaashi oye Kalunga omuyapuki; Kalunga oo a teelela okulongelwa oye aeke. Ita ka dima po omatauluko eni nomatimba eni.
20 Ngeenge omwa efa po Jehova, nokulongela ookalunga vokoilongo, ote ke mu handukila noku mu xulifa po nonande okwa kala he mu longele ouwa.”
21 Opo nee ovanhu ova lombwela Josua, tava ti: “Fye ohatu ka longela Jehova!”
22 Onghee Josua okwa lombwela ovanhu, a ti: “Onye eendombwedi deni vene, kutya onye vene mwa hoolola okulongela Jehova.” Opo nee ova tya: “Ofye eendombwedi.”
23 “Onghee kufei mo ookalunga vokoilongo mokati keni, nokulongela Jehova, Kalunga kaIsrael, nomutima weni aushe.”
24 Opo nee ovanhu ova tya kuJosua: “Ohatu ka longela Jehova, Kalunga ketu, nohatu ka dulika kondaka yaye.”
25 Josua okwa ninga ehangano novanhu mefiku olo, ndele te va tulile po omaufomhango neemhango muSekem.
26 Josua okwa shanga eendjovo odo membo lOmhango yaKalunga, ndele ta kufa emanya la kula nokwe li dika momuti wa kula, sha hala okutya, monhele iyapuki yaJehova.
27 Josua okwa lombwela ovanhu aveshe, a ti: “Taleni, emanya eli otali ningi ondombwedi yetu, molwaashi ola uda ashishe osho Jehova e tu lombwela notali ningi ondombwedi yeni, opo muha ka efe po Kalunga keni.”
28 Opo nee Josua okwa lekela ovanhu, keshe umwe okwa ya kedu laye.
29 Konima yoinima oyo, Josua, omonamati waNun, omupiya waJehova, okwa fya e na eedula 110.
30 Onghee ove mu paka moshitukulwa osho a fyuulula muTimnat-sera, osho shi li koshitukulwa shokeemhunda shaEfraim, kolundume lomhunda yaGaas.
31 Ovaisrael ova twikila okulongela Jehova efimbo alishe olo Josua a kala e na omwenyo nefimbo alishe olo ovakulunhu va twikila okukala nomwenyo konima yefyo laJosua nove shii oilonga aishe oyo Jehova a longa ponhele yOvaisrael.
32 Oipongolo yaJosef oyo Ovaisrael va kufa muEgipiti, okwa li ya pakwa muSekem moshitukulwa shepya olo Jakob a landa kovanamati vaHamor, xe yaSekem, koimaliwa yoisilveri 100, nosha li sha ninga efyuululo lovanamati vaJosef.
33 Opo nee Eliaser, omonamati waAron, naye okwa fya. Onghee ove mu paka koshikulundudu shaPinehas, omonamati waye, osho a li e mu pa koshitukulwa shokeemhunda shaEfraim.
Eshangelo lopedu
^ Sha hala okutya, Eufrat.
^ Sha hala okutya, Eufrat.
^ Eln., “omafiku.”
^ Sha hala okutya, kombinga yokoushilo.
^ Ile tashi dulika, “oovene vedu.”
^ Ile tashi dulika, “va ngwangwane; va tile.”
^ Ile “monghedi ya koshoka.”
^ Sha hala okutya, Eufrat.
^ Sha hala okutya, Eufrat.
