Josua 4:1-24
-
Omamanya taa kala e li edimbulukifo (1-24)
4 Diva eshi oshiwana ashishe sha mana okutauluka omulonga waJordan, Jehova okwa lombwela Josua, ta ti:
2 “Kufa ovalumenhu 12, mepata keshe omulumenhu umwe,
3 ndele to va lombwele ngaha: ‘Kufeni omamanya 12 pokati komulonga waJordan, ponhele opo ovapristeri va fikama, ndele tamu i nao noku a tula ponhele opo tamu ka kala oufiku.’”
4 Onghee Josua okwa ifana ovalumenhu 12, ovo a hoolola mOvaisrael, mepata keshe omulumenhu umwe.
5 Opo nee Josua okwe va lombwela, a ti: “Piteni komesho yOshikefa shaJehova, Kalunga keni, mu ye pokati komulonga waJordan, nakeshe umwe womunye oku na okutumba emanya, ndele te li tula kepepe laye, she likolelela komuvalu womapata aIsrael,
6 opo omamanya oo a kale edidiliko mokati keni. Ngeenge ovana* veni ove ke mu pula monakwiiwa kutya: ‘Omolwashike mu na omamanya aa?’
7 omu na oku va lombwela kutya: ‘Omolwaashi omeva omomulonga waJordan okwa li a kanghama omolwoshikefa shehangano laJehova. Eshi sha taulukifwa omulonga waJordan, omeva omomulonga waJordan okwa kanghama. Omamanya oo otaa ningi edimbulukifo laalushe kOvaisrael.’”
8 Ovaisrael ova ninga naanaa ngaashi Josua e va lombwela. Ova kufa omamanya 12 pokati komulonga waJordan, ngaashi Jehova a li a lombwela Josua, she likolelela komuvalu womapata aIsrael. Ova ya nomamanya konhele oko tava ka kala oufiku, ndele tave a diki oko.
9 Josua okwa dika po yo omamanya 12 pokati komulonga waJordan, ponhele opo pa li pa fikama ovapristeri, ovo va li va humbata oshikefa shehangano, nomamanya oo oko e li fiyo okunena.
10 Ovapristeri, ovo va li va humbata Oshikefa, ova kala va fikama pokati komulonga waJordan, fiyo osheshi oinima aishe oyo Jehova a lombwela Josua a lombwele ovanhu va ninge ya pwa, metwokumwe naashishe osho Moses a li a lombwela Josua. Efimbo alishe olo, ovanhu ova kala tava tauluka meendelelo.
11 Diva eshi ovanhu aveshe va tauluka, ovapristeri ova tauluka va humbata Oshikefa shaJehova moipafi yovanhu.
12 Ovaruben, Ovagad netata lepata laManasse ova tetekela Ovaisrael vakwao mokutauluka omulonga waJordan, va unganekelwa olwoodi, ngaashi ashike Moses a li e va lombwela.
13 Ovakwaita 40 000 lwaapo, va homata, ve lilongekidila olwoodi, ova tauluka moipafi yaJehova va finda momaluhaela aJeriko.
14 Mefiku olo, Jehova okwa tumbaleka Josua moipafi yOvaisrael aveshe, nove mu fimaneka* neenghono onghalamwenyo yaye aishe, ngaashi ashike va li va fimaneka neenghono Moses.
15 Opo nee Jehova okwa lombwela Josua, ta ti:
16 “Lombwela ovapristeri ovo va humbata oshikefa shOipelende yOumbangi va dje mo momulonga waJordan.”
17 Onghee Josua okwa lombwela ovapristeri, ta ti: “Djeni mo momulonga waJordan.”
18 Eshi ovapristeri ovo va humbata oshikefa shehangano laJehova va dja po pokati komulonga waJordan, ndele tava lyata neemhadi poukukutu, omeva omomulonga waJordan okwa li a hovela vali okukunguluka a twa komutunda ngaashi ve a hangele.
19 Mefiku etimulongo lomwedi wotete, ovanhu ova dja mo momulonga waJordan, ndele tava ongo onhanda puGilgal, koushilo weengaba daJeriko.
20 Omamanya 12, oo va li va kufa momulonga waJordan, Josua okwe a dika muGilgal.
21 Opo nee okwa tya kOvaisrael: “Monakwiiwa ngeenge ovana veni tava pula ooxe kutya: ‘Omamanya aa okwa hala okutya shike?’
22 Omu na okulombwela ovana veni kutya: ‘Ovaisrael ova taulukile omulonga waJordan poukukutu,
23 eshi Jehova, Kalunga keni, a pwiininika omeva omomulonga waJordan moipafi yavo fiyo osheshi va tauluka, ngaashi ashike Jehova, Kalunga keni, a ningile pEfuta Litilyana, eshi e li pwiininika moipafi yetu fiyo osheshi twa mana oku li tauluka.
24 Okwe shi ninga, opo ovanhu aveshe kombada yedu va shiive nghee eke laJehova li na eenghono, nopo mu tile alushe Jehova, Kalunga keni.’”
