Josua 7:1-26
7 Ovaisrael kava li ovadiinini kwaasho sha li sha tokolelwa ehanauno, molwaashi Akan, omonamati waKarmi, omonamati waSabdi, omonamati waSera, womepata laJuda, okwa kufa imwe yomoinima oyo ya li ya tokolelwa ehanauno. Osho osha li sha ningifa Jehova a handukile neenghono Ovaisrael.
2 Opo nee Josua okwa tuma ovalumenhu va dja muJeriko va ye kuAi, osho shi li popepi naBet-aven, koushilo waBetel, nokwe va lombwela, ta ti: “Indeni mu ka ndaade edu.” Onghee ovalumenhu ovo ova ya, ndele tava ka ndaada Ai.
3 Eshi va alukila kuJosua, ove mu lombwela, va ti: “Havanhu aveshe va pumbwa okuya. Ovalumenhu omayovi avali, ile omayovi atatu lwaapo ova wana okufinda Ai. Ino lolola ovanhu aveshe moku va tuma ko, molwaashi oku na ashike ovanhu vanini.”
4 Okwa ya ovalumenhu 3 000 lwaapo, ashike ova li va faduka po ovalumenhu vokuAi.
5 Ovalumenhu vokuAi ova dipaa ovalumenhu 36, nove va taataa okudja komuvelo woshilando fiyo okuSebarim,* nova enda tave va dipaa fiyo omolufilu. Onghee omitima dovanhu oda li tadi kakama nokava li vali ve na ouladi.*
6 Opo nee Josua okwa pombaula oikutu yaye nokwe linyongamena oshipala sha twa pedu komesho yOshikefa shaJehova fiyo okonguloshi, ye novakulunhu vaIsrael, nova kala tave lifufile omadu momitwe.
7 Josua okwa ti: “Omwene Jehova, Omunamapangelo aeshe, omolwashike we tu eta fiyo twa tauluka omulonga waJordan u tu yandje kOvaamori ve tu hanaune po? Ngeno twa kalele ashike kombinga ikwao* yomulonga waJordan!
8 Alikana, Jehova, oshike vali handi dulu okutya paife eshi Ovaisrael va faduka po* ovatondi vavo?
9 Ngeenge Ovakaanan novakalimo aveshe vomoshitukulwa ve shi udu, otave ke tu dingilila notava ka dima ko filufilu edina letu kombada yedu, ndele oto ka ninga po shike shi na sha nedina loye linene?”
10 Jehova okwa nyamukula Josua, a ti: “Penduka! Omolwashike wa nangala wa fidimika oshipala shoye?
11 Ovaisrael ova nyona. Ova nyona ehangano olo nde va lombwela va diinine. Ova kufa imwe yomoinima oyo ya tokolelwa ehanauno, ve i vaka po nove i holeka momamona avo.
12 Onghee Ovaisrael itava ka finda ovatondi vavo. Otave ke va pilamena noku va faduka po, molwaashi ove lilongela ehanauno. Itandi ka kala vali pamwe nanye, ongeenge ashike mwa hanauna po oo e li mokati keni e lilongela ehanauno.
13 Fikama, ndele to yapula ovanhu. Va lombwela kutya: ‘Liyapuleni omolwefiku lomongula, osheshi Jehova, Kalunga kaIsrael, ota ti ngaha: “Israel, mokati keni omu na osho sha tokolelwa ehanauno. Itamu ka finda ovatondi veni, fiyo osheshi mwa kufa mo mokati keni osho sha tokolelwa ehanauno.
14 Omu na okwoongala ongula pamapata, nepata olo Jehova ta hoolola oli na okuuya popepi, pamaludi, noludi olo Jehova ta hoolola oli na okuuya popepi, pamaukwaneumbo, noukwaneumbo oo Jehova ta hoolola ou na okuuya popepi, omunhu nomunhu.
15 Oo ta hangika noshinima osho sha tokolelwa ehanauno, oku na okuxwikwa po momundilo, ye nakeshe osho e na, molwaashi okwa nyona ehangano laJehova, nokwa ninga oshinima shififa ohoni mokati kOvaisrael.”’”
16 Mefiku la shikula ko, Josua okwa penduka ongula inene nokwa ongela Ovaisrael pamapata, nepata laJuda olo la li la hoololwa.
17 Okwa ehenifa popepi omaludi aJuda, noludi lOvaserahi olo la li la hoololwa, konima yaasho, okwa ehenifa popepi oludi lOvaserahi, omunhu nomunhu, na Sabdi oye a li a hoololwa.
18 Xuuninwa, okwa ehenifa popepi oukwaneumbo waSabdi, omunhu nomunhu, na Akan, omonamati waKarmi, omonamati waSabdi, omonamati waSera, womepata laJuda, oye a li a hoololwa.
19 Opo nee Josua okwa tya kuAkan: “Mumati wange, alikana, fimaneka Jehova, Kalunga kaIsrael, noku mu hepaululila omatimba oye. Alikana, lombwele nge eshi wa ninga. Ino shi holeka nge.”
20 Akan okwa nyamukula Josua, a ti: “Oshoshili kutya aame nda nyona kuJehova, Kalunga kaIsrael, naashi osho nda ninga.
21 Eshi nda mona moixuulwa* oshikutu shiwa elela sha dja kuSinar nosho yo eesekeli* 200 doshisilveri noshingoli shondjudo yeesekeli 50, onde i hokwa, ndele handi i kufa po. Paife onde i fudika medu metwali lange, noimaliwa oi li koshi.”
22 Opo nee Josua okwa tuma ovatumwa, ndele tava i ketwali, noshikutu osha li sha holekwa metwali laye noimaliwa oya li koshi yasho.
23 Onghee ova kufa oinima oyo metwali, ndele tave i eta kuJosua nokOvaisrael aveshe, nove i tula koshipala shaJehova.
24 Josua pamwe nOvaisrael aveshe ova kufa Akan, omonamati waSera, oshisilveri, oshikutu shiwa, oshingoli, ovanamati vaye, ovanakadona vaye, eengobe daye, eendongi daye, eedi daye noikombo yaye, etwali laye, nakeshe osho a li e na, ndele tave i twala kEfilu laAkor.
25 Josua okwa ti: “Omolwashike we tu etela oupyakadi?* Jehova ote ku etele oupyakadi nena eli.” Opo nee Ovaisrael aveshe ove mu denga nomamanya, nokonima ove va xwika po nomundilo. Aveshe osho va dipawa ngaho nomamanya.
26 Ova ongela kombada yaye onduba yomamanya oyo i li ko fiyo okunena. Opo nee ehandu linene laJehova ola lota. Osho osho sha ningifa onhele oyo i lukwe Efilu laAkor* fiyo okunena.
Eshangelo lopedu
^ Tali ti “Ekololo lOmamanya.”
^ Eln., “omitima dovanhu oda hengumuka noda ninga ngaashi omeva.”
^ Sha hala okutya, kombinga yokoushilo.
^ Ile “va pilamena.”
^ Ile “momaliko oo a xupa po konima yolwoodi.”
^ Osekeli imwe oi fike peegrama 11,4. Tala Oshiwedelwako B14.
^ Ile “oudjuu.”
^ Tali ti “Oupyakadi; Okweetela umwe Oupyakadi.”
