Levitikus 13:1-59
13 Jehova okwa twikila okupopya naMoses naAron, ta ti:
2 “Ngeenge oshipa* shomunhu sha dindi, sha ninga oshipute, ile evangwa, ndele tashi ningi oudu woshilundu* moshipa shaye, oku na okutwalwa komupristeri Aron, ile kuumwe womovapristeri womovanamati vaAron.
3 Omupristeri ota ka konakona oshipa shomunhu oo apa tapa vele. Ngeenge omundele oo u li opo tapa vele owa ningi utoka, nongeenge oudu oo owa ya fiyo okeenhumba, osha yela kutya oo oudu woshilundu. Omupristeri oku na oku shi konakona nokupopya kutya ina koshoka.
4 Ndele ngeenge evangwa olo li li koshipa shaye olitoka, noinali ya fiyo okeenhumba, nomundele oo u li po inau ninga utoka, omupristeri oku na okulikalekela omunhu oo omafiku aheyali.
5 Omupristeri oku na oku mu konakona mefiku etiheyali, nongeenge evangwa olo ola dima po noinali lihanena oshipa, oku na vali oku mu likalekela oule womafiku aheyali.
6 “Omupristeri oku na oku mu konakona vali mefiku etiheyali, nongeenge evangwa olo ola dima po noinali lihanena oshipa, omupristeri oku na okupopya kutya okwa koshoka; osha li ashike oshipute. Omunhu oo oku na okukosha oikutu yaye nota kala a koshoka.
7 Ngeenge oshipute* oshe lihanene oshipa konima eshi omupristeri a popya kutya omunhu oo okwa koshoka, oku na okushuna vali* komupristeri.
8 Omupristeri oku na okukonakona oshipute osho, ndele ngeenge oshe lihanena oshipa, omupristeri oku na okupopya kutya ina koshoka. Oku na oshilundu.
9 “Ngeenge omunhu okwa kwatwa koudu woshilundu, oku na okutwalwa komupristeri,
10 nomupristeri ote ke mu konakona. Ngeenge oshipa osho sha dinda osha ninga shitoka, nomundele oo u li po owa ninga utoka, naapo pa dinda ope na oshipute sha ekama,
11 otashi ulike kutya oshipa shaye oshi na oshilundu sha kolonda, nomupristeri oku na okupopya kutya ina koshoka. Ke na oku mu likalekela, opo e mu konakone vali, molwaashi ina koshoka.
12 Ngeenge oshilundu oshe lihanene oshipa ashishe, nomupristeri okwa mona kutya olutu lomunhu alishe ola kwatwa koudu woshilundu, okudja komutwe fiyo okeemhadi,
13 naashi e mu konakona okwa mona kutya oshilundu oshe lihanena oshipa shaye ashishe, ota ka popya kutya omunhu oo a kwatwa koudu okwa koshoka.* Ngeenge oshipa shaye ashishe osha toka, okwa koshoka.
14 Ashike ngeenge okwa ningi oshipute sha patuluka koshipa, ota kala ina koshoka.
15 Ngeenge omupristeri okwa mono oshipute sha patuluka, oku na okupopya kutya ina koshoka. Oshipute sha ekama inashi koshoka. Oo oudu woshilundu.
16 Ndele ngeenge oshipute osho sha patuluka osha ningi vali shitoka, oku na okuya komupristeri.
17 Omupristeri ote ke mu konakona, ndele ngeenge opo pa kwatwa koudu opa ninga patoka, omupristeri ota ka popya kutya omunhu oo a kwatwa koudu okwa koshoka. Okwa koshoka.
18 “Ngeenge omunhu okwa ningi oshitumba koshipa, ndele tashi veluka,
19 ashike opo pa li oshitumba opa ninga evangwa litoka la dinda, ile litilyana, omunhu oo oku na oku ke liulika komupristeri.
20 Omupristeri ota ka konakona po, nongeenge ola ya fiyo okeenhumba, nomundele wapo owa ninga utoka, omupristeri ota ka popya kutya omunhu oo ina koshoka. Okwa kwatwa koudu woshilundu opo pa li oshitumba.
21 Ngeenge omupristeri e shi konakona, ndele ta mono kutya kape na omundele utoka nevangwa inali ya fiyo okeenhumba notali monika tali dimi po, omupristeri oku na oku mu likalekela oule womafiku aheyali.
22 Ngeenge evangwa ole lihanena filufilu oshipa, omupristeri oku na okupopya kutya ina koshoka. Oku na oudu.
23 Ndele ngeenge oli li ashike ponhele imwe, inali lihana, okwa tuluka ashike omolwoshitumba, omupristeri ota ka popya kutya okwa koshoka.
24 “Ile ngeenge umwe okwa ningi oshipute, molwaashi a pya komundilo, ndele onhumba yoposhipute tai ningi evangwa litilyana, ile litoka,
25 omupristeri ote ke shi konakona. Ngeenge omundele oo u li pevangwa owa ningi utoka nevangwa ola ya fiyo okeenhumba, okwa kwatwa koudu woshilundu poshipute, nomupristeri ota ka popya kutya ina koshoka. Oku na oudu woshilundu.
26 Ashike ngeenge omupristeri okwe shi konakona, ndele ta mono kutya pevangwa kape na omundele utoka nevangwa inali ya fiyo okeenhumba, nonokutya oshipute otashi dimi po, omupristeri ote ke mu likalekela oule womafiku aheyali.
27 Omupristeri ote ke mu konakona mefiku etiheyali, nongeenge okwa mono kutya evangwa ole lihanena filufilu oshipa, ota ka popya kutya ina koshoka. Oku na oudu woshilundu.
28 Ndele ngeenge evangwa oli li ashike ponhele imwe inali lihanena oshipa nola dima po, oli li ashike odindo yoshipute, nomupristeri ota ka popya kutya okwa koshoka, molwaashi okwa tuluka ashike omolwoshipute.
29 “Ngeenge omulumenhu, ile omukainhu okwa kwatwa koudu koshipa shomomutwe, ile koshedi,
30 omupristeri ota ka konakona opo pe na oudu. Ngeenge oudu owa ya fiyo okeenhumba, neexwiki odo di li po oda ninga dishunga noda ninga dishona molutu, omupristeri ota ka popya kutya omunhu oo ina koshoka; okwa kwatwa koudu woshipa shomomutwe, ile womeendjedi. Oku na oudu woshilundu koshipa shomomutwe, ile koshedi.
31 Ndele ngeenge omupristeri okwa mono kutya opo opa kwatwa koudu, ashike oudu oo inau ya fiyo okeenhumba nokape na eexwiki dilaula, omupristeri oku na okulikalekela omunhu oo a kwatwa koudu oule womafiku aheyali.
32 Omupristeri ota ka konakona opo pa kwatwa koudu mefiku etiheyali, nongeenge oudu inau tandavela nokape na eexwiki dishunga, noudu inau ya fiyo okeenhumba,
33 omunhu oo oku na okulikulula ye mwene, ashike ke na okukulula onhele oyo ya kwatwa koudu. Opo nee omupristeri ote ke likalekela omunhu oo a kwatwa koudu oule womafiku aheyali.
34 “Omupristeri oku na okukonakona vali opo pa kwatwa koudu mefiku etiheyali, ndele ngeenge oudu woshipa shomomutwe nowomeendjedi inau lihanena oshipa, noinau ya fiyo omeenhumba, omupristeri oku na okupopya kutya omunhu oo okwa koshoka, noku na okukosha oikutu yaye nota kala a koshoka.
35 Ndele ngeenge oudu owe lihanene filufilu oshipa konima eshi kwa popiwa kutya okwa koshoka,
36 omupristeri ote ke mu konakona, nongeenge oudu owe lihanena oshipa, omupristeri ina pumbwa vali okutala ngeenge oku na eexwiki dishunga; omunhu oo ina koshoka.
37 Ndele ngeenge omakonakono aye okwa ulike kutya oudu inau tandavela nopa mena eexwiki dilaula, okwa veluka. Okwa koshoka, nomupristeri ota ka popya kutya okwa koshoka.
38 “Ngeenge omulumenhu, ile omukainhu okwa ningi omavangwa koshipa,* ndele omavangwa omatoka,
39 omupristeri ote ke a konakona. Omavangwa oo e li koshipa ngeenge okwa ningi matoka eshi taa ende taa dimi po, kungaho inaa nyika oshiponga. Omunhu oo okwa koshoka.
40 “Ngeenge eexwiki domulumenhu oda kunyuka ko komutwe waye, ndele ta ningi ongwala, okwa koshoka.
41 Ngeenge okwa kunyuka eexwiki momutwe lwokoshipala ndele ta ningi ongwala, okwa koshoka.
42 Ndele ngeenge moshipa shaye shomomutwe opo pe na ongwala, ile shomombaba yoshipala shaye omwa ningi oshipute shitilyana, osha yela kutya oku na oshilundu moshipa shaye shomomutwe, ile mombaba yoshipala shaye.
43 Omupristeri ote ke mu konakona, nongeenge odindo oyo i li opo pa kwatwa koudu mongwala oyo i li pokati komutwe waye, ile mombaba yoshipala shaye oitilyana notai monika ya fa oshipa shi na oshilundu,
44 omunhu oo omunashilundu. Ina koshoka, nomupristeri oku na okupopya kutya ina koshoka omolwoudu oo u li koshipa shomomutwe waye.
45 Omunashilundu oo e na oudu, oikutu yaye oi na okupombaulwa, nomutwe waye kau na okukamulwa noku na okuuvika eendjedi daye dopombada, ndele ta ingida ta ti, ‘Ame inandi koshoka, inandi koshoka!’
46 Ota kala ina koshoka efimbo alishe olo e na oudu. Ndele molwaashi ina koshoka, oku na okukala e likalela. Onhele omo ta kala oi na okukala kondje yonhanda.
47 “Ngeenge oudu woshilundu owa i moshikutu, kutya nee oshikutu sholududi leedi, ile oshikutu sholiina,
48 kutya nee omeengodi odo da yukilila, ile ododo da kambakana doshiyata sholiina, ile sholududi leedi, ile omoshipa, ile mukeshe shimwe osho sha longwa moshipa,
49 ndele omukifi oo wa ya moshikutu tau shi ningi evala lishunga, ile litilyana, kungaho oshipa, eengodi odo da yukilila naado da kambakana, ile keshe osho sha longwa moshipa osha kwatwa koudu woshilundu, noshi na okuulikilwa omupristeri.
50 Omupristeri ota ka konakona oudu oo, note ke likalekela oshinima osho sha kwatwa koudu oule womafiku aheyali.
51 Ngeenge a konakona omukifi mefiku etiheyali, ndele ta mono kutya owe lihanena moshikutu, meengodi odo da yukilila naado da kambakana, ile moshipa shoshinamwenyo, (kashi na nee mbudi kutya oshipa osha li tashi longifwa shike), omukifi oo oshilundu sha nyika oshiponga, noshinima osho inashi koshoka.
52 Oku na okuxwika po oshikutu, ile eengodi odo da yukilila, ile odo da kambakana di li moshikutu sholududi leedi, ile sholiina, ile keshe oshinima sha longwa moshipa osho sha kwatwa komukifi, molwaashi omukifi oo oshilundu sha nyika oshiponga. Oshi na okuxwikwa po momundilo.
53 “Ndele ngeenge omupristeri okwa konakona omukifi, ndele ta mono kutya inau lihanena moshikutu, ile meengodi odo da yukilila, ile mwaado da kambakana, ile moshinima keshe sha longwa moshipa,
54 omupristeri ota ka yandja elombwelo kutya nava koshe oshinima osho sha kwatwa komukifi, note ke shi likalekela natango oule womafiku aheyali.
55 Omupristeri ota ka konakona oshinima osho sha kwatwa koudu konima ngeenge sha koshwa nawanawa. Ngeenge opo pa kwatwa koudu ina pe uya elunduluko lasha, kutya nee omukifi inau lihanena mo, inashi koshoka. Ou na oku shi xwika po momundilo, molwaashi osha lika komukifi, kutya nee omeni lasho, ile okombada yasho.
56 “Ashike ngeenge omupristeri okwe shi konakona, noposhitukulwa opo pe na evala loudu otapa ende tapa yela, eshi sha koshwa nawanawa, oshitukulwa osho sha kwatwa oku na oku shi pombola ko koshikutu, ile koshipa, ile keengodi da yukilila, ile da kambakana.
57 Kakele kaasho, ngeenge natango evala ola holoka moshikutu, ile meengodi odo da yukilila, ile odo da kambakana, ile moshinima keshe sha longwa moshipa, osha yela kutya omukifi owe lihanena mo, nou na okuxwika po momundilo oshinima keshe sha kwatwa koudu.
58 Ndele ngeenge evala olo la kwatwa koudu ola di ko koshikutu, ile keengodi odo da yukilila, ile odo da kambakana, ile koshinima keshe sha longwa moshipa osho wa kosha, oshi na okukoshwa oshikando oshitivali, notashi kala sha koshoka.
59 “Oyo omhango i na sha noudu woshilundu womoshikutu sholududi leedi, ile sholiina, ile womeengodi odo da yukilila, ile womwaado da kambakana, ile womoshinima keshe sha longwa moshipa, oyo tai ufa kutya osha koshoka, ile inashi koshoka.”
Eshangelo lopedu
^ Eln., “moshipa shombelela yaye.”
^ Oshitya shOshiheberi osho sha tolokwa “oshilundu” oshi na eityo la mbwalangadja, notashi dulu okukwatela mo omikifi doshipa da yoolokafana odo di na olutapo. Otashi dulu yo okukwatela mo oinima oyo hai etele ovanhu omukifi okudja moikutu nomomaumbo.
^ Ile “opo pa kwatwa koudu.”
^ Ile “oshikando oshitivali.”
^ Ile “ita tandaveleke oudu.”
^ Eln., “moshipa shombelela yaye.”
