Levitikus 15:1-33
-
Omahiyoyo oo haa di koulumenhu inaa koshoka (1-33)
15 Jehova okwa twikila okupopya naMoses naAron, ta ti:
2 “Popyeni nOvaisrael mu va lombwele kutya, ‘Ngeenge omulumenhu okwa dja omahiyoyo koulumenhu waye,* omahiyoyo oo otae mu ningifa a kale ina koshoka.
3 Ina koshoka omolwomahiyoyo, kutya nee ota twikile okudja omahiyoyo koulumenhu waye, ile owa fita, natango ina koshoka.
4 “‘Kombete keshe taku nangala oo ta di omahiyoyo otai kala inai koshoka, nokoshinima keshe oko ta kala omutumba otashi kala inashi koshoka.
5 Omunhu oo ta kumu ombete yaye oku na okukosha oikutu yaye, noku na okulikosha nomeva nota kala ina koshoka fiyo okonguloshi.
6 Omunhu keshe ta kala omutumba koshinima keshe osho sha kalwa omutumba komunhu ta di omahiyoyo, oku na okukosha oikutu yaye, okulikosha nomeva, nota kala ina koshoka fiyo okonguloshi.
7 Keshe oo ta kumu omunhu oo ta di omahiyoyo oku na okukosha oikutu yaye, okulikosha nomeva, nota kala ina koshoka fiyo okonguloshi.
8 Ngeenge omunhu oo ta di omahiyoyo okwa fiile omate omunhu oo a koshoka, omunhu oo oku na okukosha oikutu yaye, okulikosha nomeva, nota kala ina koshoka fiyo okonguloshi.
9 Omutumba keshe wa kalwa omutumba komunhu oo ta di omahiyoyo otau kala inau koshoka.
10 Keshe oo ta kumu keshe osho sha li koshi yaye, ota kala ina koshoka fiyo okonguloshi, nakeshe oo ta humbata oinima oyo oku na okukosha oikutu yaye, okulikosha nomeva, nota kala ina koshoka fiyo okonguloshi.
11 Ngeenge omunhu oo ta di omahiyoyo ine likosha komake nomeva, ndele ta kumu omunhu umwe, omunhu oo a kumwa oku na okukosha oikutu yaye, okulikosha nomeva, nota kala ina koshoka fiyo okonguloshi.
12 Oshiyuma shedu osho sha kumwa komunhu oo ta di omahiyoyo oshi na okutataulwa po, nakeshe oshikwatelwa sha longwa moshiti oshi na okukoshwa nomeva.
13 “‘Ngeenge omahiyoyo okwa oka, nomunhu okwa koshoka kuo, oku na okuvalula omafiku aheyali okuyelifwa kwaye, noku na okukosha oikutu yaye, okulikosha nomeva taa kunguluka, nota kala a koshoka.
14 Mefiku etihetatu, oku na okukufa eenghuti mbali domatende, ile eenghutyona mbali dopovanhu nokuuya koshipala shaJehova poshivelo shetwali lokwoongalela, ndele te di yandje komupristeri.
15 Omupristeri ote ke di yamba, imwe oi li etimbayambo, naikwao oi li exwikiloyambo, note ke mu koshola koshipala shaJehova omolwomahiyoyo oo a dja muye.
16 “‘Ngeenge omulumenhu okwa di omaxu oludalo, oku na okukosha olutu laye alishe nomeva, nota kala ina koshoka fiyo okonguloshi.
17 Oku na okukosha nomeva oshikutu keshe noshinima keshe sha longwa moshipa osho sha ningilwa omaxu oludalo, notashi kala inashi koshoka fiyo okonguloshi.
18 “‘Ngeenge omulumenhu okwa nangala nomukainhu, ndele ta di omaxu oludalo, aveshe ove na okulikosha nomeva, notava kala inava koshoka fiyo okonguloshi.
19 “‘Ngeenge omukainhu okwa di ohonde molutu laye, ota twikile okukala ina koshoka omolwomafimbo oule womafiku aheyali. Keshe oo te mu kumu ota kala ina koshoka fiyo okonguloshi.
20 Keshe shimwe osho ta nangala kusho e li komafimbo otashi kala inashi koshoka, nakeshe shimwe osho ta kala omutumba kusho otashi kala inashi koshoka.
21 Keshe oo ta kumu ombete yaye oku na okukosha oikutu yaye, okulikosha nomeva, nota kala ina koshoka fiyo okonguloshi.
22 Keshe oo ta kumu oshinima keshe oko omukainhu oo a kala omutumba oku na okukosha oikutu yaye, okulikosha nomeva, nota kala ina koshoka fiyo okonguloshi.
23 Ngeenge umwe okwa kumu ombete, ile oshinima oko omukainhu oo a kala omutumba, ota kala ina koshoka fiyo okonguloshi.
24 Ngeenge omulumenhu okwa nangala nomukainhu, ndele ohonde yomafimbo omukainhu tai mu kumu, omulumenhu ota kala ina koshoka oule womafiku aheyali, nombete keshe ta nangala kuyo otai kala inai koshoka.
25 “‘Ngeenge omukainhu okwa kala e na etiko lohonde oule womafiku mahapu pefimbo lihe fi olo ha i komafimbo, ile ngeenge okwa kala e na etiko oule wefimbo lile li dulife olo ha kala komafimbo, ota kala ina koshoka omafiku aeshe oo e na etiko, ngaashi ashike ha kala ina koshoka ngeenge e li komafimbo.
26 Ombete keshe ta nangala pefimbo opo e na etiko otai kala inai koshoka ngaashi ombete oko ha nangala ngeenge e li komafimbo, noshinima keshe oko a kala omutumba otashi kala inashi koshoka, ngaashi ashike eshi ha kala ina koshoka ngeenge e li komafimbo.
27 Keshe oo ta kumu oinima oyo ota kala ina koshoka, noku na okukosha oikutu yaye, okulikosha nomeva, nota kala ina koshoka fiyo okonguloshi.
28 “‘Ashike ngeenge okwa koshoka ketiko laye, oku na okuvalula omafiku aye aheyali, nokudja opo ota kala a koshoka.
29 Mefiku etihetatu, oku na okukufa eenghuti mbali domatende, ile eenghutyona mbali dopovanhu, noku na oku di eta komupristeri poshivelo shetwali lokwoongalela.
30 Omupristeri imwe ote i ningi yetimbayambo, naikwao oyexwikiloyambo, note ke mu koshola koshipala shaJehova shi na sha netiko laye inali koshoka.
31 “‘Kungaho, otamu ka kaleka Ovaisrael kokule nonyata yavo, opo vaha fye omolwokuhe na oukoshoki kwavo mokunyateka etwalihangano lange olo li li mokati kavo.
32 “‘Ei omhango i na sha nomulumenhu oo ta di omahiyoyo, omulumenhu oo ina koshoka omolwomaxu oludalo,
33 omukainhu ina koshoka pefimbo opo e li komafimbo, omulumenhu keshe, ile omukainhu keshe oo ta tika sha molutu, nomulumenhu oo a nangala nomukainhu ina koshoka.’”
Eshangelo lopedu
^ Eln., “mombelela yaye.”
