Levitikus 17:1-16
17 Natango Jehova okwa lombwela Moses, ta ti:
2 “Popya naAron novanamati vaye nosho yo Ovaisrael aveshe to ti kuvo, ‘Eshi osho Jehova a popya:
3 “‘“Ngeenge umwe womeumbo laIsrael okwa dipaele omhedi, ile odjona yondume, ile oshikombo monhanda, ile ngeenge okwe i dipaele kondje yonhanda,
4 ponhele yoku i eta koshivelo shetwali lokwoongalela e i yandje i li eyambo kuJehova, komesho yetwalihangano laJehova, omunhu oo ota kala e na etimba lohonde. Okwa tilashi ohonde noku na okudimwa* mo moshiwana shavo.
5 Opo Ovaisrael va ete komupristeri omayambo, oo tava ka yambela Jehova, oo hava yambele poluhaela, poshivelo shetwali lokwoongalela, omayambo oo ove na oku a yambela Jehova, e li omayambo oukumwe.
6 Omupristeri ota ka shamina ohonde koaltari yaJehova, koshivelo shetwali lokwoongalela, nota ka xwika oinghene i li edimba liwa* koshipala shaJehova.
7 Kave na vali okuyambela omayambo eendemoni,* odo hava haele nado, meityo loku di longela. Oyo otai kala onghedimhango yeni yaalushe fiyo okomapupi eni aeshe.”’
8 “Ou na oku va lombwela kutya, ‘Omunhu keshe womeumbo laIsrael, ile omunailongo keshe oo e li mokati keni, oo a yamba exwikiloyambo, ile eyambo,
9 noine li eta koshivelo shetwali lokwoongalela, opo e li yambele Jehova, oku na okudimwa* mo moshiwana shavo.
10 “‘Ngeenge omunhu keshe womeumbo laIsrael, ile omunailongo keshe, oo e li mokati keni, okwa li ohonde, itandi ka kala nda hokwa omunhu* oo ta li ohonde, nohandi ke mu dima* mo moshiwana shavo.
11 Osheshi omwenyo wombelela ou li mohonde, naame onde i yandja koaltari omolweni, opo mu likoshole nye vene,* molwaashi ohonde oyo oi li edimepo lomatimba omolwomwenyo oo u li muyo.
12 Nomolwaasho nda lombwela Ovaisrael kutya: “Kape na* oo e na okulya ohonde, nomunailongo oo e li mokati keni ke na okulya ohonde.”
13 “‘Ngeenge umwe womOvaisrael, ile umwe womovanailongo ovo ve li mokati keni okwa i koukongo, ndele ta dipaa oshifitukuti, ile okadila oko taka dulu okuliwa, oku na okutilashi ohonde yayo noku i fufila nedu.
14 Osheshi omwenyo wombelela keshe ou li mohonde, molwaashi omwenyo ou li muyo. Onghee onda tya kOvaisrael: “Inamu lya ohonde yombelela keshe, molwaashi omwenyo wombelela keshe ou li mohonde yayo. Keshe oo te i li ota ka dimwa* po.”
15 Ngeenge umwe,* kutya nee omukalimo, ile omunailongo, okwa li oshinamwenyo osho a hanga sha fya, ile sha dipawa koshifitukuti, oku na okukosha oikutu yaye nokulikosha nomeva, nota kala ina koshoka fiyo okonguloshi; opo nee ota kala a koshoka.
16 Ashike ngeenge ine i kosha, noine likosha,* ota ka handukilwa omolwenyono laye.’”
Eshangelo lopedu
^ Ile “okudipawa.”
^ Ile “tali udifa nawa, tali tulumukifa.” Eln., “tali fuwifa.”
^ Eln., “oikombo.” Tashi dulika ovanhu va li have di longele, [ile eendemoni], tava diladila kutya oishitwa i na omalududi i li molupe loshikombo.
^ Ile “okudipawa.”
^ Ile “omwenyo.”
^ Ile “dipaa.”
^ Ile “eemwenyo deni.”
^ Ile “Hamwenyo.”
^ Ile “dipawa.”
^ Ile “omwenyo keshe.”
^ Eln., “ombelela yaye.”
