Numeri 22:1-41
22 Opo nee Ovaisrael ova dja po opo, ndele tava ka onga onhanda momaluhaela aMoab popepi naJordan, okudja kuJeriko.
2 Balak, omonamati waSippor, okwa mona oinima aishe oyo Israel a ningila Ovaamori,
3 na Moab okwa li a tila unene ovanhu, molwaashi ova li vahapu neenghono, onghee Moab okwa li ta kakama koumbada omolwOvaisrael.
4 Moab okwa lombwela ovakulunhu vomuMidian, a ti: “Paife eongalo eli otali ka xwaka po oitukulwa yetu aishe oyo ye tu dingilila, ngaashi ashike omhedi tai li omwiidi mofuka.”
Pefimbo opo, Balak, omonamati waSippor, oye a li ohamba yaMoab.
5 Okwa tuma ovatumwa kuBileam, omonamati waBeor, kuPetor, osho shi li pomulonga* medu lavo. Okwa tuma kuye, ta ti: “Tala, ovanhu ova dja mo muEgipiti. Tala, ove lihanena edu alishe* keshe ashike apa to tale, nova tula popepi elela naame.
6 Alikana, ila paife, ndele to fingile nge ovanhu ava, osheshi ove na eenghono ve dule nge. Kungaho, pamwe ohandi ka dula oku va finda, ndele handi va taataa mo medu eli osheshi ondi shi shii kutya ou wa nangeka noupuna, ota kala a nangekwa noupuna, naau to fingi, ota kala a fingwa.”
7 Onghee ovakulunhu vomuMoab, novakulunhu vomuMidian ova ya kuBileam ve na ofuto yokunyanekela momake avo, ndele tave mu lombwele etumwalaka laBalak.
8 Opo nee okwa tya kuvo: “Kaleni apa oufiku ou, nohandi mu etele ondjovo keshe oyo Jehova ta lombwele nge.” Onghee omalenga aMoab okwa kala pamwe naBileam.
9 Kalunga okwe uya kuBileam, ndele ta ti: “Ovalumenhu ovo u li navo ovo oolyelye?”
10 Bileam okwa tya kuKalunga kashili: “Balak, omonamati waSippor, ohamba yaMoab, okwa tumina nge etumwalaka, ta ti:
11 ‘Tala, ovanhu ovo va dja muEgipiti ove lihanena edu alishe, keshe ashike apa to tale.* Ila paife u va fingile nge. Pamwe ohandi ka dula oku va lwifa, ndele handi va te mo.’”
12 Kalunga okwa tya kuBileam: “Ino ya pamwe navo. Ino finga ovanhu ovo, osheshi ova nangekwa noupuna.”
13 Bileam okwa penduka ongula inene, ndele ta lombwele omalenga aBalak, ta ti: “Indeni kedu leni, osheshi Jehova ina pitika nge ndi ye pamwe nanye.”
14 Opo nee omalenga aMoab okwa dja po nokwa shuna kuBalak, ndele taa ti: “Bileam okwa anya okuuya pamwe nafye.”
15 Ashike Balak okwa tuma natango omalenga mahapu nokwa fimanekwa e dule enya otete.
16 Okwe uya kuBileam, ndele taa ti kuye: “Balak, omonamati waSippor, okwa ti: ‘Alikana, ino efa nande osha shi ku imbe okuuya kwaame,
17 osheshi ohandi ke ku tumbalekifa unene nohandi ka ninga keshe osho to lombwele nge ndi ninge. Alikana, ila, ndele to fingile nge ovanhu ava.’”
18 Ndele Bileam okwa nyamukula ovapiya vaBalak, ta ti: “Nonande ngeno Balak oku pe nge eumbo laye mwene li yadi oshisilveri noshingoli, itandi ningi nande osha, kutya nee oshinini, ile oshinene, osho shi li omhinge nelombwelo laJehova, Kalunga kange.
19 Alikana, kaleni apa natango oufiku ou, opo ndi ude kutya Jehova ota lombwele nge vali shike.”
20 Opo nee Kalunga okwe uya oufiku kuBileam, ndele ta ti kuye: “Ngeenge ovalumenhu ovo ove ku ila, inda pamwe navo. Ndele oto ka popya ashike eendjovo odo handi ku lombwele u popye.”
21 Onghee Bileam okwa penduka ongula nokwa longekida ondongi* yaye, ndele ta i pamwe nomalenga aMoab.
22 Ndele ehandu laKalunga ola li la xwama, molwaashi Bileam okwa li ta i, nomweengeli waJehova okwa li e li ofika mondjila te mu kelele. Bileam okwa li a londa kondongi yaye nokwa li pamwe novapiya vaye vavali.
23 Eshi ondongi ya mona omweengeli waJehova a fikama mondjila e na eongamukonda meke laye, oya kendabala okukanduka mo mondjila i ye moixwa. Ndele Bileam okwa hovela okudenga ondongi i shune mondjila.
24 Opo nee omweengeli waJehova okwa fikama pondjila ya finana i li pokati koikunino ivali yomandjebele, opo pe na omakuma keembinga adishe.
25 Eshi ondongi ya mona omweengeli waJehova, oya hovela okuyaamena kekuma noya felekenyena omhadi yaBileam kekuma, ndele Bileam ta hovele vali oku i denga.
26 Omweengeli waJehova okwa pita po natango, ndele ta ka fikama ponhele opo pehe na omhito yokukandukila kolulyo, ile kolumosho.
27 Eshi ondongi ya mona omweengeli waJehova oya nangala ofimbo Bileam a londa kuyo, na Bileam okwa li a handuka unene nokwa kala ta denge ondongi nodibo yaye.
28 Xuuninwa, Jehova okwa ningifa ondongi i popye,* ndele tai ti kuBileam: “Onde ku ninga shike, opo u denge nge lwoikando aishe oyo itatu?”
29 Bileam okwa nyamukula ondongi, a ti: “Omolwaashi oto nyikifa nge oulai. Ngeno onda li neongamukonda meke lange, ngeno ohandi ku dipaa!”
30 Ondongi oya tya kuBileam: “Nghi fi ondongi yoye hano oyo wa kala ho londo onghalamwenyo yoye aishe fiyo okunena? Onda ungaungile ngoo naave ngaho nande onale?” Okwa nyamukula, a ti: “Ahawe!”
31 Opo nee Jehova okwa pashula omesho aBileam nokwa mona omweengeli waJehova e li ofika mondjila e na eongamukonda meke laye. Onghee okwa twa eengolo nokwe linyongamena pedu.
32 Omweengeli waJehova okwa tya kuye: “Omolwashike wa dengela ondongi yoye lwoikando aishe oyo itatu? Tala, onde uya ndi ku alule, molwaashi olweendo loye oli li omhinge nehalo lange.
33 Ondongi oya mona nge, ndele tai kendabala okuhenuka nge lwoikando oyo itatu. Ngeno kaya li ya henuka nge, ngeno onde ku dipaa, ndele handi efa ondongi i kale nomwenyo.”
34 Bileam okwa tya komweengeli waJehova: “Onda nyona, molwaashi kanda li ndi shi shii ngeenge oove wa fikama mondjila u shakeneke nge. Ashike ngeenge oshii momesho oye, ohandi shuna.”
35 Ndele omweengeli waJehova okwa tya kuBileam: “Inda novalumenhu, ndele oto ka popya ashike eendjovo odo handi ku lombwele.” Opo nee Bileam okwa twikila okuya nomalenga aBalak.
36 Eshi Balak a uda kutya Bileam okwa fika, okwe uya divadiva oku mu shakeneka poshilando shaMoab osho shi li pomunghulo wefilu laArnon peengaba doshitukulwa.
37 Balak okwa tya kuBileam: “Inandi ku tuma u uye kwaame? Omolwashike ino uya kwaame? Mbela oto diladila kutya itandi dulu oku ku tumbalekifa unene?”
38 Bileam okwa nyamukula Balak, a ti: “Onde uya kwoove. Ndele ohandi ka pitikwa ngoo ndi popye sha? Ohandi dulu ashike okupopya odo Kalunga a tula mokanya kange.”
39 Onghee Bileam okwa ya naBalak, ndele tava i kuKiriat-husot.
40 Balak okwa yamba eengobe needi, ndele imwe te i tumine Bileam nosho yo omalenga oo a li naye.
41 Ongula inene Balak okwa kufa Bileam, ndele te mu eta kuBamot-baal, naashi a li oko okwa li e wete ovanhu aveshe.
Eshangelo lopedu
^ Sha hala okutya, Eufrat.
^ Eln., “ova uvika eisho ledu.”
^ Eln., “ova uvika eisho ledu.”
^ Eln., “ondongi yonghadi.”
^ Eln., “okwa patulula okanya kondongi yonghadi.”
