Numeri 28:1-31
28 Jehova okwa lombwela vali Moses, a ti:
2 “Popya nOvaisrael u va lombwele kutya, ‘Shilipalekeni kutya omwa pa nge eyambo lange, omungome wange. Omayambo ange edimba liwa,* oo handi ka yambelwa okupitila momundilo, oku na okuyambwa peufwafimbo lao.’
3 “Va lombwela kutya, ‘Omayambo a yambwa okupitila momundilo, oo mu na okupa Jehova, oo aa: omu na okuyamba exwikiloyambo pandjikilile, eedjona mbali deendume domudo umwe da koshoka, efiku keshe.
4 Odjona imwe yondume otamu i yambe ongula, nodjona ikwao otamu i yambe, eshi taku wiwile,*
5 pamwe noshitimulongo shoefa* shoufila wa nakwa nawa noshitine sho-hin* shomaadi a hengwa i li eendjayambo.
6 Oli li exwikiloyambo tali yambwa pandjikilile, olo la li la yambwa komhunda yaSinai li li edimba liwa,* eyambo olo la yambelwa Jehova okupitila momundilo,
7 pamwe noshikunwayambo shalo, oshitine sho-hin shodjona yondume keshe. Ou na okutila oshikunwa shoshikolwifa monhele iyapuki shi li oshikunwayambo kuJehova.
8 Ou na okuyamba odjona ikwao yondume, eshi taku wiwile.* Ou na oku i yandja neendjayambo da faafana naado wa yandja ongula noshikunwayambo shayo sha faafana to i yandje i li eyambo ledimba liwa* la yambelwa Jehova okupitila momundilo.
9 “‘Ndele mefiku leshabata, oku na okuyambwa eedjona mbali deendume domudo umwe da koshoka noitimulongo ivali yoshiyelekifo shoefa shoufila wa nakwa nawa wa pilulilwa omaadi, i li eendjayambo pamwe noshikunwayambo shado.
10 Olo exwikiloyambo lEshabata pamwe nexwikiloyambo olo hali yambwa pandjikilile noshikunwayambo shalo.
11 “‘Pehovelo lomwedi keshe* omu na okuyandja exwikiloyambo kuJehova leendumetana mbali, odi imwe yondume, needjona heyali deendume da koshoka, keshe imwe yomudo umwe,
12 noitimulongo itatu yoiyelekifo yoefa youfila wa nakwa nawa wa pilulilwa omaadi u li eendjayambo dongobe yomhedi keshe noitimulongo ivali yoiyelekifo yoefa youfila wa nakwa nawa wa pilulilwa omaadi, u li eendjayambo dodi imwe yondume,
13 noshitimulongo shoshiyelekifo shoefa shoufila wa nakwa nawa wa pilulilwa omaadi u li eendjayambo dodjona yondume keshe, di li exwikiloyambo, edimba liwa,* eyambo la yambelwa Jehova okupitila momundilo.
14 Oikunwayambo yavo oi na okukala etata lo-hin yomaviinyu mongobe yomhedi, noshititatu sho-hin modi yondume, noshitine sho-hin modjona yondume. Olo olo eyambo olo ve na okuyandja omwedi keshe momukokomoko womudo.
15 Ope na yo okuyambwa okakombo ke li etimbayambo kuJehova ta ka wedwa pexwikiloyambo olo hali yandjwa pandjikilile pamwe noshikunwayambo shalo.
16 “‘Opaasa yaJehova otai ka kala ko momafiku 14 omwedi wotete.
17 Mefiku eti-15 lomwedi oo, otamu ka kala oshivilo. Omingome inadi ya efulika otadi ka liwa oule womafiku aheyali.
18 Mefiku lotete otamu ka kala oshoongalele shiyapuki. Kamu na nande okulonga oshilonga shidjuu.
19 Omu na okuyandja eendumetana mbali, odi imwe yondume, needjona heyali deendume keshe imwe yomudo umwe, di li exwikiloyambo la yambelwa Jehova okupitila momundilo. Omu na okuyandja oinamwenyo ya koshoka.
20 Omu na oku i yandja pamwe neendjayambo dayo doufila wa nakwa nawa wa pilulilwa omaadi, oitimulongo itatu yoiyelekifo yoefa mongobe yomhedi, noitimulongo ivali yoiyelekifo yoefa modi yondume.
21 Ou na okuyandja oshitimulongo shoshiyelekifo shoefa modjona keshe yondume yomeedjona odo heyali deendume
22 noshikombo shimwe shomudo umwe shi li etimbayambo, opo u kosholwe.
23 Kakele kexwikiloyambo longula, lomexwikiloyambo olo hali yambwa pandjikilile, ou na okuyandja oinima ei.
24 Ou na oku i yandja monghedi ya faafana efiku keshe, oule womafiku aheyali i li eendja,* eyambo la yambwa okupitila momundilo li li edimba liwa* kuJehova. Oli na okuyambwa pamwe nexwikiloyambo olo hali yambwa pandjikilile noshikunwayambo shalo.
25 Omu na okuninga oshoongalele shiyapuki mefiku etiheyali. Kamu na nande okulonga oshilonga shidjuu.
26 “‘Mefiku loiimati oyo ya pya tete, eshi tamu yandje eendjayambo dipe kuJehova, omu na okuninga oshoongalele shiyapuki moshivilo sheni shoivike. Kamu na okulonga nande oshilonga shidjuu.
27 Omu na okuyandja eendumetana mbali, odi yondume needjona heyali deendume, keshe imwe yomudo umwe i li exwikiloyambo ledimba liwa* kuJehova,
28 neendjayambo dao doufila wa nakwa nawa wa pilulilwa omaadi, oitimulongo itatu yoiyelekifo yoefa mongobe yomhedi keshe, oitimulongo ivali yoiyelekifo yoefa modi yondume
29 noshitimulongo shoshiyelekifo shoefa modjona keshe yondume yomeedjona odo heyali deendume
30 nokakombo kamwe ke li etimbayambo, opo mu kosholwe.
31 Omu na oku i yandja tamu i weda pexwikiloyambo olo hali yambwa pandjikilile pamwe neendjayambo dalo. Oinamwenyo oi na okukala ya koshoka pamwe noikunwayambo yayo.
Eshangelo lopedu
^ Ile “tali udifa nawa, tali tulumukifa.” Eln., “tali fuwifa.”
^ Eln., “pokati komaufiku avali.”
^ Oshitimulongo shoefa imwe oshi fike peelita 2,2. Tala Oshiwedelwako B14.
^ O-hin imwe oi fike peelita 3,67. Tala Oshiwedelwako B14.
^ Ile “tali udifa nawa, tali tulumukifa.” Eln., “tali fuwifa.”
^ Eln., “pokati komaufiku avali.”
^ Ile “tali udifa nawa, tali tulumukifa.” Eln., “tali fuwifa.”
^ Eln., “leemwedi deni.”
^ Ile “tali udifa nawa, tali tulumukifa.” Eln., “tali fuwifa.”
^ Eln., “omungome.”
^ Ile “tali udifa nawa, tali tulumukifa.” Eln., “tali fuwifa.”
^ Ile “tali udifa nawa; tali tulumukifa.” Eln., “tali fuwifa.”
