Oilonga yOvayapostoli 3:1-26
3 Petrus naJohannes ova li tava i kotembeli pefimbo leilikano ponhatu* yomutenya lwaapo,
2 ndele opa li omulumenhu a dalwa oshingudu ha humbatwa. Efiku keshe okwa li ha tulwa popepi noshivelo shotembeli osho hashi ifanwa Shawapala, opo a dule okweehela oikwafa kwaavo tava i motembeli.
3 Eshi a mona Petrus naJohannes tava i motembeli, okwa hovela oku va ehela oikwafa.
4 Opo nee Petrus naJohannes ova tala kuye, ndele tava ti: “Tala kufye.”
5 Onghee okwe va dakamena omesho a teelela ve mu pe sha.
6 Petrus okwa ti: “Kandi na oshisilveri noshingoli, ndele ohandi ku pe eshi ndi na. Medina laJesus Kristus Omunasaret, ohandi ku lombwele, enda!”
7 Opo nee Petrus okwe mu kwata meke lokolulyo, ndele te mu fikamifa. Diva eemhadi neemhando daye oda veluka,
8 ndele ta kala ofika, nokwa hovela okweenda pamwe navo va finda motembeli, ta ende ta nhuka nota hambelele Kalunga.
9 Ovanhu aveshe ove mu mona ta ende nota hambelele Kalunga.
10 Ova dimbuluka kutya omulumenhu oo oye winya a li ha kala poshivelo shotembeli osho hashi ifanwa Shawapala, ta ehela oikwafa. Onghee ova li va kumwa neenghono eshi ve mu mona ta ende.
11 Ofimbo omulumenhu oo a li natango e kwete Petrus naJohannes momake, ovanhu aveshe ova tondokela kuvo mOmukala waSalomo, nova li va kumwa neenghono.
12 Eshi Petrus e va mona, okwa tya kuvo: “Ovaisrael nye, omolwashike mwa kumwa eshi omulumenhu ou ta ende, nomolwashike mwe tu kuminwa twa fa ngeno twe shi ninga keenghono detu vene ile molwaashi ashike tu na etilokalunga?
13 Kalunga kaAbraham, Kalunga kaIsak, Kalunga kaJakob naKalunga kootatekulululwa okwa tumbalekifa Omupiya waye Jesus, oo mwe mu yandja nomwe mu lidimbika koshipala shaPilatus, nonande okwa li a hala oku mu mangulula.
14 Omwe lidimbika omuyapuki nomuyuki oo, nomwa indila mu mangululilwe omulumenhu oo a li omudipai,
15 ofimbo mwa dipaifa oo ta ka pefa ovanhu omwenyo. Ndele Kalunga okwe mu nyumuna koufi, notu li eembangi doshinima osho.
16 Ndele okupitila medina laJesus, nokukala tu na eitavelo medina laye, omulumenhu ou mu wete nomu mu shii okwa veluka. Eitavelo letu muJesus olo la ningifa omulumenhu ou a veluke filufilu moipafi yeni.
17 Ovamwatate, ondi shi shii nokutya omwe shi ninga omolwokuhashiiva sha ngaashi ashike ovapangeli veni va ninga.
18 Ndele osho osha ningwa opo ku wanifwe osho Kalunga a xunganeka okupitila movaprofeti aveshe kutya Kristus ota ka hepekwa.
19 “Onghee hano, lidilululeni nokulialuluka omatimba eni a dimwe po, opo Jehova e mu pe ehekeleko
20 noku mu tumine Kristus oo a nangeka po, sha hala okutya Jesus.
21 Jesus oku na okuteelela meulu fiyo osheshi oinima aishe ya ningwa ipe ngaashi Kalunga a xunganeka okupitila movaprofeti vaye vonale ovadiinini.
22 Moses okwa ti: ‘Jehova Kalunga keni ota ka nangeka po omumwaxo umwe mokati keni a ninge omuprofeti ngaashi ame. Pwilikineni kuye mukeshe osho te mu lombwele.
23 Keshe ou* ita pwilikine komuprofeti oo ota ka hanaunwa po filufilu.’
24 Ovaprofeti aveshe okudja komuprofeti Samuel, ova xunganeka shi na sha nefimbo olo.
25 Nye oludalo lovaprofeti novafyuululi vehangano olo Kalunga a udanekela ooxokulululwa eshi a lombwela Abraham a ti: ‘Omapata aeshe kombada yedu otaa ka nangekwa noupuna okupitila moludalo loye.’*
26 Konima eshi Kalunga a nyumuna Omupiya waye, tete okwe mu tuma kunye e mu nangeke noupuna ngeenge keshe umwe womunye okwe lialuluka koilonga yaye ii.”
