Oilonga yOvayapostoli 9:1-43
9 Saul okwa li ta ningile ovahongwa omatilifo nokwa li a halelela oku va dipaa, onghee okwa ya komupristeri munene,
2 ndele te mu pula ku shangelwe eenhumwafo koinagoga yokuDamaskus opo ovalumenhu novakainhu aveshe ovo ta hange ve li mOndjila yOmwene* va mangwe po nova twalwe kuJerusalem.
3 Ofimbo a li mondjila popepi naDamaskus, ohaluka okwa twiywa kouyelele wa twa wa dja meulu,
4 ndele ta wile poshi nokwa uda ondaka tai ti: “Saul, Saul, omolwashike to hepeke nge?”
5 Opo nee okwa pula ta ti: “Omufimanekwa, oove lyelye?” Okwa ti: “Aame Jesus ou to hepeke.
6 Fikama u ye moshilando, opo nee oto ka lombwelwa osho u na okuninga.”
7 Ovalumenhu ovo va li tava ende pamwe naSaul ova li ofika va kumwa eshi va li ve udite ashike ondaka ndele kave wete omunhu.
8 Opo nee Saul okwa fikama po, ndele nonande omesho aye okwa li a pashuka, ka li e wete ko. Onghee ove mu kwata mokwooko nove mu twala muDamaskus.
9 Ndele okwa ninga oule womafiku atatu ehe wete ko, ina lya sha noina nwa.
10 MuDamaskus omwa li omuhongwa wedina Ananias, ndele Omwene okwe mu ifana memoniko ta ti: “Ananias!” Ananias okwa ti: “Aame ou Omwene.”
11 Omwene okwa tya kuye: “Fikama u ye kepandavanda hali ifanwa Yukilila, ndele to i meumbo laJudas to pula omulumenhu wedina Saul wokuTarsus. Tala, ota ilikana
12 nokwa mona memoniko omulumenhu wedina Ananias te uya kuye, ndele te mu tenheke omake opo a twikuluke.”
13 Opo nee Ananias okwa nyamukula ta ti: “Omwene, omulumenhu oo onde mu uda kuvahapu, nonda uda nghee ta hepeke neenghono ovayapuki voye ovo ve li muJerusalem.
14 Omulumenhu oo okwa pewa oufemba kovapristeri ovakulunhu e uye oku a kwate po aveshe ovo tava ifana edina loye.”
15 Omwene okwa tya kuye: “Inda, molwaashi omulumenhu oo onde mu hoolola a udifile oiwana, eehamba nOvaisrael kombinga yange.
16 Ohandi ke mu ulikila filufilu kutya ota ka shakeneka omahepeko e fike peni omolwedina lange.”
17 Ananias okwa ya meumbo laJudas nokwa tenheka Saul omake ndele ta ti: “Omumwatate Saul, Omwene Jesus oo a li e ku holokela eshi wa li mondjila wa finda oku okwa tuma nge ndi uye kwoove opo u twikuluke nou tililwe omhepo iyapuki.”
18 Ndele diva momesho aye omwa dja oinima nokwa twikuluka. Opo nee okwa fikama nokwa ninginifwa,
19 ndele ta li nokwa mona eenghono.
Okwa kala oule womafiku onhumba pamwe novahongwa muDamaskus.
20 Opo nee okwa hovela diva okuudifa moinagoga kombinga yaJesus kutya Omona waKalunga.
21 Ndele aveshe ovo ve mu uda ova li va kumwa nova tya: “Hano omulumenhu ou haye a li ha hepeke ovashikuli vaJesus* muJerusalem? Mbela eshi e uya oku ine uya ko nelalakano loku va kwata po noku va twala kovapristeri ovakulunhu?”
22 Mokweendela ko kwefimbo Saul okwa ka kala e na ouladi nowino muhapu wokuudifa. Okwa li a kumwifa Ovajuda ovo va li muDamaskus eshi e va tomha filufilu kutya Jesus oye Kristus.
23 Eshi pa pita omafiku, Ovajuda ova li va pangela omhangela ve mu dipae.
24 Opo nee Saul okwa uda omhangela yavo. Ndele ova li yo va kelela poivelo yoshilando omutenya noufiku opo va dule oku mu dipaa.
25 Ovahongwa vaye ove mu kulukifila mombululu yekuma loshilando oufiku, e li moshimbaba.
26 Eshi a fika muJerusalem, okwa ninga eenghendabala a waimine ovahongwa, ashike ova li ve mu tila molwaashi kava li va itavela kutya okwa ninga shili omuhongwa.
27 Onghee Barnabas okwe uya, ndele te mu kwafele nokwe mu twala kovayapostoli, ndele te va lombwele nghee Omwene a holokela Saul nokwa popya naye mondjila, nonghee Saul a li a popya nouladi kombinga yedina laJesus muDamaskus.
28 Ndele okwa kala pamwe navo muJerusalem ta ende a manguluka* nota popi nouladi kombinga yedina lOmwene.
29 Okwa li ta popi nokutomhafana nOvajuda ovo hava popi Oshigreka, ndele ova li tava kendabala oku mu dipaa.
30 Eshi ovamwatate ve shi didilika, ove mu twala kuKesarea ndele tave mu tumine kuTarsus.
31 Ndele Ovakriste aveshe muJudea, muGalilea nomuSamaria ashishe ova li ve na ombili nova li va pamekwa. Eshi va kala hava tila Jehova nova kala metwokumwe newiliko lomhepo iyapuki, ova li va hapupala.
32 Petrus okwa li a endaenda noshitukulwa ashishe, nokwa ya yo kovahongwa ovo va li hava kala muLidda.
33 Okwa hanga ko omulumenhu wedina Eneas, oo a kala iha di mombete oule womido hetatu, molwaashi okwa li a fya ombada.
34 Petrus okwa tya kuye: “Eneas, Jesus Kristus okwe ku velula. Fikama, yala ombete yoye.” Opo nee okwa fikama diva.
35 Eshi ovakalimo aveshe vomuLidda novomuSaroni va mona osho sha ningilwa Eneas, ova itavela Omwene.
36 Ndele muJoppa omwa li omuhongwa wedina Tabita, tali ti, “Dorkas.”* Okwa li ha longo oilonga ihapu iwa nokwa li ha kwafele eehepele.
37 Eshi Petrus a li muLidda, Tabita okwa kwatwa kouvela nokwa fya. Opo nee ovahongwa vomuJoppa ova kosha oshimhu shaye nove shi tula monduda yopombada.
38 Molwaashi Lidda osha li popepi naJoppa, eshi ovahongwa va uda kutya Petrus oku li muLidda ova tuma ko ovalumenhu vavali ve ke mu lombwele tava ti: “Ila divadiva kufye.”
39 Opo nee Petrus okwa fikama, ndele ta i pamwe navo. Eshi a fika, ove mu twala monduda yopombada, novafiyekadi aveshe ove uya kuye tava lili noku mu ulikila oikutu ihapu oyo va hondjelwa kuDorkas eshi a li e na omwenyo.
40 Petrus okwa lombwela aveshe va ye pondje opo nee okwa twa eengolo ndele ta ilikana. Okwa pilukila oko ku na oshimhu nokwa tya: “Tabita, penduka.” Tabita okwa pashuka, naashi a mona Petrus, okwa kala omutumba.
41 Okwe mu kwata meke, te mu fikamifa nokwa ifana ovahongwa novafiyekadi ndele te mu yandje kuvo e na omwenyo.
42 Oshinima osho osha shiivika muJoppa ashishe, navahapu ova li va itavela Omwene.
43 Ndele Petrus okwa kala muJoppa oule womafiku manini pamwe naSimon, omushiki woipa.
Eshangelo lopedu
^ Ondjila oyo otai ulike konghalamwenyo yOvakriste nokehongo lavo.
^ Eln., “ovo tava ifana edina eli.”
^ Eln., “te uya mo ye ta di mo.”
^ Edina lOshigreka Dorkas nolOshiaramia Tabita aeshe otaa ti “Omenye.”
