Omapsalme 94:1-23
94 Jehova, Omwene Kalunga kehandu,Omwene Kalunga kehandu, ouyelele woye nau minikile!
2 Omutokoli wedu, fikama.
Shunifila ovalinenepeki osho ve lilongela.
3 Omwene Jehova, fiyo onaini ovakolokoshi,Fiyo onaini ovakolokoshi tava twikile okukala va hafa?
4 Ohava ngongota, nohava popi nelinenepeko;Ovalongi vowii aveshe ohave litange vo vene.
5 Omwene Jehova, ohava nyanyaula oshiwana shoye,Nohava fininike efyuululo loye.
6 Ohava dipaa omufiyekadi nomunailongo,Nohava dipaa ounona ovo vehe na ooxe.
7 Ohava ti: “Jah ke wete ko;Kalunga kaJakob ihe shi didilike.”
8 Nye ovo muhe na eendunge, udeni ko oshinima eshi;Nye omalai, onaini tamu ka ulika kutya omu na eendunge?
9 Oo a shita* okutwi, mbela ke udite ko?
Oo a shita eisho, mbela ke wete ko?
10 Oo ha pukulula oiwana, mbela ita dulu okuyandja outekuduliko?
Oye ha yandje eshiivo kovanhu!
11 Jehova oku shii omadiladilo ovanhu,Kutya oo omufudo wongaho.
12 Omwene Jah, omunhu oo ta kala a hafa oyoo to pukulula,Oo to hongo okudja momhango yoye,
13 U mu pe ombili momafiku oupyakadi,Fiyo osheshi elambo lomukolokoshi la fewa.
14 Osheshi Jehova ita efa po oshiwana shaye,Noita fiye po efyuululo laye.
15 Osheshi etokolo otali ka kala vali li li pauyuki,Naaveshe ovo ovayuki momitima otave ke li shikula.
16 Olyelye ta fikama ponhele yange a kondjife ovakolokoshi?
Olyelye ta fikama ponhele yange a lwife ovalongi vowii?
17 Ngeno Jehova ka li omukwafi wange,Ngeno onda* xula po* diva.
18 Eshi nda ti: “Omhadi yange otai i omufenu,”
Omwene Jehova, ohole yoye i na oudiinini oya twikila okuyambidida nge.
19 Eshi oisho* ya li ya wilila nge po,*Owa hekeleka nge nowa tulumukifa nge.*
20 Mbela olukalwapangelo* loulingilingi otali dulu tuu okukala li na ekwatafano naave,Ofimbo tali etifa oupyakadi medina lomhango?*
21 Ohava ponokele nonyanya omuyuki,*Nomunhu, oo ehe na etimba, ohave mu tokolele efyo.*
22 Ashike Jehova ota ningi ouhondameno wange wa amenwa,*Kalunga kange oye emanya lange leameno.
23 Ota ka alulila oilonga youkolokoshi kombada yavo.
Ote ke va kombolola po* okupitila moilonga yavo ii.
Jehova, Kalunga ketu, ote ke va xulifa po.*
Eshangelo lopedu
^ Eln., “twika.”
^ Ile “omwenyo wange owa.”
^ Eln., “kala melimweneneno.”
^ Ile “omadiladilo taa piyaaneke.”
^ Ile “ya ninga ihapu meni lange.”
^ Ile “Omahekeleko oye okwa tulumukifa omwenyo wange.”
^ Ile “ovapangeli; ovatokoli.”
^ Ile “pashipango.”
^ Ile “omwenyo womuyuki.”
^ Eln., “Nohonde yomunhu, oo ehe na etimba, ohave i tokolele etimba (oukolokoshi).”
^ Ile “eameno la shiya ko.”
^ Eln., “mweneka.”
^ Eln., “mweneka.”
