Omayeletumbulo 16:1-33
16 Omunhu oha longekida omadiladilo omutima waye,*Ashike enyamukulo olo ta yandje* ohali di kuJehova.
2 Eendjila adishe domunhu otadi monika da yuka* pataleko laye,Ndele Jehova oha konakona omalinyengotomheno.*
3 Lineekela Jehova mukeshe osho to ningi,*Noto ka pondola mukeshe osho to ningi.
4 Jehova oha longifa keshe shimwe, opo ehalo laye li wanifwe po,Nota ka shilipaleka kutya ovakolokoshi ova hanaunwa po.
5 Keshe oo e linenepeka momutima oku li oshinima shitondifa kuJehova.
Shilipalekwa* kutya ita kala ina handukilwa.
6 Omolwohole i na oudiinini nosho yo oudiinini, omanyono otaa dimwa po,Nomolwokutila Jehova, umwe ota efa po okulonga owii.
7 Ngeenge Jehova okwa hokwa eendjila domunhu,Oha ningifa nokuli novatondi vaye va pange ombili naye.
8 Oshixwepo okukala u na shinini, ndele oumuyukiPonhele yokukala u na oyuuyemo ihapu, ndele ku fi omuyuki.
9 Omunhu ota dulu okupangela eemhangela momutima waye,Ashike Jehova oye ha yukifa eenghatu daye.
10 Ohamba oi na okuninga omatokolo e li metwokumwe nehalo laKalunga;Kai na okupengifa nandenande ouyuki.
11 Oiyelekifo ya yuka oya dja kuJehova,Nomamanya okuyelekifa aeshe omokandjato oye e a longekida.
12 Eehamba odi tonde oilonga youkolokoshi,Molwaashi olukalwapangelo ola dikwa po la pama pauyuki.
13 Eehamba ohadi hokwa eendjovo douyuki.
Odi hole omunhu oo ha popi oshili.
14 Ehandu lohamba otali dulu okweetifa efyo,Ashike omunaendunge ota dulu oku li loteka.*
15 Ohamba ngeenge oya file umwe onghenda, oha kala e na onghalamwenyo iwa;Onghenda yohamba oya fa oshilemo shodula tashi loko pokulombo.
16 Osha fimana okulikongela ounongo, ponhele yoshingoli.
Okumona eudeko oku dule oshisilveri.
17 Ovo tava ende mondjila youyuki ihava longo owii.
Keshe oo ta pashukile eenghatu daye ota xupifa omwenyo waye.
18 Ounhwa otau etifa ehanauno,Nomhepo yelinenepeko otai eta epunduko.
19 Oshixwepo okukala omulininipiki* mokati kovananheni,Ponhele yokutukulilafana oixuulwa novalinenepeki.
20 Oo ha konakona oinima moule ota ka pondola,*Naao te lineekele muJehova ota kala a hafa.
21 Oo e na eendunge oha kala e na eudeko,Naao ha popi nonghenda* ota dulu okutomha vamwe.
22 Eendunge odo ofifiya yomwenyo kwaavo tave di diinine,Ashike omalai otaa pewa outekuduliko koulai wao.
23 Omunaendunge oha hoolola nawa eendjovo daye,Naasho ta popi ohashi tomho.
24 Eendjovo diwa oda fa eshila lomaadi eenyiki,Dinyenye komwenyo notadi velula omakipa.
25 Ope na ondjila oyo tai monika ya yuka komunhu,Ndele pexulilo otai twala mefyo.
26 Omunhu* oha longo noudiinini, opo a mone sha shokulya,Molwaashi ondjala* otai mu fininike.
27 Omunhu wongaho oha lafulula oinima oyo ihe na oshilonga;Eendjovo daye oda fa omundilo tau lungwinifa.
28 Omhote* ohai etifa okuhaudafana,Nomulundili oha tukaula ookaume kopofingo.
29 Omukolokoshi oha nwefa mo omushiinda shayeNohe mu twala mondjila ya puka.
30 Oha fiike eisho laye, ngeenge ta diladila owii.
Ohe likeshe, ngeenge ta longo owii.
31 Eenghwakutoka odo oshikoroni shewapalo,*Ngeenge tashi hangwa mondjila youyuki.
32 Oo iha handuka diva oku dule omulumenhu omunaenghono,Naau ta pangele ehandu laye* oku dule omulumenhu ta findi oshilando.
33 Oshihoololifo ohashi umbilwa mekolo,Ndele etokolo keshe, olo le likolelela kusho, ohali di kuJehova.
Eshangelo lopedu
^ Eln., “Omunhu oha longekida omutima waye.”
^ Ile “enyamukulo li li mondjila.” Eln., “enyamukulo lelaka.”
^ Eln., “odiwa.”
^ Eln., “eemhepo.”
^ Eln., “Undulila oilonga yoye kuJehova.”
^ Eln., “Eke neke.”
^ Ile “henuka.”
^ Eln., “nomhepo yelininipiko.”
^ Eln., “mona ouwa.”
^ Ile “eendjovo dihokwifa.” Eln., “ounyenye womilungu.”
^ Ile “Omwenyo.”
^ Eln., “okanya.”
^ Ile “Omukengeleledi.”
^ Ile “shefimano.”
^ Eln., “pangele omhepo yaye.”
