1. Nonande Jehova Omukombadambada, okwa pa ovanhu oufembanghenda wokuninga shike?

JEHOVA Omukombadambada. Okwa shita oinima aishe, noku na ounongo neenghono inadi ngabekwa. Konima eshi a li a kwafela Job a ude ko oinima oyo, Job okwa ti: “Ame ndi ku shii nokutya, keshe [shimwe oto] shi dulu ndee iho nyengwa okuwanifa omhangela yoye keshe.” (Job 42:2) Jehova ota dulu okuwanifa po keshe osho a hala nopehe na ekwafo laumwe. Ashike oha ulike ohole eshi a pa ovanhu oufembanghenda wokulonga pamwe naye opo a wanife po elalakano laye.

2. Jehova okwa li a pa Jesus a longe oilonga ya fimana ilipi?

² Omanga ina shita ovanhu ile keshe oshishitwa, Jehova okwa shita Omonamati Jesus. Opo nee Jehova okwa li a pitika Omona waye e mu waimine mokushita oishitwa aishe.  (Johannes 1:1-2, 18) Omuyapostoli Paulus okwa shanga kombinga yaJesus a ti: “Muye omo mwa shitilwa aishe inya yomeulu naai yokombada yedu, ei i wetike naai i he wetike, omalukalwapangelo ile ouhamba, nomapangelo ile omapangelonghono a pama, aishe ya shitilwa muye noye mu shitilwa.” (Ovakolossi 1:15-17) Jehova ka li ashike a pa Omona waye oilonga ya fimana ndele okwa li yo e i lombwela ovanhu. Oo kau fi tuu oufembanghenda munene!

3. Jehova okwa li a pitika Adam a ninge shike, nomolwashike?

³ Jehova okwa pitika yo ovanhu va longe pamwe naye. Pashihopaenenwa, okwa li a pitika Adam a luke oinamwenyo. (Genesis 2:19, 20) Diladila ashike kunghee Adam a li e udite eshi ta wanifa po oshilonga osho! Okwa li a konakona noukeka nghee oinamwenyo i li nomalinyengo ayo, opo nee okwa li a hoolola edina tali wapalele oshinamwenyo keshe. Jehova okwa shita oinamwenyo aishe, onghee hano okwa li ta dulu oku i luka ye mwene. Ashike okwa li a ulikila Adam nghee e mu hole eshi e mu pitika a luke oinamwenyo. Kalunga okwa li yo a pa Adam oshinakuwanifwa shokuninga edu oparadisa. (Genesis 1:27, 28) Ashike lwanima Adam okwa ka efa po okulonga pamwe naKalunga, noshidjemo osha li okumona oixuna kwaye mwene nosho yo kwoludalo laye alishe. — Genesis 3:17-19, 23.

4. Ongahelipi vamwe va dula okulonga pamwe naKalunga opo a wanife po ehalo laye?

⁴ Lwanima Jehova okwa ka pitika ovanhu vamwe vali va longe pamwe naye. Noa okwa li a tunga ongulu yomomeva oyo ye mu xupififa pamwe noukwaneumbo waye pEyelu. Moses okwa li a pitifa mo oshiwana shOvaisrael muEgipti. Josua okwa twala oshiwana shOvaisrael mEdu lEudaneko. Salomo okwa tunga otembeli muJerusalem. Maria okwa ninga ina yaJesus. Ovadiinini aveshe ovo navakwao vahapu ova longa pamwe naJehova opo a wanife po ehalo laye.

5. Omoilonga ilipi hatu dulu okukufa ombinga, na Jehova okwa li ngoo mbela e na oku tu kwatela mo moilonga oyo? (Tala efano pehovelo loshitukulwa.)

⁵ Kunena, Jehova okwe tu pitika tu ninge keshe osho hatu dulu opo tu yambidide Ouhamba waye. Ope na omikalo dihapu omo hatu dulu okulongela Kalunga. Nokuli nonande itatu dulu oku mu longela atushe momukalo wa faafana, atusheni ohatu dulu okuudifa onghundana iwa yOuhamba. Jehova okwa li ta dulu okulonga oilonga ei kuye mwene, kwa li ashike ta dulu okupopya novanhu odikilila okudja meulu. Jesus okwa ti kutya Jehova ota dulu nokuli okulongifa omamanya a lombwele ovanhu kombinga yOhamba yOuhamba waye. (Lukas 19:37-40) Ashike Jehova okwe tu pitika tu kale “ovalongi pamwe” naye. (1 Ovakorinto 3:9) Omuyapostoli Paulus okwa shanga a ti: “Ofye ovalongi pamwe naye ohatu mu kumaida yo, efilonghenda laKalunga mu he li tambule oshimha.” (2 Ovakorinto 6:1) Oshi li oufembanghenda munene okulonga pamwe naKalunga. Natu ka taleni kutya omolwashike okulonga pamwe naKalunga hashi tu etele ehafo linene.

6. Ongahelipi Omona waKalunga woshiveli a ulika nghee a li e udite eshi a li ta longo pamwe naXe?

⁶ Ovapiya vaKalunga ova kala alushe hava mono ouwa eshi tava longo pamwe naye. Manga ine u ya kombada yedu, Omona waKalunga woshiveli okwa ti: “Omwene okwa longekida nge ngaashi wotete . . . ame nda li puye  ngaashi omunongoelela, nda nyakukwa pombada efiku nefiku, ndele nda danauka moipafi yaye alushe.” (Omayeletumbulo 8:22, 30) Eshi Jesus a li ta longo pamwe naXe, okwa li a hafa molwaashi okwa wanifa po oilonga ihapu nokwa li e shi shii kutya Jehova oku mu hole. Ndele mbela ongahelipi shi na sha nafye?

7. Omolwashike oilonga yokuudifa hai tu etele ehafo?

⁷ Jesus okwa ti kutya atushe ohatu kala twa hafa ngeenge hatu yandje ile hatu pewa. (Oilonga 20:35) Oshe tu etela ehafo eshi twa mona oshili, ndele mbela omolwashike hashi tu etele yo ehafo ngeenge hatu i udifile vakwetu? Omolwaashi otu wete kutya ohava kala va hafa ngeenge ova udu ko osho Ombiibeli tai hongo nokuhovela okukala ve na ekwatafano naKalunga. Ohatu kala twa hafa ngeenge tu wete eshi tava lundulula onghedi yavo yokudiladila noyokukalamwenyo. Oilonga yokuudifa oyo ya fimanenena noyo tai tu etele ehafo. Otai ka pefa ovo va ninga ookaume kaKalunga omwenyo waalushe. — 2 Ovakorinto 5:20.

8. Vamwe ova popya shike kombinga yokulonga pamwe naJehova?

⁸ Ngeenge hatu kwafele vakwetu ve lihonge kombinga yaKalunga, otu shi shii kutya ohatu hafifa Jehova nokwa lenga eenghendabala detu eshi hatu mu longele. Naasho ohashi tu etele yo ehafo. (Lesha 1 Ovakorinto 15:58.) Marco wokuItali okwa ti: “Ondi na ehafo lihe fi okuyelekwa nasha eshi ndi shii kutya ohandi longele Jehova shi fike pokudula kwange, ndele hamunhu oo ta dulu okudimbwa osho nda longa.” Franco, oo naye wokuItali, okwa ti: “Jehova ohe tu dimbulukifa keshe efiku okupitila mEendjovo daye nomomafiloshisho makwao, kutya oku tu hole nonokutya keshe osho hatu ningi osha fimana nonande eenghendabala detu otadi monika da fa itadi ti sha kufye. Nomolwaasho okulonga pamwe naKalunga haku tu etele ehafo nosha kwafela nge ndi kale ndi na onghalamwenyo tai ti sha.”

9. Jehova naJesus ova li ve na ekwatafano la tya ngahelipi, nomolwashike?

⁹ Ngeenge hatu longo pamwe naavo tu hole, ohatu ehene popepi navo. Mokweendelako kwefimbo ohatu ka shiiva nawa omaukwatya avo nosho yo omikalo davo. Ohatu lihongo kombinga yomalalakano avo nonghee hava kendabala oku a hanga. Jesus okwa longa pamwe naJehova tashi dulika oule womido omabiliyona. Ohole yavo yokuholafana oya kola nokape na osho tashi dulu oku i nghundipaleka. Jesus okwa popya kombinga yohole yavo eshi a ti: “Ofye naTate umwe.” (Johannes 10:30) Ova li va hangana shili, nova kala hava udafana ngeenge tava longo pamwe.

10. Omolwashike okuudifa haku tu ehenifa popepi elela naJehova nosho yo navakwetu?

¹⁰ Jesus okwa li a pula Jehova a amene ovahongwa vaye. Omolwashike mbela? Okwa li a ilikana ta ti: “Va kale umwe, ngaashi tu li naave.” (Johannes 17:11) Ngeenge otwa kala metwokumwe nomifikamhango daKalunga nokuudifila vakwetu onghundana iwa, ohatu ka uda ko nawa omaukwatya aye a denga mbada. Otwe lihonga kutya omolwashike shi li pandunge oku mu lineekela nokushikula ewiliko laye. Ngeenge otwa ehene popepi naKalunga, ota ka ehena yo popepi nafye. (Lesha Jakob 4:8.) Ohatu ehene yo popepi novamwatate molwaashi ohatu mono ehafo, hatu shakeneke omaupyakadi a faafana notu na omalalakano a faafana. Ohatu hafele pamwe, hatu longo pamwe, nokulididimika pamwe. Octavia wokoBritain, okwa ti: “Okulonga pamwe naJehova osha ningifa nge ndi ehene popepi elela novanhu vakwetu.” Okwa yelifa kutya oukaume waye paife owa kanghamena “kewiliko nokelalakano limwe.” Atusheni osho hatu kala tu udite ngaho. Ngeenge tu wete nghee ovamwatate tava ningi eenghendabala opo va hafife Jehova, ohashi tu ehenifa popepi elela naJehova.

11. Omolwashike hatu ka ehena popepi elela naJehova nosho yo novamwatate mounyuni mupe?

¹¹ Paife ohole yetu yokuhola Kalunga nosho yo ovamwatate oya kola, notai ka kala nokuli ya kola unene mounyuni mupe. Diladila ashike koilonga aishe ihafifa oyo hatu ka longa monakwiiwa! Ohatu ka kala twa hafa okuhambelela ovo tava ka nyumunwa noku va longa kombinga yaJehova. Ohatu ka longa yo edu li ninge oparadisa. Otashi ka kala ehafo linene okulonga pamwe fiyo osheshi twa wanenena tu li koshi yepangelo laKristus. Ovanhu aveshe otava ka kala ve na oukaume navakwao nosho yo naJehova, oo ta ka “palula oinamwenyo aishe kohokwe [yaye].” — Epsalme 145:16.

12. Ongahelipi oilonga yokuudifa i li eameno?

¹² Otwa pumbwa okwaamena ekwatafano letu naJehova. Otu li mounyuni waSatana noinatu wanenena, onghee hano oshipu okutameka  okudiladila nokukatuka eenghatu da fa dounyuni ou. Osho osha faafana nokuyowa momulonga u na omakufikufi madjuu tae tu twalaatwala kombinga oko inatu hala okuyuka. Onghee hano, otu na okulongifa eenghono dihapu opo tu yowe twa yuka kombinga oko twa hala okuyuka. Sha faafana, otu na okulonga twa mana mo opo tuha nwefwe mo kounyuni waSatana. Ndele mbela ongahelipi okuudifa haku tu amene? Ngeenge hatu popi kombinga yaJehova nosho yo Ombiibeli, ohatu yandje elitulemo koinima oyo ya fimana noiwa, ndele hakoinima oyo tai dulu okunghundipaleka eitavelo letu. (Ovafilippi 4:8) Okuudifa ohaku pameke eitavelo letu molwaashi ohaku tu dimbulukifa omaudaneko aKalunga nomifikamhango daye dopahole. Ohaku tu kwafele yo tu diinine omaukwatya oo twa pumbwa opo tu liamene kuSatana nokounyuni waye. — Lesha Ovaefeso 6:14-17.

13. Ondombwedi imwe yokoAustralia oi uditile ngahelipi oilonga yokuudifa?

¹³ Ngeenge otwa kala twe lipyakidila nokuudifa, okukonakona nokuningila vakwetu ouwa meongalo, ohatu ka kala twa amenwa molwaashi itatu kala hatu lipula unene nomaupyakadi etu. Joel wokoAustralia okwa ti: “Oilonga yokuudifa oya kwafela nge ndi kale handi tale ko oinima paushili. Ohai dimbulukifa nge omashongo oo ovanhu hava shakeneke nouwa oo handi mono eshi handi tula moilonga omafinamhango Ombiibeli monghalamwenyo yange. Oilonga yokuudifa oya kwafela nge ndi kendabale okukala omulininipiki nohai kwafele nge ndi lineekele Jehova novamwatate.”

14. Ongahelipi okuhasholola moilonga yokuudifa taku ulike kutya ohatu wilikwa komhepo yaKalunga?

¹⁴ Okuudifa onghundana iwa ohaku tu kwafele tu kale tu na elineekelo kutya omhepo yaKalunga oi li pamwe nafye. Oku shi faneka: Natu tye nee ngeno oilonga yoye okuyandja oikulya kovanhu vomomudingonoko weni. Ashike iho futwa eshi to longo oilonga oyo, nou na okulilandela oipumbiwa yoye ove mwene. Shimwe vali, ovanhu vahapu ovo inava hala oikulya oyo to va pe, navamwe ove ku yele eshi ho va etele oikulya. Mbela fiyo onaini to ka longa oilonga oyo? Mokweendela ko kwefimbo oto ka kala wa teka omukumo, notashi dulika u i efe po filufilu. Nokuli nonande ovanhu otashi dulika tave tu yolo ile va kale ve tu handukila, vahapu vomufye ohatu twikile okukufa ombinga moilonga yokuudifa omudo nomudo, nonande ohashi tu pula efimbo noshimaliwa. Osho otashi ulike kutya omhepo yaKalunga otai tu kwafele.

15. Ongahelipi okuudifa onghundana iwa kwa pambafana nelalakano laKalunga li na sha novanhu?

¹⁵ Ongahelipi oilonga yokuudifa ya pambafana nelalakano laJehova li na sha novanhu? Elalakano laKalunga ola li ovanhu va kale fiyo alushe, ndele natango eshi Adam a nyona inali lunduluka. (Jesaja 55:11) Kalunga okwa ninga omalongekido opo tu mangululwe  moulunde nefyo. Ngahelipi mbela? Jesus okwa li e uya kombada yedu nokuyandja omwenyo waye. Ndele opo ovanhu va mone ouwa meyambo laJesus, ova li va pumbwa okudulika kuKalunga. Onghee hano, Jesus okwa honga ovanhu osho Kalunga a teelela va ninge, nokwa lombwela ovahongwa vaye va ninge sha faafana. Ngeenge hatu udifa nokukwafela vakwetu va ninge ookaume kaKalunga kunena, ohatu longo pamwe naKalunga metwokumwe nelongekido laye lopahole lokuxupifa ovanhu moulunde nefyo.

16. Oilonga yetu yokuudifa oya pambafana ngahelipi noipango yaKalunga oyo ya tongomana?

¹⁶ Ngeenge hatu kwafele ovanhu va mone ondjila oyo tai twala komwenyo waalushe, kungaho ohatu ulike kutya otu va hole notu hole yo Jehova. Jehova okwa “hala ovanhu aveshe va xupifwe nova fike meshiivo loshili.” (1 Timoteus 2:4) Eshi Ovafarisai va li tava pula Jesus kutya oshipango shilipipo shinene, Jesus okwa ti: “Hola Omwene Kalunga koye nomutima woye aushe nomwenyo woye aushe neendunge doye adishe. Oshipango shinene noshotete osho tuu eshi. Noshitivali shi fike pusho, osheshi, Hola omukweni ngaashi ove u lihole mwene.” (Mateus 22:37-39) Ngeenge ohatu udifa onghundana iwa, kungaho ohatu dulika koipango oyo. — Lesha Oilonga 10:42.

17. Ou uditile ngahelipi oufembanghenda wokuudifa onghundana iwa?

¹⁷ Osho kashi fi tuu enangekonoupuna! Jehova okwe tu pa oilonga oyo tai tu etele ehafo, tai tu ehenifa popepi elela naye nosho yo novamwatate, notai amene ekwatafano letu naye. Oilonga oyo ohai tu pe yo omhito yokuulika ohole yetu yokuhola Kalunga nosho yo ovanhu vakwetu. Jehova oku na ovapiya vaye omamiliyona mounyuni aushe, naaveshe ove li meenghalo da yoolokafana. Ndele kashi na nee mbudi kutya otu li ovanyasha ile otwa kulupa, twa hepuluka ile twa hepa, tu na oukolele ile twa nghundipala, atusheni ohatu dulu okulonga shi fike pwaasho hatu dulu tu lombwele vakwetu shi na sha neitavelo letu. Otu udite ngaashi Chantel wokoFrance, oo a ti: “Ohandi kala nda fa ndi udite Kalunga Omushiti nOmunaenghono adishe, ta lombwele nge ta ti: ‘Inda u ka popile nge; popya tashi di komutima. Ohandi ku pe eenghono, Eendjovo dange Ombiibeli, ekwafo tali di pombada, ovalongi pamwe naave vokombada yedu, edeulo tali twikile, nomalombwelo pefimbo tali wapalele.’ Kashi fi tuu oufembanghenda munene okuninga osho Jehova te tu lombwele nokulonga pamwe naye!”