Ovo hava longo noudiinini ihava tila oilonga. Ndele ponhele yaasho, ohava longo noudiinini, opo va wanife po eemhuumbwe davo nokukwafela vamwe, nonande oilonga oyo hava longo oya fa idinifa.

Oushili oyoo kutya, otu na oinakuwanifwa ihapu monghalamwenyo. Mounyuni ou u yadi ovanhu vehe hole okulonga, ovo hava longo noudiinini ohava mono ouwa. — Omuudifi. 3:13.

Reyon okwa ti: “Ngeenge oho longo noudiinini, oho kala u udite etumba noho kala wa mbilipalelwa. Okukala ndi udite nda mbilipalelwa osha kwafela nge ndi kale ndi hole oilonga. Ovo hava longo noudiinini ohava kala yo ve na edina liwa.”

EFINAMHANGO LOMBIIBELI: “Oilonga aishe idjuu otai likolifa.” — Omayeletumbulo 14:23.

Eenghatu tadi shikula otadi dulu oku ku kwafela u kale u na etaleko liwa li na sha noilonga.

Lihonga okuninga oinima monghedi ya yuka. Kutya nee oto wanifa po oinakuwanifwa yoye yomeumbo, oifiilwalonga yokofikola, ile oilonga yokulikongela omboloto, kala we lipaka mo mwaasho to longo. Ngeenge owa shiiva oshilonga shonhumba, kendabala u konge eenghedi omo to dulu okuxwepopala opo u shi longe nondjungu nomeendelelo. Apa ngoo pe fike ounghulungu woye tau hapupala, opo ngoo tapa ka kala pe fike okuhafela oilonga ya tya ngaho.

EFINAMHANGO LOMBIIBELI: “Ngeenge to mono omulumenhu e nomayele mokulonga kwaye; ye ota dulu okukala ofika moipafi yeehamba, hamokulongela ovafyoona.” — Omayeletumbulo 22:29.

Yandja elitulemo koinima oyo ya fimana. Luhapu ngeenge owa kala ho wanifa po oinakuwanifwa yoye nawa, ohashi etele yo vamwe ouwa. Pashihopaenenwa, ngeenge oho longo noudiinini moilonga yomeumbo, ohashi pupaleke yo omutengi wavamwe moukwaneumbo weni.

EFINAMHANGO LOMBIIBELI: “Okuyandja ohaku eta ehafo shi dulife okupewa.” — Oilonga 20:35.

Longa shihapu shi dulife pwaasho wa teelelwa u ninge. Ponhele ashike yokuyandja koxulo yeenyala, kendabala okuningila vamwe shihapu shi dule pwaasho va pula. Kungaho, oto longo she likolelela kwoove mwene, ndele hamolwaashi wa fininikwa, ile molwaashi wa ningilwa ko omatokolo. — Mateus 5:41.

EFINAMHANGO LOMBIIBELI: “Oilonga yoye iwa uhe i longe kefininiko, ndele onehalo liwa.” — Filemon 14.

Kala u na ondjele. Ovo hava longo noudiinini kave na ondede, navali ihava longo tave lidipaele po. Ove na ondjele, hava hafele oilonga yavo youdiinini nosho yo omhito yefudepo.

EFINAMHANGO LOMBIIBELI: “Etulumuko li fike peke li dule eshambekela li yadi oupyakadi nokushikula omhepo.” — Omuudifi. 4:6.