Okukala nelalakano kashi fi ashike okukala wa hala okuninga oshinima shonhumba, ile wa teelela shi ningwe. Okulitulila po omalalakano osha kwatela mo okuliunganeka nawa, okukala ho tifuka nosho yo okukala ho longo noudinini nopehe na okushelemba.

Okuwanifa po omalalakano otashi dulika ku kwate efimbo lixupi, (ngaashi oule womafiku, ile oivike), ile efimbo loshiyeleke, ngaashi (eemwedi), ile oule wefimbo lile, ngaashi (odula ile nokuli shi dulife po). Ashike omalalakano oo haa pula efimbo lile otaa dulu okuwanifwa po to ningi shiengenge oshakati kamwe.

Ngeenge oho wanifa po omalalakano oye, otashi dulu oku ku twa omukumo, okupameka oukaume woye navamwe nokuhapupalifa ehafo loye.

Okukala u na omukumo: Ngeenge owa kala ho litulile po omalalakano manini noku a hanga, otashi ke ku twa omukumo u litulile po aa manene. Ohashi ku tu yo omukumo, u taalele omashongo efiku keshe nomupondo, ngaashi okuheliyandja kenwefemo loomakula.

Okupanga oukaume navamwe: Luhapu ovanhu ohava nanenwa kwaavo have litulile po omalalakano, ovo hava kala ve shii osho va hala nohava kala va tokola oku shi wanifa po. Shikwao vali, onghedi iwa nokupanganga oukaume oyo okulongela kumwe, opo mu wanife po elalakano lonhumba.

Okukala wa hafa: Ngeenge owe litulile po omalalakano noku a wanifa po, oho kala u udite wa pondola.

Christopher okwa ti: “Ondi hole okulitulila po omalalakano. Ohaa kwafele nge ndi kale nde lipyakidila nokukala nda hala oku a wanifa po. Nongeenge owa wanifa po elalakano loye, oho kala u udite nawa filufilu, tashi dulika nokuli u lipopile to ti; ‘Onde shi denga komutwe, nonda wanifa po osho nda li nda tokola.’”

EFINAMHANGO LOMBIIBELI: “Ou ha tale omhepo, ita ka kuna nande; ndele ou ha tale oilemo, ita ka teya nande.” — Omuudifi 11:4.

Katuka eenghatu tadi landula opo u hange omalalakano oye.

A shanga. Liningila omusholondodo womalalakano oo wa hala okuhanga, nokukala wa tokola oku a wanifa po. Hoolola oo wa hala okuwanifa po tete, to a di momukweyo.

Liunganeka. Shi na sha nelalakano keshe, ninga ngaashi tashi landula:

• Litulila po efiku lokondadalunde omo wa hala okulihanga.

• Konakona oinima oyo ya kwatelwa mo.

• Diladila kombinga yomashongo oo tashi dulika u ka shakeneke, nanghee to dulu oku a finda.

Katuka eenghatu. Ino teelela u ongele omauyelele aeshe oo a kwatelwa mo, opo u hovele. Lipula kutya, ‘Oshike ndi na okuninga tete, opo ndi dule okuhanga elalakano lange?’ Opo nee shi ninga. Kala to ningi omadidilikoshango eenghatu odo wa katuka, eshi to ningi exumokomesho.

EFINAMHANGO LOMBIIBELI: “Eemhangela dovadiinini tadi eta ouwa auke.” — Omayeletumbulo 21:5.