KOVANYASHA
10: Okukala omulineekelwa
OSHA HALA OKUTYA NGAHELIPI?
Ovanhu ovo ve shii okulineekelwa ohava kala ve na ekwatafano liwa novadali vavo nosho yo novayandji voilonga. Ohava shikula eemhango, hava kala metwokumwe nomaudaneko avo nohava popi alushe oshili.
OMOLWASHIKE SHA FIMANA?
Peemhito dihapu, oho mono omaufembanghenda onhumba, she likolelela kelineekelo olo we lilongela.
Sarahi okwa ti: “Opo ovadali voye va kale ve ku lineekela, ou na okuulika kutya owa lungama noho wanifa po oilonga yoye; hangeenge ashike ve li po, ndele nongeenge yo vehe po.”
EFINAMHANGO LOMBIIBELI: “Kaleni nokulikonakona mu tale kutya nye ovanhu va tya ngahelipi.” — 2 Ovakorinto 13:5.
OSHO TO DULU OKUNINGA PO
Eenghatu tadi shikula otadi dulu oku ku kwafela, ngeenge owa hala okukala we lineekelwa.
Kala omunashili. Ovanhu itava ka kala ve ku lineekela, ngeenge oho popi oipupulu. Ngeenge oho popi oshili noho dimine omapuko oye, vamwe otava ka kala ve ku lineekela.
Caiman okwa ti: “Ohashi kala shipu okupopya oshili moinima omo we shi endifa nawa. Ndele ovanhu otava ka kala ve ku lineekela unene, ngeenge oho popi yo oshili nokuli nomoinima oyo tashi dulika i ku fife ohoni.”
EFINAMHANGO LOMBIIBELI: ‘Otwa hala okukala ovanashili moinima aishe.’ — Ovaheberi 13:18.
Kala u shii okulineekelwa. Pamakonakono amwe oo a li a ningwa moU.S., otaku ti okudula okulineekelwa osho shimwe shomoinima oyo hai talwa, opo omunhu a dule okukala a kutwa moilonga.” Okukala u shii okulineekelwa paife otashi ku etele ouwa naashi to ende to ningi omukulunhu.
Sarah okwa ti: “Ovadali vange ova didilika kutya ohandi wanifa po oilonga yange yomeumbo nopehe na okulombwelwa ile okudimbulukifwa. Shi fike ngoo apa to i wanifa po nawa, opo ngoo tapa kala pe fike okulineekelwa.”
EFINAMHANGO LOMBIIBELI: “Ondi na elineekelo kutya oto ka ninga ngaashi nda popya, nondi shii kutya oto ka ninga shi dulife pwaasho nde ku lombwela.” — Filemon 21.
Kala omulididimiki. Oshipu okudidilika kutya omunyasha ota ende ta kulu palutu. Ndele ohashi pula efimbo kuvamwe va didilike mo kutya omunyasha ota ende ta ningi omunaendunge nokuninga omatokolo e li mondijila; nomolwaasho ovanyasha ove na okukala ovalididimiki.
Brandon okwa ti: “Ohashi pula efimbo opo ovadali nosho yo vamwe va kale ve ku lineekela. Ashike ngeenge oho wanifa po oinakuwanifwa yoye, mokweendela ko kwefimbo, otava ka kala ve ku lineekela.”
EFINAMHANGO LOMBIIBELI: “Djaleni . . .onheni.” — Ovakolossi 3:12.
Otashi dulika yo u hafele oikundafanwa ei
OUVIDIO VOKOUPELENDE
Ondi na okupopya ngahelipi novadali vange?
Ongahelipi to dulu okupopya novadali voye nokuli nonande ku udite wa hala oku popya navo?
