Eenghedi odo omifikamhango dopaumwene odo omunhu a hoolola okushikula mokukalamwenyo kwaye. Pashihopaenenwa, mbela oho kendabala okukala omunashili moinima aishe? Otashi dulika ho kendabala okufindila eenghedi odo movana voye.

Okukala neenghedi osha kwatela mo omifikamhango da pamba oinima i lili noku lili. Pashihopaenenwa, omunhu oo e na eenghedi oha longo noudiinini, ha longo paushili noha kala e na ko nasha navamwe; omaukwatya oo ha kulike ofimbo munini.

EFINAMHANGO LOMBIIBELI: “Omona woye omumati, mu ikifa ondjila yaye ya yuka, opo nee ita ka yapuka muyo, eshi a kula.” — Omayeletumbulo 22:6.

Mounyuni ou wouteknologi, omifikamhango dopaenghedi oda pumbiwa neenghono. Ina omudali wedina Karyn okwa ti: “Ounona otava dulu okunwefwa mo nai okupitila mongodi efimbo keshe. Otashi dulika nokuli va kale tava tale oinima inai yuka ofimbo ve li pufye.”

EFINAMHANGO LOMBIIBELI: ‘Ava va kula, eendunge davo dokuyoolola oda deulwa, opo va dule okutongola ouwa nowii.’ — Ovaheberi 5:14.

Eenghedi dopokati kovanhu nado oda fimana. Osho osha kwatela mo okukala nomikalo diwa (ngaashi okutya “alikana” nosho yo “tangi”) nosho yo okupitifa ouwa wavamwe komesho; eenghedi da tya ngaho oda pumba movanhu molwaashi ohava yandje unene elitulemo koikwaelektronika ponhele yovanhu.

EFINAMHANGO LOMBIIBELI: “Osho mwa hala ovanhu ve mu ningile, osho mu va ningila yo.” — Lukas 6:31.

Yelifa eenghedi doye. Pashihopaenenwa, omakonakono otaa ulike kutya ovanyasha vahapu ohava henuka okuya momilele komesho yohombo, ngeenge ova yelifilwa kutya elihumbato la tya ngaho ola puka.

OMAETEPO: Longifa oshiningwanima shi li pefimbo opo u kundafane kombinga yeenghedi. Pashihopaenenwa, ngeenge okwe uya eenghundana di na sha nominyonena odo da etifwa koutondwe, oto dulu okutya: “Oshinima shii neenghono onghedi omo ovanhu vamwe hava ulike outondwe. Mbela oto diladila kutya oshike hashi linyengifa ovanhu va kale neenghedi da tya ngaho?”

Brandon okwa ti: “Ohashi kala shidjuu kounona okuyoolola kutya oshinima shonhumba oshi li mondjila ile osha puka, ngeenge inava hongwa kombinga yasho.”

Va honga eenghedi. Nokuli nounona vanini otava dulu okulihonga okutya “alikana,” ile “tangi,” nosho yo okupitifa ouwa wavamwe komesho. Embo Parenting Without Borders ola ti: “Ngeenge ounona ova mono kutya ove li oshitukulwa shoulikumwe wa fimana, ngaashi oukwaneumbo, ofikola ile omudingonoko wonhumba, otashi ke ve linyengifa va ulike olukeno, opo vamwe yo va dule okumona ouwa ngaashi vo.”

OMAETEPO: Kala ho pe ounona voye oinakuwanifwa yomeumbo oyo tai dulu oku va kwafela va kale hava yakula vamwe.

Tara okwa ti: “Ngeenge ounona ove lihongo oilonga yomeumbo paife, itava ka mona shidjuu eshi tava ka kala kuvo vene. Otava ka hangwa nale ve shii okuwanifa po oinakuwanifwa yavo.”