Outumbulilo outekuduliko otau ti okupukulula ile okuhonga. Omafimbo amwe, osha kwatela mo okupukulula, opo okaana ka lundulule onghedi omo hake lihumbata. Ofimbo peemhito dimwe, sha kwatela mo okuyandja edeulo olo tali kwafele okaana ka kale haka ningi omatokolo e li mondjila.

Meedula edi dopaife, outekuduliko otau ende tau kana momaumbo, molwaashi ovadali va tila kutya ounona vavo otava ka kala ve lifya ounye, ngeenge ova kala tave va pe unene outekuduliko. Ashike nande ongaho, ovadali ovanaendunge ohava tula po eemhango di li pandjele nokudeula ovana vavo va dulike kudo.

Pamela okwa ti: “Ounona ova pumbwa okutulilwa po omangabeko mwaasho ve na okuninga, naasho vehe na okuninga, osho tashi ke va kwafela eshi tava ende tava kulu. Ngeenge ounona inava pewa outekuduliko, otava ka ninga omatokolo oo tae ke va etela oilanduliko i nyikifa oluhodi.”

Ino kala ho lundulula eemhango. Ngeenge okaana oka dopa okudulika keemhango, shilipaleka kutya oka mona oilanduliko. Mepingafano naasho, ngeenge oka dulika kudo, ka pandula.

Christine okwa ti: “Ohandi pandula ovana vange omafimbo nomafimbo, eshi hava dulika mounyuni omu outekuduliko wa pumba. Olupandu ohali va kwafele va tambule ko noupu epukululo opo sha pumbiwa.”

EFINAMHANGO LOMBIIBELI: “Osheshi keshe osho omunhu ta kunu osho ta ka teya.” — Ovagalati 6:7.

Kala u na ondjele. Ngeenge to yandje outekuduliko, kaleka momadiladilo omido dokaana, okudula kwako nokutala kutya epuko lako, ola kwata moiti shi fike peni. Outekuduliko otau ka longa ashike, ngeenge okaana oka mono oilanduliko yeenghatu dako. Pashihopaenenwa, ngeenge oka longifa nai ongodi, ota ka dulu okwiikufwa oule wefimbo lonhumba. Pefimbo opo tuu opo, kendabala uha handuke unene, nonande oshinima sha tya ngaho ino shi panda.

Wendell okwa ti: “Ohandi kendabala okutala ngeenge okaana kange oshinima oke shi ningila owina, ile pamwe epuko ashike. Ope na eyooloko la kula pokati kaao ha ningile oinima owina naao ina nongela oshinima nokwa pumbwa epukululo.”

EFINAMHANGO LOMBIIBELI: “Inamu handukifa ovana veni, opo vaha teke omukumo.” — Ovakolossi 3:21; eshangelo lopedu.

Kala omunahole. Ohashi kala shipu kounona okutambula ko outekuduliko, ngeenge ove wete kutya otave u pewa monghedi iwa nosho yo pahole.

Daniel okwa ti: “Ngeenge omonamati wetu a ninga epuko, ohatu mu shilipaleke kutya otu mu hole notwa pandula oinima iwa oyo a ninga monakudiwa. Ohatu mu yelifile kutya, epuko olo ita linyono po ekwatafano letu naye, ndele ponhele yaasho okwa pumbwa ashike okuninga omalunduluko, notwa hala oku mu kwafela a ninge ngaho.”

EFINAMHANGO LOMBIIBELI: “Ohole oi na onheni nolune.” — 1 Ovakorinto 13:4.