Opo u shiive umwe nawa, otashi ka kala pandunge okulihonga kombinga yaasho a pondola nosho yo omashongo oo a finda. Sha faafana, ngeenge owa hala okushiiva Kalunga nawa, owa pumbwa okulihonga kombinga yaasho a ninga. Ngeenge owa ningi ngaho, otashi ke ku kwafela u mone nghee osho a ninga monakudiwa tashi ku etele ouwa, nanghee sha kwatela mo onakwiiwa yoye.

Jehova Kalunga oye Omushiti Munenenene, ‘nomaukwatya aye oo ihaa dulu okumonika kovanhu otaa monika nawa moilonga yaye okudja keshito lounyuni.’ (Ovaroma 1:20, NW) “Oye tuu ou a shita edu neenghono daye mwene, nounyuni e u pameka nounongo waye. Neulu okwe li valela komayele aye.” (Jeremia 10:12) Eshito laye likumwifi otali holola yo kutya oku na ko nasha nafye.

Diladila kunghee Jehova a shita ovanhu monghedi ye likalekelwa ve li “oshifefa shaye.” (Genesis 1:27) Osho osha hala okutya okwe shi ninga tashi shiiva opo tu kale tu na omaukwatya a fa aye monghedi yonhumba. Okwe tu shita hatu dulu okushiiva omataleko aye nosho yo omifikamhango daye. Eshi hatu kendabala okuninga ngaho, ohatu kala twa hafa, nonghalamwenyo yetu ohai kala i na eityo. Natango, okwe shi ningifa tashi shiiva opo tu kale tu na ekwatafano liwa naye.

Ngeenge otwa tale koinima oyo a shita, ohatu ka mona nghee e tu uditile. Omuyapostoli Paulus okwa ti kutya Kalunga “ina kala nande ine liholola, osheshi okwe [tu] monifila ouwa, eshi e [tu] lokifila odula meulu nokwe [tu] pa omafimbo oshishipo nokwa yadifa omitima [detu] oipalwifa nehafo.” (Oilonga 14:17) Jehova ohe tu pe ashishe osho twa pumbwa opo tu dule okukala nomwenyo. Oha yandje oinima ihapu iwa noya yoolokafana opo tu hafele onghalamwenyo. Oo hao ashike omafiloshisho e tu nine, ndele okwe tu lalakanena shihapu.

Jehova okwa shita edu opo ovanhu va dule okukala ko fiyo alushe. Ombiibeli oya ti: “Edu okwe li pa ovana vovanhu,” noina “shita li kale ombuwa, ndelenee okwe li ma li kalwe.” (Epsalme 115:16; Jesaja 45:18) Oolyelye ve na okukala mo, notava kala mo efimbo li fike peni? “Ovayuki, vo otava ka fyuulula oshilongo, ndele tava kala mo alushe.” — Epsalme 37:29.

 Natango, Jehova okwa shita omulumenhu nomukainhu wotete, Adam naEva, ndele te va tula moshikunino kombada yedu opo ‘ve shi longe noku shi kelela.’ (Genesis 2:8, 15) Kalunga okwa li e va pa oinakuwanifwa yopavali poshikando oyo kutya: “Dalafaneni nokuhapupala ndele yadifeni edu.” (Genesis 1:28) Kungaho, Adam naEva ova li tava dulu okuhafela onghalamwenyo ihe na exulilo kombada yedu. Shinyikifa oluhodi, inava dulika kuKalunga naasho oshe va kanififa eteelelo lokukala mokati kaavo “ovayuki,” ovo tava “ka fyuulula oshilongo.” Ashike nande ongaho, ngaashi hatu ka mona, eenghatu davo inadi lundulula elalakano laKalunga li na sha novanhu nosho yo nedu. Tete, natu ka kundafaneni oshinima shimwe vali osho Jehova a ninga.

Ombiibeli oi li Eendjovo daKalunga. Omolwashike Jehova e tu pa Ombiibeli? Etomheno la fimana ololo kutya okwa hala tu lihonge kombinga yaye. (Omayeletumbulo 2:1-5) Oshoshili kutya Ombiibeli inai yandja omanyamukulo komapulo aeshe oo tashi dulika tu na kombinga yaKalunga, nokape na vali embo limwe tali dulu. (Omuudifi 3:11) Ashike keshe osho shi li mOmbiibeli otashi dulu oku tu kwafela tu shiive Kalunga. Ohatu mono kutya ye omunhu a tya ngahelipi mokutala konghedi oyo ha ungaunga novanhu. Ohatu lihongo kutya oku hole noku tonde ovanhu va tya ngahelipi. (Epsalme 15:1-5) Natango, otu shii etaleko laye li na sha nomalongelokalunga, oukoshoki nosho yo oinima yopamaliko. Ombiibeli oye tu pa ouyelele wa yela kombinga yomaukwatya aJehova okupitila meendjovo nomeenghatu dOmona waye, Jesus Kristus. — Johannes 14:9.

Etomheno vali limwe ololo kutya Jehova okwa hala tu shiive nghee hatu dulu okukala twa hafa notu na onghalamwenyo tai ti sha. Okwe tu lombwela okupitila mOmbiibeli nghee omaukwaneumbo taa dulu okukala a hafa, a wanenwa nanghee taa dulu okuungaunga noisho. Ngaashi hatu ke shi mona moshifo eshi, Ombiibeli oi na omanyamukulo komapulo a fimanenena monghalamwenyo, ngaashi: Omolwashike pe na okumona oixuna kuhapu? Onakwiiwa oye tu tuvikilila shike? Osha yelifa yo osho Kalunga a ninga opo a shilipaleke kutya elalakano laye lopehovelo otali wanifwa.

Ombiibeli oi li embo le likalekelwa, nomushangi wayo oKalunga aeke. Oya shangwa oule womido 1 600 da pita kovalumenhu 40, ashike oi na ediladilo limwe molwaashi Kalunga oye Omushangi wayo. (2 Timoteus 3:16) Oya xupa oule womido, ndele hangaashi oilonga imwe yonale. Nonande ovanhu ova ninga eenghendabala okukelela Ombiibeli iha tolokwe, iha nyanyangidwe, iha andjakanekwe nosho yo okuleshwa, eenghendabala davo inadi pondola. Ndele nande ongaho, Ombiibeli olo embo la tandavela mounyuni aushe noya tolokwa momalaka mahapu. Okuxupa kwOmbiibeli oku li oumbangi kutya “ondjovo yaKalunga ketu otai kala po fiyo alushe.” — Jesaja 40:8.

Opo Kalunga a shilipaleke kutya ota ka wanifa po elalakano laye, okwe tu pa efiloshisho le likalekelwa. Ngaashi sha tumbulwa metetekelo, Kalunga okwa li a hala ovanhu va kale nomwenyo fiyo alushe kombada yedu. Ashike eshi Adam a hoolola okuhadulika kuKalunga, okwa nyona nokwa kanifa oufembanghenda wokukala nomwenyo fiyo alushe pamwe noludalo laye alishe. “Ngaashi oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” (Ovaroma 5:12) Eshi Adam a nyona, osha fa ngeno elalakano laKalunga li na sha nedu itali ka wanifwa vali. Ndele mbela Jehova okwa li e linyenga ngahelipi?

Eenghatu odo Jehova a katuka oda li tadi tu kumwe nomaukwatya aye. Okwa tokola Adam naEva pauyuki she likolelela keenghatu davo, ashike okwa ninga elongekido lopahole li na sha noludalo lavo lomonakwiiwa. Omolwounongo waye, okwa ulika nghee ta ka ungaunga nonghalo oyo, nokwa li a yandja ekandulepo loupyakadi oo diva. (Genesis 3:15) Opo tu mangululwe moulunde nefyo, Kalunga okwa tuma Omona waye, Jesus Kristus. Osho osha li sha kwatela mo shike?

 Opo ovanhu va mangululwe meemango daAdam dokuhadulika, Jehova okwa li a tuma Omona waye kombada yedu a honge ovanhu ondjila oyo tai twala komwenyo waalushe “nokuyandja omwenyo waye u ninge oikulila yavahapu.” a (Mateus 20:28; Johannes 14:6) Jesus okwa li ta dulu okuyandja omwenyo waye molwaashi okwa li omulumenhu a wanenena ngaashi Adam. Ashike pakuyelekanifa naAdam, Jesus okwa kala ha dulika filufilu, nokuli fiyo omefyo laye. Molwaashi ka li a wana okufya, Jehova okwa li e mu nyumunina omwenyo womeulu. Paife Jesus ota ningi osho Adam a dopa okuninga, okupa ovanhu ovaduliki eteelelo lomwenyo waalushe. “Osheshi ngaashi kokuhadulika kwomunhu ou umwe ava vahapu va ninga ovalunde, osho yo kokudulika kwaau umwe ava vahapu tava ningi ovayuki.” (Ovaroma 5:19) Kalunga ota ka wanifa po eudaneko laye li na sha novanhu loku ka kala kombada yedu fiyo alushe okupitila mekuliloyambo laJesus.

Ohatu lihongo shihapu kunghee Jehova a li a ungaunga noupyakadi oo wa etifwa omolwokuhadulika kwaAdam. Otwa mona kutya kape na osho tashi dulu oku mu kelela a manife osho a hovela, neendjovo daye otadi ka ‘wanifwa.’ (Jesaja 55:11) Natango, otwe lihonga nghee Jehova e tu hole nohole yomoule. “Omo tuu omo ohole yaKalunga ye tu hololelwa, Kalunga eshi a tuma Omona waye Ewifa mounyuni, opo tu kale tu nomwenyo muye. Opo tuu opo ope nohole, fye eshi twa kala tu hole Kalunga, ndelenee Oye a kala e tu hole nokwa tuma Omona waye a ninge ekulilo lomatimba etu.” — 1 Johannes 4:9, 10.

Kalunga “ina xupifa Omona waye mwene, ndele okwe mu yandja omolwetu atushe,” naasho otashi tu shilipaleke kutya ote ke ‘tu pa aishe’ oyo a udaneka. (Ovaroma 8:32) Kalunga okwa udaneka oku ke tu ningila shike? Opo u mone enyamukulo kepulo olo, twikila okulesha oshitukulwa sha landula ko.