“Onghee hano, kaleni oupafi, osheshi kamu shii efiku novili.” — MATEUS 25:13.

“Kaleni oupafi osheshi kamu shii efimbo olo oinima oyo tai ka ningwa.” — MARKUS 13:33.

Onghee hano, kape na omunhu kombada yedu e shii kondadalunde kutya onaini onghalelo ei yoinima tai ka xula po. Ashike, Kalunga okwa tula po “efimbo,” sha hala okutya, ‘efiku novili’ yokondadalunde, omo exulilo tali ke uya. (Mateus 24:36) Mbela osho sha hala okutya itatu dulu okushiiva nandenande kutya exulilo oli li popepi? Hasho nandenande. Jesus okwa lombwela ovahongwa vaye va tale koiningwanima yonhumba oyo ya li tai ka ulika kutya exulilo oli li popepi.

Oiningwanima oyo oya li tai ka kala edidiliko ‘lomafiku axuuninwa ounyuni ou.’ Jesus okwa ti: “Oiwana otai ka lwifafana, omauhamba otaa ka kondjifafana, notaku ka kala ondjala nomakakamo edu keembinga neembinga.” (Mateus 24:3, 7) Okwa ti yo kutya otaku ka kala ‘omikifi dolutapo,’ ile tu tye omikifi dekomba. (Lukas 21:11) Mbela ou wete oiningwanima oyo Jesus a xunganeka?

Ovanhu kunena otava mono oixuna omolwoita, ondjala, omakakamo edu nosho yo omikifi di lili noku lili. Pashihopaenenwa, mo 2004, ekakamo ledu linene mefuta laIndia, ola li la etifa oshikungulu shinene sha dilila mefuta, osho sha li sha dipaa ovanhu 225 000 lwaapo. Moule weedula nhatu, omukifi oo hau ifanwa o-COVID-19, owa dipaa ovanhu omamiliyona 6, 9 lwaapo mounyuni aushe. Jesus okwa ti kutya oiningwanima ya fa oyo oya li tai ka ulika kutya exulilo oli li popepi.

Ombiibeli oya popya kutya efimbo olo tali tetekele exulilo oli li ‘omafiku axuuninwa.’ (2 Petrus 3:3, 4) Timoteus omutivali 3:1-5 okwa ti kutya, momafiku axuuninwa ovanhu itava ka kala ve na elihumbato liwa. (Tala oshimhungu “ Osho tashi tetekele exulilo lounyuni.”) Mbela oho mono ovanhu kunena ve lihole vovene, ovanalwisho, ovakwanyanya novehe na ohole? Osho otashi yandje yo oumbangi kutya otu li popepi elela nexulilo lounyuni.

Mbela omafiku axuuninwa otaa kala oule wefimbo li fike peni? Ombiibeli otai ti kutya otaa kala ashike “efimbo lixupi.” Opo nee, Kalunga ota ka hanauna po “ovo tava nyono edu.” — Ehololo 11:15-18; 12:12..

Kalunga okwa tula po nale efiku novili omo ta ka eta exulilo longhalelo loinima ei youkolokoshi. (Mateus 24:36) Ndele nande ongaho, ope na onghundana iwa “molwaashi [Kalunga] ina hala nande oumwe a hanaunwe po.” (2 Petrus 3:9) Okwa pa ovanhu omhito ve lihonge kombinga yehalo laye nova dulike kuye. Omolwashike mbela? Omolwaashi okwa hala tu xupe pexulilo lounyuni ou notu ka kale mounyuni waye mupe, eshi edu tali ka kala oparadisa.

Kalunga okwa unganeka oprograma yokuhonga ovanhu mounyuni aushe, opo e va kwafele ve lihonge kutya ongahelipi tava dulu oku ka kala oshitukulwa shounyuni mupe koshi yOuhamba waye. Jesus okwa ti kutya onghundana iwa yOuhamba waKalunga “otai ka udifilwa ounyuni aushe.” (Mateus 24:14) Mounyuni aushe, Eendombwedi daJehova oda longifa eevili omabiliyona avali mo 2019 tadi udifa nokuhonga ovanhu etumwalaka lOmbiibeli li na sha neteelelo. Jesus okwa ti kutya oilonga yokuudifa otai ka longwa mounyuni aushe fimbo exulilo inali uya.

Omapangelo opanhu oku li pokuxula po. Ashike onghundana iwa oyoyo kutya oto dulu okuxupa pexulilo lounyuni noku ka kala mOparadisa kombada yedu oyo Kalunga a udaneka. Oshitukulwa tashi landula otashi ka kundafana nghee to dulu oku ka kala mounyuni oo mupe.