ONGHALAMWENYO kunena ka i li vali ngaashi Kalunga a li a lalakanena. Edu ola li li na okukala ovanhu ovo va fimaneka ounamapangelo wOmushiti, hava mono ouwa mewiliko laye nosho yo hava hopaenene ohole yaye nomaukwatya aye amwe vali mawa. Kalunga okwa li a hala va kale va hafa eshi tava tekula omaukwaneumbo avo, tave lihongo oinima ipe nokuninga edu alishe oparadisa.

• “Ou ta xulifa po oita fiyo okeengaba dedu.” — Epsalme 46:9.

• ‘Efimbo ola fika, ava hava nyono edu, va nyonaunwe po.’ — Ehololo 11:18.

• “Onakukalamo nande umwe ta ti: ‘Aame oshingone.’” — Jesaja 33:24.

• “Ovahoololwa vange ovo vene tava ka shambukilwa oilonga yomake avo.” — Jesaja 65:22.

Omaxunganeko oo otaa ka wanifwa po ngahelipi? Kalunga okwa hoolola Omona waye, Jesus, e li Ohamba yepangelo la wanenena olo tali ka pangela kombada yedu. Epangelo olo, Ouhamba waKalunga. (Daniel 2:44) Ombiibeli oya popya Jesus ya ti: “Kalunga Omwene ote mu pe olukalwa louhamba . . . ndele Ye ota ningi ohamba” — Lukas 1:32, 33.

Eshi Jesus a li kombada yedu, okwa li a longa oikumwifilonga ihapu opo a ulike kutya e li Omupangeli ota ka xwepopaleka onghalamwenyo yovanhu.

• Okwa li a velula omikifi adishe, naasho otashi ulike kutya ota ka xulifa po omaupyakadi aeshe. — Mateus 9:35.

• Okwa li a mweneka oshikungulu, naasho otashi ulike kutya ota ka amena ovanhu mokupangela eenghono domeshito. — Markus 4:36-39.

• Okwa li a palula ovanhu omayovi, naasho otashi ulike kutya ota ka wanifila po ovanhu eemhumbwe davo adishe. — Markus 6:41-44.

• Pohango imwe okwa li a shitukifa omeva omaviinyu, naasho otashi ulike kutya ota ka kwafela ovanhu va hafele onghalamwenyo. — Johannes 2:7-11.

Ongahelipi to dulu okukala nonghalamwenyo oyo Kalunga ta longekidile ovo ve mu hole? Ope na ‘ondjila’ oyo wa pumbwa okweenda. Ombiibeli oya ti kutya ou na okweenda mondjila ya “finana ei tai twala momwenyo, novanini vongaho ovo tave i mono.” — Mateus 7:14.

Ondjila oyo tai twala komwenyo oshike? Kalunga okwa ti: “Aame Omwene Kalunga koye, ou handi ku longo eshi tashi ku wapalele, ndele handi ku  tula mondjila ei u nokweenda nayo.” (Jesaja 48:17) Ngeenge otwa ende mondjila oyo, ohatu ka kala tu na onghalamwenyo ya denga mbada.

Jesus okwa ti: “Aame ondjila noshili nomwenyo.” (Johannes 14:6) Opo tu ehene popepi naKalunga nokukala nonghalamwenyo ya denga mbada, otu na oku itavela oshili oyo Jesus a honga nokushikula oshihopaenenwa shaye.

Ongahelipi to dulu okumona ondjila oyo tai twala komwenyo? Oku na omalongelokalunga mahapu, ashike Jesus okwe tu londwela a ti: “Hakeshe ou ta ti kwaame: ‘Omwene, Omwene!’ ta i mouhamba womeulu, ndelenee oye tuu ou ha longo ehalo laTate womeulu.” (Mateus 7:21) Okwa weda ko vali a ti: “Otamu va koneke koiimati yavo.” (Mateus 7:16) Ombiibeli otai dulu oku ku kwafela u didilike mo elongelokalunga lashili momalongelokalunga oipupulu. — Johannes 17:17.

Ongahelipi to dulu okweenda mondjila oyo tai twala komwenyo? Owa pumbwa okushiiva kombinga yOdjo yomwenyo. Odjo oyo olyelye? Okwa tya ngahelipi? Oshike osho te tu ningile? Okwa hala tu ninge shike? *

Kalunga okwa hala ovanhu va ninge shihapu shihe fi ashike okulonga, okulya, okudanauka nokutekula omaukwaneumbo. Ohatu dulu okushiiva Omushiti wetu nokuninga ookaume kaye. Ohatu dulu okuulika kutya otu mu hole mokulonga ehalo laye. Jesus okwa ti: “Nomwenyo waalushe oo tuu ou, vo ve ku shiive, Oove auke Kalunga kashili.” — Johannes 17:3.

Ngeenge otwa shiiva osho Kalunga a hala tu ninge, otashi ke tu linyengifa tu ninge omalunduluko. Osho kashipu okuninga ngaho. Ashike onghalamwenyo yetu otai ka kala ya denga mbada ngeenge otwa hovele okweenda mondjila oyo tai twala komwenyo. Opo u mone omanyamukulo komapulo e na sha naKalunga, Eendombwedi daJehova otadi dulu okuuya okukonakona Ombiibeli naave pefimbo noponhele oyo tai ku wapalele. Oto dulu okukwatafana nafye ko-www.dan124.com/kj.