1, 2. (a) Yelifa kutya omolwashike eninginifo li li onghatu ya kwata moiti. (b) Omunhu oshike e na okushilipaleka fimbo ina ninginifwa, nomolwashike?

MBELA ou li omunyasha oo a hala oku ka ninginifwa? Ngeenge osho, osho oshi li oufembanghenda munene oo to dulu okukala u na. Ngaashi sha popiwa moshitukulwa sha dja ko, eninginifo oli li oshinima sha kwata moiti. Eninginifo otali ulikile vamwe kutya owe liyapulila Jehova, sha hala kutya owe mu udanekela kutya oto ke mu longela fiyo alushe, nokulonga ehalo laye osho oshinima tashi ka kala sha fimanenena monghalamwenyo yoye. Molwaashi eliyapulo eudaneko la kwata moiti olo omunhu ha udanekele Kalunga, ou na okuninginifwa ashike ngeenge wa kulu pamhepo, tashi di kehalo loye mwene, nou udite ko kutya oku mu liyapulila otashi ti shike.

² Kakele kaasho, otashi dulika u udite kutya ino lilongekida oku ka ninginifwa. Ile u udite we lilongekida oku ka ninginifwa ashike ovadali voye ova hala u teelele u kule, ndele to mono owino monghalamwenyo. Mbela monghalo ya tya ngaho  oto ka ninga po shike? Ino sholola. Ponhele yaasho, longifa efimbo olo u ninge exumokomesho opo uha kwate vali efimbo lile u ninginifwe. Ngeenge owa kaleke osho momadiladilo, oto dulu okulitulila po omalalakano moinima itatu i na sha: (1) naasho she ku tomha ile osho wa itavela (2) neenghatu doye, nosho yo (3) olupandu loye.

3, 4. Oshilihongomwa shilipi ovanyasha tave lihongo kuTimoteus?

³ Diladila kutya ngeno oto ka nyamukula ngahelipi omapulo aa: Omolwashike nda itavela kutya Kalunga oko e li? Omolwashike ndi na oushili kutya Ombiibeli oya dja kuKalunga? Omolwashike handi dulika koipango yaKalunga ponhele yokuhopaenena eenghedi dovakwaunyuni? Omapulo oo otae ku kwafele u dulike komayele omuyapostoli Paulus oo taa ti, ‘Konakoneni ehalo laKalunga olilipi, naashi shiwa, sha wapalela nosha wana.’ (Ovaroma 12:2) Omolwashike u na okuninga ngaho?

⁴ Oshihopaenenwa shaTimoteus otashi dulu oku ku kwafela. Okwa kala e shii Omishangwa nawa molwaashi ina nainakulu ove di mu honga. Ashike Paulus okwa li a lombwela Timoteus a ti: “Kala muei we i longwa ndele u i shii shili.” (2 Timoteus 3:14, 15) Outumbulilo “u i shii shili” otau ulike kokukala wa itavela oshinima shonhumba nowa tomhwa. Onghee hano, Timoteus okwa li a tomhwa kutya oshili otai hangika ashike mOmishangwa. Okwa li a i itavela oshili, hamolwaashi ngeno a lombwelwa kuina ile kuinakulu e shi ninge, ndele omolwaashi a li ha tomhafana kombinga yaasho e lihonga nokwa itavela. — Lesha 1 Ovatessaloniki 5:21.

5, 6. Omolwashike sha fimana okulihonga okukala ho diladila ‘pandunge’ fimbo u li omunyasha?

⁵ Ongahelipi shi na sha naave? Otashi dulika wa shiiva oshili efimbo lile. Ngeenge osho, litulila po elalakano u diladile nawa komatomheno oo e ku ningifa u itavele. Osho otashi ke ku kwafela u pameke eitavelo loye nokuhenuka okuninga omatokolo a puka omolwomafininiko oomakula, etaleko lounyuni ile nokuli omaliudo oye mwene.

⁶ Ngeenge owe lihongo okudiladila ‘pandunge’ omanga u li omunyasha, otashi ke ku kwafela u dule okunyamukula omapulo oo haa pulwa koomakula, ngaashi: ‘Ou shi shii ngahelipi kutya oku na Kalunga? Ngeenge oku tu hole, omolwashike a pitika oukolokoshi u kale po? Ngeenge Kalunga oye a shita oinima aishe, olyelye e mu shita?’ Ngeenge owa kala u na oumbangi woshili we lixwa po, omapulo a tya ngaho itae ke ku limbililika, ndele otashi ke ku linyengifa u konakone Ombiibeli.

7-9. Yelifa nghee o-jw.org tai dulu oku kwafela u kale wa tomhwa kwaasho wa itavela.

⁷ Ngeenge owa kala ho konakona paumwene,  otashi ke ku kwafela u nyamukule omapulo, uha kale nomalimbililo nokukala wa tomhwa filufilu. (Oilonga 17:11) Otu na oishangomwa i lili noku lili oyo tai dulu oku ku kwafela u ninge ngaho. Oishangomwa ngaashi omambo, ouvidio, oifo naikwao ihapu otai hangwa ko-jw.org. Oya nuninwa oku ku kwafela u kale wa tomhwa noi pameke eitavelo loye.

⁸ Molwaashi ou na nale eshiivo lOmbiibeli, otashi dulika u shii nale omanyamukulo omapulo oo e li moikundafanwa oyo. Ndele mbela omanyamukulo oo u na owe a shilipaleka ngoo nawa? Omauyelele oo e li ko-jw.org otae ku kwafele u tomhafane kombinga yomishangwa da yoolokafana notae ke ku kwafela u shiive nghee to dulu okuyelifila vamwe eitavelo loye. Ngeenge oho longifa ointaneta, omolwashike ito i longifa pekonakono loye lopaumwene?

⁹ Ou na okukala wa tomhwa kutya ei oyo oshili. Osho otashi ke ku kwafela u lilongekidile eninginifo. Omumwameme umwe omunyasha okwa ti: “Fimbo inandi tokola okuninginifwa, onda konakona Ombiibeli, ndele handi mono kutya eli olo elongelokalunga lashili. Nefiku keshe, eitavelo lange ohali pame.”

10. Omolwashike Omukriste a ninginifwa a teelelwa a kale e na eitavelo la pama?

¹⁰ Ombiibeli oya ti: ‘Eitavelo, ngeenge kali noilonga, ola fya.’ (Jakob 2:17) Ngeenge owa tomhwa kwaasho wa itavela, oto ke shi ulika meenghatu doye. Oto ka kala u na osho Ombiibeli tai shi ifana ‘oweenda uyapuki wometilokalunga.’ — Lesha 2 Petrus 3:11.

11. Yelifa outumbulilo ‘oweenda uyapuki’ kutya otau ti shike.

¹¹ ‘Oweenda uyapuki’ oshike? Ngeenge eenghatu doye oda koshoka, otashi ulike kutya owa koshoka paenghedi. Pashihopaenenwa, diladila keemwedi hamano da pita. Otashi dulika wa li wa yelekwa u ninge  sha sha puka, mbela owa li ngoo wa diladila nawa shi na sha naasho sha puka naasho shi li mondjila? (Ovaheberi 5:14) Mbela oto dimbuluka efimbo lonhumba kondadalunde eshi wa li wa kondjifa eyeleko ile omafininiko oomakula? Mbela ou li ngoo oshihopaenenwa shiwa kofikola? Oho kala ngoo omudiinini kuJehova ile oho kendabala okukala ngaashi ovanafikola vakweni opo uha yolwe? (1 Petrus 4:3, 4) Oshoshili kutya kape na oo a wanenena. Omafimbo amwe, nokuli naavo va longela Jehova omido dihapu otashi dulika va kale va fya ohoni nohava mono shidjuu okuudifila ovanhu. Ashike omunhu oo e liyapulila Kalunga ota ka kala e udite etumba eshi e li Ondombwedi yaJehova, naasho ohe shi ulike melihumbato laye la koshoka.

12. ‘Oilonga imwe yometilokalunga’ oilipi, notu na oku i tala ko ngahelipi?

¹² ‘Oilonga yometilokalunga’ oshike? Oya kwatela mo oilonga oyo omunhu ha longo meongalo, ngaashi okuya kokwoongala nokuudifa. Oya kwatela mo yo oinima oyo ho ningi paumwene, ngaashi okwiilikana nokukonakona. Omunhu oo e liyapulila Jehova ita ka diladila kutya oilonga ya tya ngaho oi li omutengi. Ota ka kala e udite ngaashi David oo a ti: “Okuwanifa ehalo loye, osho otashi nyakula nge, nomhango yoye oyo ya nyolelwa moule womwenyo wange.” — Epsalme 40:9.

13, 14. Oshike tashi dulu oku ku kwafela u longe ‘oilonga yometilokalunga,’ nongahelipi ovanyasha vamwe va mona ouwa mefiloshisho olo?

¹³ Embo lovanyasha lOshiingilisha Questions Young People Ask—Answers That Work, embo 2, epandja 308-309, oli na oitukulwa oyo tai dulu oku ku kwafela u litulile po omalalakano. Pepandja opo ope na omifinda opo to dulu okushanga omanyamukulo omapulo ngaashi: “Omailikano oye ohaa kala ngoo okondadalunde? Otaa ulike shike shi na sha nohole yoye yokuhola Jehova?” “Oshike ho kwatele mekonakono loye lopaumwene?” “Oho i ngoo u ka udife nonande ovadali voye itava i?” Pepandja olo li na omifinda inadi shangwa, oto dulu okushanga po omalalakano oye oo we litulila po e na sha nokwiilikana, ekonakono lopaumwene nosho yo okuudifa.

¹⁴ Ovanyasha vahapu ovo va hala okuninginifwa ova mona kutya omapandja opo to dulu okushanga ohaa kwafele lela. Omumwameme omunyasha wedina Tilda okwa ti: “Onda kala handi longifa omapandja oo opo ndi shange po omalalakano ange. Omalalakano oo onde ke a hanga koolimwe noolimwe, nonda ka tokola ndi ninginifwe konima yomudo.” Omumwatate omunyasha wedina Patrick naye okwa li a ninga ngaho nokwa pondola. Okwa ti: “Onda kala nale ndi shii kutya omalalakano elipi ndi na okulitulila po. Ashike molwaashi onda li  nde a shanga, osha kwafela nge ndi longe noudiinini opo ndi a hange.”

15. Yelifa kutya omolwashike eliyapulo li na okukala oshinima shopaumwene?

¹⁵ Epulo limwe olo li li mokambo kovanyasha ololo kutya: “Oto ka twikila ngoo okulongela Jehova ngeenge ovadali nookaume koye ova efa oku mu longela?” Ngeenge owe liyapulile Jehova nokuninginifwa, oto ka kala u na ekwatafano lopaumwene naye. Onghee hano, osho to ningile Jehova kashi na okukala she likolelela kovadali voye ile kuumwe e lili. Oweenda woye uyapuki noilonga yometilokalunga otai ka ulika kutya ou li moshili nowa hala okudulika komifikamhango daKalunga. Kungaho oto ka kala wa wana okuninginifwa.

16, 17. (a) Oshike shi na okulinyengifa omunhu a ninge Omukriste? (b) Olupandu lokupandula ekulilo otali dulu okufanekwa nashike?

¹⁶ Efiku limwe, omulumenhu umwe e shii nawa Omhango yaMoses okwa pula Jesus ta ti: “Oshipango shinene shomomhango oshilipi po?” Jesus okwa nyamukula ta ti: “Hola Omwene Kalunga koye nomutima woye aushe nomwenyo woye aushe neendunge doye adishe.” (Mateus 22:35-37)  Jesus okwa li a yelifa nawa kutya ohole yokuhola Jehova oyo i na okulinyengifa omunhu a ninginifwe noku ninge Omukriste. Onghedi imwe omo to dulu okupameka ohole yoye yokuhola Jehova okudiladila nawa shi na sha nekulilo olo li li oshali oyo Kalunga a pa ovanhu. (Lesha 2 Ovakorinto 5:14, 15; 1 Johannes 4:9, 19.) Ngeenge owa ningi ngaho, oto ka kala wa hala okuulika kutya ou na olupandu omolwoshali oyo ya denga mbada.

¹⁷ Olupandu loye li na sha nekulilo otali dulu okuyelekanifwa nonghalo ei: Natu tye nee ngeno oto fi omeva ndele omunhu umwe te uya e ku xupife. Mbela oto ka dja po ashike to i keumbo, to lipushula nawa, ndele to dimbwa osho omunhu oo e ku ningila? Ahowe! Oto ka ulika alushe kutya owa pandula omunhu oo e ku xupifa. Sha faafana, otu na okukala hatu pandula Jehova naJesus omolwekulilo. Ovo ve tu pa omwenyo. Ove tu xupifa moulunde nefyo. Omolwohole yavo yoku tu hola, paife otu na eteelelo loku ka mona omwenyo waalushe mOparadisa kombada yedu.

18, 19. (a) Omolwashike ino pumbwa okukala wa tila okuliyandjela Jehova? (b) Ongahelipi okulongela Jehova taku xwepopaleke onghalamwenyo yoye?

¹⁸ Owa pandula ngoo osho Jehova e ku ningila? Ngeenge osho, osha yuka oku mu liyapulila nokuninginifwa. Okuliyapulila Kalunga okwo oku mu udanekela kutya oto ka longa ehalo laye fiyo alushe. Ndele mbela ou na okukala wa tila okuninga eudaneko la tya ngaho? Hasho. Jehova okwe tu halela osho sha denga mbada, nota ka pa ondjabi ovo tava longo ehalo laye. (Ovaheberi 11:6) Ngeenge owe liyapulila Kalunga nokuninginifwa, onghalamwenyo yoye itai ka naipala, ponhele yaasho otai ka xwepopala. Omumwatate umwe womido 24 oo a ninginifwa fimbo a li omunyasha okwa ti: “Ngeno onda teelelele ndi kule fimbo inandi ninginifwa, otashi dulika ngeno nda ka kala ndi na eudeko lomoule, ashike okuninginifwa okwaamena nge ndiha lalakanene omalalakano ounyuni.”

¹⁹ Jehova okwe ku halela osho sha denga mbada. Ashike Satana oku lihole noke na ko nasha naave. Ke na fiku e ku pe oshinima shiwa ngeenge owe mu shikula. Ongahelipi ta dulu oku ku pa sha ye naye ehe na apa te shi hange? Ke na onghundana iwa, noke na eteelelo lasha. Okwa hala ashike tu ka hanaunwe po ngaashi ye. — Ehololo 20:10.

20. Oshike osho omunyasha ta dulu okuninga opo a xume komesho fiyo e liyapulila Jehova nokuninginifwa? (Tala yo oshimhungu “Osho tashi dulu oku ku kwafela u ninge exumokomesho.”)

²⁰ Okuliyapulila Jehova oku li etokolo la denga mbada olo to dulu okuninga. Mbela owe li lilongekidila? Ngeenge osho, ino tila okuninga eudaneko la tya ngaho. Ndele ngeenge ou wete kutya ino lilongekida, longifa omaetepo oo e li moshitukulwa eshi opo u twikile okuninga exumokomesho. Paulus okwa li a lombwela ovamwaxe vokuFilippi va twikile okuninga exumokomesho. (Ovafilippi 3:16) Ngeenge owa tula moilonga omayele oo, oto ka kala wa halelela okuliyandjela Jehova nokuninginifwa.