LWOPEXULILO laNovemba 1932, moshilandopangelo shaMexico, shedina Mexico City, omwa li mwa ningilwa oshoongalele shopashiwana. Oshivike osho sha tetekela oshoongalele osho, moshilando osho, omo mwa li ovakalimo ve dulife pemiliyona limwe, omwa li mwa tulwa omalobota oshikando shotete. Ashike eshi kwa kundanekwa oshoongalele osho, omadidiliko omeepate okwa li eenghundana dakeshe fiku. Ovatoolinghundana vomoshilando osho ova li va yukifa elitulemo lavo koshoongalele osho sha li pokuningwa. Ova li va longekida omafano avo va teelela poshitaashi sheshina omutalelipo e likalekelwa, Joseph F. Rutherford, oo a li omupresidende wehangano lo-Watch Tower Society. Eendombwedi domoshitukulwa osho oda li de uya okuhambelela omumwatate Rutherford, oo a li e uya koshoongalele shado shomafiku atatu.

Oshifo sho-The Golden Age osha ti: “Oshoongalele osho otashi ka dimbulukiwa mondjokonona shi li oshiningwanima sha fimanenena osho sha ningifa oshili i tandavele morepablika yaMexico.” Nonande koshoongalele oko okwa li ashike ovanhu 150, oshike mbela sha li she shi ningifa shi kale shididilikwedi?

Ofimbo oshoongalele osho inashi ningwa, moMexico omwa li ovaudifi vOuhamba vanini. Okudja mo 1919, omwa li hamu ningwa oyoongalele inini, ndele nande ongaho, omuvalu womaongalo owa enda tau shuna pedu omido da ka landula ko. Mo 1929, eshi moMexico mwa patululwa oshitaimbelewa, okwa li kwa talika kutya otashi ka eta oidjemo iwa. Ashike opa li omaupyakadi. Eshi ovaudifi va li va lombwelwa va efa po okumbwanga eengeshefa mumwe nokuudifa, omulongi wefimbo li yadi umwe okwa li a handuka ndele ta fiye po eongalo noku ka tota po ongudu yaye yokukonakona Ombiibeli. Lwopokati opo, omupashukili woshitaimbelewa okwa ka kala e na elihumbato lihe li metwokumwe nomishangwa nokwa li e nokupingenwa po. Onghee Eendombwedi didiinini moMexico oda li da pumbwa okupamekwa pamhepo.

Eshi omumwatate Rutherford a li ta talele po muMexico, okwa li a yandja oipopiwa ivali itunhula poshoongalele nosho yo itano koradio, oyo ya li tai pameke ovaudifi ovadiinini. Osho osha li oshikando shotete oradio yomoMexico ya andjakaneka onghundana iwa moshilongo ashishe. Konima yoshoongalele, omupashukili woshitaimbelewa mupe okwa li a unganeka nawa oilonga yokuudifa, nEendombwedi didiinini oda li da pamekwa nokunangekwa noupuna kuJehova.

Momudo wa ka shikula ko, moshilongo osho omwa li mwa ningilwa oyoongalele ivali, shimwe osha li sha ningilwa moshilando shaVeracruz nashikwao omuMexico City. Okulonga noudiinini moilonga yomomapya okwa li kwa eta oidjemo iwa. Mo 1931, muMexico omwa li mu novaudifi 82. Konima yomido omulongo, omuvalu oo owa li wa hapupala lwomulongo. Mo 1941, muMexico City omwa li mwa ningwa oshoongalele, nopa li ovanhu 1000 nasha.

Mo 1943, Eendombwedi oda li da shiva ovanhu koshoongalele osho sha li shi na oshipalanyole “Oshiwana sha manguluka,” osho sha li sha ningilwa moilando 12 moMexico. * Ovanhu ova li hava djala omapulakata avali e na oshipalanyole shoshoongalele, limwe oli li komesho  nalimwe okonima. Onghedi oyo oya li hai longifwa kEendombwedi okudja mo 1936.

Oshifo shedina La Nación osha li sha ninga omatyekosha e na sha nanghee onghedi yokulongifa omapulakata hai eta oidjemo iwa, sha ti: “Efiku lotete loshoongalele, Eendombwedi oda li da lombwelwa di shive natango ovanhu vahapu. Ngomongula, ovanhu ova li ve uya momuvalu muhapu nokava li tava wana mo monhele yoshoongalele.” Osho kasha li sha hafifa ongeleka yaKatolika, noya li tai kendabala okuya moshipala Eendombwedi. Nonande ovamwatate novamwameme ova li tava patanekwa, ova li va twikila noshikonga shavo momapandavanda vehe noumbada. Oshifo sho-La Nación osha li sha popya sha ti: “Otwa mona moshilando ashishe . . . ovalumenhu novakainhu tava shivi oshoongalele va djala omapulakata.” Moshifo osho omwa li mu noshitukulwa shi nefano lovamwatate ve li momapandavanda muMexico City. Pedu lefano opa li eshangelo tali ti: “Oshikonga shinene momapandavanda.”

Pefimbo olo, Eendombwedi dihapu oda li di na okuninga omaliyambo manene opo di ka kale poyoongalele oyo ya li hai ningilwa moMexico. Vahapu ova li hava di koitukulwa yokomikunda oyo ye likalela, oko nokuli ka ku neendjila doihauto noihaku fiki omashina. Eongalo limwe ola shanga la ti: “Ongodi yokopala oyo ashike ya pita popepi nomukunda wetu.” Nomolwaasho, ngeenge ovanashiongi tava i koshoongalele ohava i nomanghwili ile va ende oule womafiku opo va ka fike konhele oko tava ka hanga eshina olo tali va twala koshilando oko ku noshoongalele.

Eendombwedi dihapu oda li da hepa, nokada li nokuli tadi dulu okufuta nande olweendo limwe lokuya koshoongalele. Dihapu shimha da fiki, oda li hadi kala nEendombwedi domoshitukulwa odo de di kwafela pahole di kale momaumbo ado. Dimwe oda li hadi nangala mOmalupale Ouhamba. Pomhito imwe, ovanashiongi 90 lwaapo ova li hava di koshitaimbelewa, nova li hava nangala va longekidilwa “oipakete 20 i li momikweyo onga eembete.” Ehokololo limwe lomo-Yearbook ola popya kutya ovanashiongi ovo ve nolupandu ova tile kutya “okunangala poshipakete oshi dulife posamende.”

Molwaashi Eendombwedi odo oda li di nolupandu, oda li da tala ko okwoongala pamwe nOvakriste vakwao poshoongalele kwa fimana ku dule omaliyambo oo da ninga. Kunena, omuvalu wovaudifi moMexico otau ende tau hapupala tau lishilile kemiliyona limwe, sha hala okutya ovanhu otava twikile okuulika olupandu molwoshili. * Mo 1949, olaporta ya dja koshitaimbelewa shaMexico oya popya shi na sha novamwatate ya ti: “Nonande ohava shakeneke omaudjuu, inava efa nande e va teye omukumo, nomolwaasho ohava kala tava popi efimbo noule kombinga yoyoongalele oyo va dana, nohava kala tava pula nodjuulufi kutya, Onaini vali hatu ka kala tu noshoongalele?” Ngaashi ashike olaporta oyo ya popya, nokunena osho shi li ngaho. — Ouyelele wa fimanenena wondjokonona yEendombwedi daJehova moCentral America.