Omuyapostoli Paulus okwa li a shangela omukulunhuongalo mukwao, Timoteus, a ti: “Ohandi ku anifa koshipala shaKalunga, shaKristus Jesus noshovaengeli [ovahoololwa,] u diinine omalombwelo aa nouha tongole ile u ninge omatokolo ofimbo ino konakona oinima aishe.” — 1 Tim. 5:​21, esh.

Tete, natu ka kundafaneni kutya ovaengeli velipi inava kwatelwa mo movaengeli ovahoololwa. Osha yela kutya ovaengeli ovo, inava kwatelwa mwaavo ve li 144 000. Eshi Paulus a shangela Timoteus, Ovakriste ovavaekwa kava li va hovela okunyumuninwa meulu. Ovayapostoli nosho yo ovavaekwa vamwe kava li natango va ninga oishitwa yopamhepo, onghee itava dulu okukala “ovaengeli ovahoololwa.” — 1 Kor. 15:​50-54; 1 Tes. 4:​13-17; 1 Joh. 3:2.

Natango, “ovaengeli ovahoololwa” itava dulu okukala ovaengeli ovo va li inava dulika pefimbo lEyelu. Ovaengeli ovo ova waimina Satana, ndele tava ningi eendemoni, nova li ovatondi vaJesus. (Gen. 6:2; Luk. 8:​30, 31; 2 Pet. 2:4) Monakwiiwa, otava ka umbilwa mombwili, notava ka kala mo oule womido 1 000, nokonima yaasho otava ka hanaunwa po pamwe naSatana. — Jud. 6; Eh. 20:​1-3, 10.

“Ovaengeli ovahoololwa,” ovo va popiwa kuPaulus, ove na okukala ovaengeli ovo ve li meulu, tava yambidida “Kalunga, naKristus Jesus.”

Ope na ovaengeli ovadiinini omayovi mahapu. (Heb. 12:​22, 23) Inatu diladila kutya ovaengeli ohava pewa oinakuwanifwa ya faafana pefimbo la faafana. (Eh. 14:​17, 18) Pashihopaenenwa, Jehova okwa li a pula ashike omweengeli umwe a dipae ovakwaita Ovaasiria 185 000. (2 Eeh. 19:35) Ovaengeli vahapu otashi dulika va pewa oshinakuwanifwa ‘shokukufa mo mOuhamba waJesus ovanhu aveshe ovo hava nyonifa vakwao naavo hava longo oukolokoshi.’ (Mat. 13:​39-41) Vamwe otashi dulika va ka ongele “ovahoololwa vaye,” opo va ye meulu. (Mat. 24:31) Vamwe ohave tu ‘amene meendjila detu adishe.’ — Eps. 91:11; Mat. 18:10; yelekanifa Mateus 4:11; Lukas 22:43.

“Ovaengeli ovahoololwa,” ovo va popiwa mu 1 Timoteus 5:​21, meshangelo lopedu, otashi dulika ovaengeli ovo va li va pewa oshinakuwanifwa she likalekelwa shokufila oshisho omaongalo. Paulus okwa li a pa ovakulunhuongalo omayele e na sha nanghee ve na okuwanifa po oinakuwanifwa yavo nosho yo kutya ovo ve li meongalo ove na oku va fimaneka. Ovakulunhuongalo ove na okuwanifa po oinakuwanifwa yavo nopehe na ‘okutongola ile okuninga omatokolo ofimbo inava konakona oinima aishe.’ Opo nee, Paulus okwe va lombwela etomheno la fimana kutya omolwashike ve na oku shikula omayele aye. Okwa ti kutya ovakulunhuongalo otava yakula ovamwaxe ‘koshipala shaKalunga, shaKristus Jesus noshovaengeli ovahoololwa.’ Ovaengeli vamwe ove na oshinakuwanifwa shokukwafela eongalo, ngaashi okwaamena, okupashukila oilonga yokuudifa nokulombwela Jehova osho va mona. — Mat. 18:10; Eh. 14:6.