OTO dimbuluka efiku olo wa li wa hafa neenghono monghalamwenyo yoye? Mbela osha li efiku wa hombola ile wa hombolwa ile efiku olo wa mona okaana koye koshiveli? Ile pamwe efiku olo wa ninginifwa? Efiku leninginifo olo unene la fimanenena nolihafifa monghalamwenyo yoye. Ovamwatate novamwameme kava li tuu va hafa mefiku olo eshi va mona wa ulika kutya ou hole Kalunga nomutima woye aushe, nomwenyo, nomadiladilo nosho yo neenghono doye adishe! — Markus 12:30.

Nopehe na omalimbililo, okudja eshi wa ninginifwa owa mona ehafo linene eshi to longele Jehova. Ashike ovaudifi vahapu ova kanifa ehafo la tya ngaho. Omolwashike vamwe va kanifa ehafo olo va li ve na okudja peninginifo? Omatomheno elipi tu na oo taa dulu oku tu kwafela tu twikile okulongela Jehova nehafo?

Etumwalaka lOuhamba ohali tu etele ehafo linene. Omolwashike mbela? Omolwaashi Jehova okwa udaneka kutya mafiku Ouhamba otau ka xulifa po ounyuni ou woukolokoshi nokweeta ounyuni mupe. Sefanja 1:14 otai ti: “Efiku linene lOmwene oli li popepi! Heeno, popepi li li, ndee tali endelele okufika!” Ashike ngeenge otu udite kutya efiku olo ola kala ko, ohatu dulu okukanifa ehafo olo twa li tu na. Okukala tu udite ngaho otaku dulu oku tu ningifa tu longe shinini moilonga yaJehova. — Omayeletumbulo 13:12.

Ngeenge tu li novamwatate novamwameme, ohatu kala tu udite twa pamekwa tu twikile okulongela Jehova nehafo. Elihumbato liwa loshiwana shaJehova ohali tu nanene kelongelokalunga lashili nohali tu kwafele tu twikile oku mu longela nehafo. (1 Petrus 2:12) Ndele mbela oshike tashi dulu okuningwa po ngeenge omumwatate ile omumwameme wonhumba okwa pewa outekuduliko molwaashi ina dulika koipango yaKalunga? Osho otashi dulu okuteya vamwe omukumo meongalo nokukanifa ehafo lavo.

Ohole yokuhola omaliko nayo otai dulu oku tu kanififa ehafo letu. Ngahelipi mbela? Ounyuni waSatana otau kendabala oku tu nwefa mo tu kale tu udite kutya otu na okulilandela oinima oyo inatu pumbwa naanaa. Onghee hano, inatu dimbwa eendjovo daJesus edi tadi ti: “Kaku na ou ta dulu okukalela oovene vavali; osheshi ota tondo umwe, ye e hole omukwao, ile a hokwa ou ndee ta dini winya. Kamu dulu okukalela Kalunga nemona.” (Mateus 6:24) Itatu dulu okulongela Jehova nehafo ngeenge ohatu kendabala okulikongela keshe shimwe mounyuni ou.

Okulongela Jehova kashi fi omutengi kwaavo ve mu hole. (1 Johannes 5:3) Dimbuluka kutya Jesus okwa ti: “Ileni kuame, nye amushe hamu longo nomwa lolokifwa, Ame ohandi mu pe etulumuko. Litwikeni ondjoko yange nye mu lilonge kuame, osheshi Aame omunambili momutima onde lininipika; ndee tamu limonene eemwenyo deni etulumuko. Osheshi ondjoko yange iwa nomutengi wange omupu.”  (Mateus 11:28-30) Okukala Omukriste washili otashi tulumukifa nohashi tu etele ehafo. Nopehe na omalimbililo, otu na omatomheno okukala hatu hafele oilonga yaJehova. Paife natu ka kundafaneni atatu omuo. — Habakuk 3:18.

Ohatu longele Omuyandji womwenyo, Kalunga kehafo. (Oilonga 17:28; Epsalme 104:31) Otu shii kutya Kalunga oye Omushiti wetu oo e tu pa omwenyo. Onghee hano, otu na okutwikila oku mu longela nehafo, kashi na nee mbudi kutya opa pita omido ngapi okudja eshi twa ninginifwa.

Diladila kuHéctor, oo a longela Jehova e li omupashukili omweendi oule womido 40. Natango ota longele Jehova nehafo ‘nonande okwa kulupa.’ (Epsalme 92:13-15) Ouvela womukulukadi waHéctor owa ya moshipala omalipyakidilo aye e na sha noilonga yaJehova, ashike ina kanifa ehafo laye. Okwa ti: “Nonande oshinyikifa oluhodi okumona ounghundi womukulukadi wange tau naipala noshi li eshongo oku mu fila oshisho, inandi efa nande osho shi nyone po ehafo lange mokulongela Kalunga kashili. Okukala ndi shii kutya Jehova oye a pa nge omwenyo, nokwa shita omunhu nelalakano, oshe linyengifa nge ndi kale ndi mu hole neenghono noku mu longela nomutima aushe. Ohandi kala nde lipyakidila moilonga yokuudifa nokukaleka momadiladilo eteelelo lOuhamba opo ndiha kanife ehafo lange.”

Jehova okwa yandja ekuliloyambo olo le shi ningifa tashi shiiva opo tu kale nonghalamwenyo ihafifa. Oshoshili kutya, ‘Kalunga okwa kala e hole ounyuni, Oye a yandja Omona waye Ewifa, opo keshe ou te mu itavele a ha kane, ndelenee a kale e nomwenyo waalushe.’ (Johannes 3:16) Onghee hano, ohatu dulu okudiminwa po omatimba etu noku ka mona omwenyo waalushe ngeenge otwa kala tu na eitavelo moshali yekuliloyambo oyo Kalunga e tu pa pahole. Osho oshi li lela etomheno la denga mbada lokukala twa hafa. Olupandu letu li na sha nekulilo otali ke tu linyengifa tu longele Jehova nehafo.

Omumwatate wokuMexico wedina Jesús okwa ti: “Onda kala handi lidipaele po unene koilonga molwaashi omafimbo amwe ohandi longo omalutaima nonande kasha li tashi dengele. Onda kala ashike handi shi ningi opo ndi mone oimaliwa ihapu. Opo nee onda li nde lihonga kombinga yaJehova nonghee a yandjela ovanhu Omona waye. Onda kala nda halelela oku mu longela. Lwanima eshi nde liyapulila Jehova, onda li nda tokola ndi efe po oilonga mehangano omo nda longa oule womido 28, ndele handi i moilonga yefimbo li yadi.” Omumwatate Jesús osho a li a hovela ngaho okulongela Jehova nehafo.

Otu na onghalamwenyo ya koshoka paenghedi, naasho ohashi tu etele ehafo. Mbela oto dimbuluka kutya onghalamwenyo yoye oya li ya tya ngahelipi fimbo ino shiiva Jehova? Omuyapostoli Paulus okwa li a dimbulukifa Ovakriste vomuRoma kutya ova “li ovapiya voulunde” ndele ova ninga “ovapiya  vouyuki.” Molwaashi ova li ve na onghalamwenyo ya koshoka, ova kala ve na eteelelo lomwenyo waalushe. (Ovaroma 6:17-22) Nafye otu na okudulika komifikamhango daJehova opo tuha kale nenyeme olo hali di mokukala nelihumbato inali koshoka ile melongifo leenghono. Osho kashi hafifa tuu!

Diladila kuJaime oo a li ina itavela muKalunga, a itavela moevolusi nokwa li omudengingonyo. Jaime okwa li a hovela okuuya kokwoongala nokwa li a kuminwa ohole yoshiwana shaJehova. Opo a efe po onghalamwenyo yaye ikulu, Jaime okwa li a pula Jehova e mu kwafele opo a kale e na eitavelo muye. Okwa ti: “Mokweendela ko kwefimbo onda ka mona kutya oku na Tate omunahole nomunanghenda. Okudulika komifikamhango daJehova douyuki osha kala eameno kwaame. Ngeno kanda li nda lundulula okukalamwenyo kwange, ngeno onda dipawa nale ngaashi ookaume kange ovo navo va li ovadengingonyo. Omido odo nda longela Jehova odo ashike nda kala nda hafa monghalamwenyo yange.”

Otu na okukala tu udite ngahelipi omanga twa teelela exulilo longhalelo ei younyuni woukolokoshi? Dimbuluka kutya ohatu longo ehalo laKalunga notwa teelela omwenyo waalushe. Onghee hano, “mokulonga ouwa inatu lolokeni, osheshi efimbo ngenge la fika, hatu ka teya yo, ngenge itatu loloka.” (Ovagalati 6:8, 9) Kekwafo laJehova, natu lididimikeni, natu longeni noudiinini opo tu kulike omaukwatya oo tae tu kwafele tu ka xupe “momahepeko manene” ile tu tye poudjuu munene nokutwikila okulongela Jehova nehafo. — Ehololo 7:9, 13, 14; Jakob 1:2-4.

Ohatu dulu okukala nelineekelo kutya Jehova ote ke tu pa ondjabi omolwelididimiko letu molwaashi oku shii oilonga oyo hatu longo nohole oyo hatu mu ulikile. Ngeenge otwa twikile okulongela Jehova nehafo, ohatu ka kala tu udite ngaashi omupsalme David oo a ti: “Alushe ohandi kwatele Omwene koshipala shange; eshi Ye e li kolulyo lange, ihandi tengauka. Onghee tuu omutima wange u nehafo, nomwenyo wange tau nyakukwa, nolutu lange tali tulumukwa mombili.” — Epsalme 16:8, 9.