Mary nosho yo omushamane waye, John, a ove li moshilongo omo mu yadi ovanhu va dja koPhilippines nohava udifile ovanhu ovo onghundana iwa. Pefimbo lomukifi wekomba o-COVID-19, Mary ka li ashike ha konakona Ombiibeli novanhu vomoshilongo shavo, ndele okwa li yo a hovela navamwe vokoilongo imwe. Okwe shi enda ngahelipi?

Mary okwa li ha pula ovakonakonimbiibeli vaye ta ti: “Mbela ou shii vamwe ovo va hala okukonakona Ombiibeli?” Ngeenge ova nyamukula tava ti heeno, Mary okwa li he va pula ve mu kwafele opo a kwatafane navo. Okupula epulo olo li li paunafangwa, luhapu ohaku eta oidjemo iwa. Omolwashike? Omolwaashi ovanhu ovo ve na olupandu lEendjovo daKalunga luhapu ohava kala va hala okulombwela ovapambele vavo nookaume kavo kombinga yaasho tave lihongo. Mbela osha eta oidjemo ilipi, eshi Mary a pula epulo olo?

Omukonakonimbiibeli waMary, Jasmin, okwa li e mu pa ovanhu vane ovo va li va hala okukonakona Ombiibeli. Umwe womuvo, Kristine, okwa li ha hafele ekonakonombiibeli laye neenghono, onghee okwa li a pula Mary va kale hava konakona luvali moshivike. Eshi Mary a pula Kristine ngeenge oku shii umwe oo a hala okukonakona Ombiibeli, Kristine okwa li a nyamukula a ti: “Heeno, ope na ookaume kange.” Konima yoivike inini, Kristine okwa li a pa Mary ookaume kaye vane ovo va li va hala okukonakona. Lwanima, Kristine okwa ka pa vali Mary ookaume kaye ovo va hala okukonakona Ombiibeli. Vamwe vomuvo ova li va yandja omadina aavo va li va hala okukonakona.

Kristine naye okwa li a hala oukwaneumbo waye, oo u li koPhilippines, u konakone Ombiibeli. Onghee okwa li a popya nomonakadona waye, Andrea. Potete, Andrea okwa li ta diladila kutya, ‘Eendombwedi odi li elongelokalunga loipupulu, inadi itavela muJesus nohadi longifa ashike Etestamenti Likulu.’ Ashike konima eshi a konakona oshikando shotete, okwa didilika kutya osho a li ta diladila kombinga yEendombwedi osha puka. Pefimbo lekonakonombiibeli laye, ngeenge e lihonga sha shipe, okwa li ha popi ta ti: “Molwaashi osha popiwa mOmbiibeli, oshi na okukala shoshili!”

Lwanima, Andrea okwa li a pa Mary ookaume kaye vavali nosho yo omunailonga pamwe naye, nova li va hovela okukonakona. Natango vali, shimwe osho Mary a li ehe shii, ina omumwaina waxe yaAndrea, Angela oo a li omupofi, okwa li ha kala ta pwilikine ngeenge ooAndrea tava konakona. Opo nee efiku limwe, Angela okwa li a pula Andrea a pule Mary a konakone naye Ombiibeli. Angela okwa li e hole osho te lihongo. Meni ashike lomwedi umwe, okwa li a koneka omishangwa dihapu, nokwa li a hala a kale ta konakona lune moshivike.  Kekwafo laAndrea, Angela okwa li a hovela okukala ha kala pokwoongala pandjikilile okupitila paintaneta.

Eshi Mary a didilika kutya omushamane waKristine, Joshua, okwa li alushe ha kala e li popepi ngeenge tava konakona, Mary okwa li e mu pula ngeenge naye okwa hala oku va waimina. Joshua okwa ti: “Ohandi kala po ashike handi pwilikine, ndele ino pula nge omapulo; ngeenge owa pula nge, ohandi ke mu fiya po.” Meni ashike lominute nhano eshi va hovela okukonakona, Joshua oye a li a pula omapulo mahapu e dule Kristine, nokwa li a hala okutwikila okukonakona Ombiibeli.

Mary okwa li a mona ovakonakonimbiibeli vahapu, molwaashi ashike a pula epulo li li paunafangwa. Okwa li a ninga omalongekido, opo vahapu vomuvo e va yandje po kovamwatate novamwameme. Mary okwa li a hovela okukonakona Ombiibeli novanhu 28 moilongo ine ya yoolokafana.

Jasmin, omukonakonimbiibeli oo a tumbulwa tete moshimoniwa eshi, okwa ninginifwa muAprili 2021. Kristine okwa ninginifwa muMei 2022 nokwa shuna koPhilippines a ka kale pamwe noukwaneumbo waye. Ovakonakonimbiibeli vavali, ovo Kristine a li a pa Mary, navo ova ninginifwa. Konima yeemwedi dinini eshi Kristine a ninginifwa, Angela naye okwa ka ninginifwa noku li omukokolindjila wondjikilile paife. Omushamane waKristine, Joshua, omonakadona wavo, Andrea, nosho yo ovakonakonimbiibeli vamwe otava ningi exumokomesho.

Pefimbo lovayapostoli, onghundana iwa oya li hai tandavele meendelelo pokati kovapambele nosho yo ookaume. (Joh. 1:​41, 42a; Oil. 10:​24, 27, 48; 16:​25-33) Omolwashike mbela ito pula ovakonakonimbiibeli voye nosho yo ovo ve na ohokwe epulo olo kutya, “Mbela ou shii vamwe ovo va hala okukonakona Ombiibeli?” Ngeenge owa pula epulo olo li li paunafangwa, otashi dulika naave u ka mone vahapu ovo va hala okukonakona Ombiibeli.