MBELA owa didilika ngoo kutya ovanhu vahapu kunena ove udite kutya ove na okuungaungiwa navo monghedi ye likalekelwa nove na okupewa oinakuwanifwa ye likalekelwa? Ngeenge va ungaungiwa navo monghedi ye likalekelwa, ohava kala va teelela okuningilwa shihapu. Ovanhu va tya ngaho ove lihole vovene noihava kala ve na olupandu laasho ve na. Ombiibeli oya popya kutya ovanhu osho tava ka kala ngaho momafiku axuuninwa. — 2 Tim. 3:2.

Omhepo yokuliholamwene oya dja nale. Pashihopaenenwa, Adam naEva ova li va tokola okuhoolola kuvo vene kutya oshike shiwa naasho shii, nohatu mono oixuna atushe omolwetokolo lavo. Oshihopaenenwa shimwe vali, oshaUssia ohamba yaJuda. Okwa li ta diladila kutya oku na okupitikwa a xwike oitwiminifo motembeli, ashike ka li nande e na oufemba wokuninga ngaho. (2 Omaf. 26:​18, 19) Sha faafana, Ovafarisai nOvasadukai ova li ve udite kutya Kalunga oku na okuungaunga navo monghedi ye likalekelwa, molwaashi va dja mepata laAbraham. — Mat. 3:9.

Ovanhu vahapu kunena ove lihole vovene, noikala yavo ya tya ngaho otai dulu oku tu nwefa mo. (Gal. 5:26) Otashi dulika tu hovele okudiladila kutya otwa pumbwa okupewa oshinakuwanifwa shonhumba, ile kutya vamwe ova pumbwa okuungaunga nafye monghedi ye likalekelwa. Ongahelipi hatu dulu okuhenuka okudiladila kwa tya ngaho? Otwa pumbwa okuuda ko kutya Jehova okwa tala ko ngahelipi oikala yokuliholamwene. Omafinamhango Ombiibeli avali otae ke tu kwafela.

 Jehova oye ha tokola osho tu na okupewa. Natu ka tale koihopaenenwa imwe.

• Shi na sha nelongekido loukwaneumbo, Jehova okwa hala ovashamane va kale ve udite kutya ova fimanekwa kovakulukadi vavo, novakulukadi va kale ve udite kutya ove holike kovashamane vavo. (Ef. 5:33) Jehova okwa ti kutya ovo va hombola ovo ashike ve na okuulikilafana ohole oyo hai kala pokati kovalihomboli. (1 Kor. 7:3) Ovadali ova teelela ovana vavo va kale hava dulika kuvo, nounona ova teelela okukala ve holike nohava yambididwa kovadali vavo. — 2 Kor. 12:14; Ef. 6:2.

• Jehova okwa ti kutya otu na okufimaneka ovakulunhuongalo omolwoilonga yavo youdiinini. (1 Tes. 5:12) Ashike pefimbo opo tuu opo, ovakulunhuongalo kave na okupangela ovamwatate novamwameme. — 1 Pet. 5:​2, 3.

• Kalunga okwa pa omapangelo opanhu oufemba wokupula ovapangelwa vavo va fute oifendela nokudulika kuvo. — Rom. 13:​1, 6, 7.

Jehova ohe tu pe pahole osho inatu wana okupewa. Molwaashi otwa fyuulula oulunde kuAdam, otwa wana okufya. (Rom. 6:23) Ashike nonande ongaho, molwaashi Jehova oku tu hole okwe tu pa omanangeko noupuna mahapu. (Eps. 103:​10, 11) Enangeko noupuna keshe, ile oshinakuwanifwa osho te tu pe, ohe shi tu pe omolwefilonghenda laye. — Rom. 12:​6-8; Ef. 2:8.

Kala wa lungamena omhepo younyuni ou. Nopehe na oku shi didilika, otashi dulika tu hovele okudiladila kutya otwa pumbwa okupewa shihapu tu dule vamwe. Jesus okwa li a ulika kutya oshipu okudiladila ngaho, eshi a longifa efaneko li na sha novanailonga ovo va li va pewa odenari imwe. Ovanailonga vamwe ova li va longa efiku alishe metokopyo lomutenya, ofimbo vamwe ova li ashike va longa oule wovili. Ovo va li mongudu yotete ova li ve udite kutya ove na okupewa ondjabi ihapu, molwaashi ova longa efiku alishe. (Mat. 20:​1-16) Jesus okwa li a longifa efaneko olo, opo a ulikile ovashikuli vaye kutya ova pumbwa okukala va wanenwa kwaasho Kalunga te va pe.

Kala u na olupandu, ino komangela. (1 Tes. 5:18) Hopaenena omuyapostoli Paulus. Nonande okwa li ta dulu okupula ovamwaxe vomuKorinto  ve mu pe osho a pumbwa, ka li e shi ninga. (1 Kor. 9:​11-14) Otwa pumbwa okukala tu na olupandu laasho hatu pewa kuvamwe, nokuhenuka omhepo yokukomangela.

Kala omulininipiki. Omunhu oo e linenepeka oha kala e udite kutya okwa pumbwa okupewa shihapu shi dulife pwaasho e na nale. Elininipiko otali ke tu kwafela tu henuke okudiladila kwa tya ngaho.

Omuprofeti Daniel okwa tula po oshihopaenenwa shiwa shi na sha nelininipiko. Okwa li a dja moukwaneumbo wa fimana, e na ondjelo iwa, owino nounongo. Onghee okwa li ta dulu okukala e udite kutya okwa wana okuungaungiwa naye monghedi ye likalekelwa, ile okupewa oinakuwanifwa. (Dan. 1:​3, 4, 19, 20) Ashike Daniel okwa li a twikila okukala omulininipiki, noukwatya oo owe mu ningifa a kale e na ondilo momesho aJehova. — Dan. 2:30; 10:​11, 12.

Natu henuke omhepo yokuliholamwene oyo i li mounyuni kunena. Ndele hatu twikile okuhafela omanangeko noupuna oo Jehova he tu pe omolwefilonghenda laye.