1, 2. Oshiningwanima sha denga mbada shomo 2018 shilipi tashi ka hanganifa ovanhu, nomolwashike? (Tala efano pehovelo loshitukulwa.)

OSHIWANA shaKalunga naavo ve na ohokwe otava ka ongala pamwe opo va dane edano lokomudo lOuvalelo wOmwene, eshi etango tali hovele okuningina, mo 31 Marsa 2018. Ovanhu omamiliyona otava ka ongala pamwe opo va dane Edimbuluko lefyo laKristus shimha etango la ningine. Edimbuluko oli li oshiningwanima shihokwifa osho hashi hanganifa ovanhu mounyuni aushe omudo keshe.

² Natu diladile kunghee Jehova naJesus hava kala va hafa ngeenge ve wete ovanhu omamiliyona mounyuni aushe ve li poshiningwanima osho she likalekelwa fiyo osheshi efiku la pwa ko. Ombiibeli oya kala nale ya xunganeka kutya, “ongudu inene ya nyengana okuvalwa yomoiwana aishe nomomaludi aeshe novomovanhu aveshe novomomalaka aeshe” otai ka ingida tai ti: “Exupifo olaKalunga ketu nolOdjona, ou e li omutumba kolukalwapangelo.” (Eh. 7:9, 10) Kashi fi tuu oshinima shiwa eshi Jehova naJesus hava fimanekwa monghedi ya tya ngaho pEdimbuluko lokomudo!

3. Oshitukulwa eshi otashi ka nyamukula omapulo elipi?

 ³ Opa holoka omapulo amwe oo taa ka nyamukulwa moshitukulwa eshi. (1) Ongahelipi hatu dulu okulilongekidila Edimbuluko pauhandimwe noku ka mona ouwa mokukala pulo? (2) Omeenghedi dilipi Edimbuluko hali kwafele mokuhanganifa oshiwana shaKalunga? (3) Ongahelipi hatu dulu okuyambidida oukumwe oo pauhandimwe? (4) Mbela Edimbuluko onali ka xule po ngoo? Ngeenge osho, onaini mbela?

4. Omolwashike sha fimana kufye okukala pEdimbuluko ngeenge otashi shiiva?

⁴ Diladila nghee sha fimana okukala pEdimbuluko. Dimbuluka kutya okwoongala oku li oshitukulwa shelongelokalunga letu. Jehova naJesus ohava didilike aveshe ovo hava ningi eenghendabala opo va kale pokwoongala oko kwa fimanenena kwokomudo. Otwa hala va mone kutya opo hatu ka kala pEdimbuluko, shapo ongeenge pa holoka oupyakadi wopalutu ile onghalo inai shi pitika. Ngeenge otwa ulike okupitila meenghatu detu kutya okwoongala okwa fimana kufye, ohatu ka pa Jehova etomheno la wedwa po lokukaleka omadina etu ‘membo lokudimbulukwa’ nosho yo “membo lomwenyo,” oo e na omadina aavo tava ka mona omwenyo waalushe. — Mal. 3:16; Eh. 20:15.

5. Fimbo efiku lEdimbuluko inali fika, ongahelipi hatu dulu ‘okuliyeleka fye vene, ngeenge otu li meitavelo’?

⁵ Fimbo efiku lEdimbuluko inali fika, ohatu dulu okulitulila po efimbo lokwiilikana nokukonakona noukeka ekwatafano letu naJehova. (Lesha 2 Ovakorinto 13:5.) Ongahelipi hatu dulu oku shi ninga? ‘Omokuliyeleka fye vene, ngeenge otu li meitavelo.’ Opo tu ninge ngaho, oshiwa okulipula kutya, ‘Mbela onda itavela ngoo shili kutya ondi li oshitukulwa shehangano olo Jehova a hoolola li wanife po ehalo laye? Mbela ohandi ningi ngoo eenghendabala da mana mo opo ndi udife nokuhonga onghundana iwa yOuhamba? Mbela eenghatu dange ohadi ulike ngoo shili kutya onda itavela kutya aa omafiku axuuninwa nonokutya exulilo lepangelo laSatana oli li poduka? Mbela ondi na ngoo natango elineekelo muJehova naJesus la fa olo nda li ndi na eshi opo nde liyapulila Jehova Kalunga?’ (Mat. 24:14; 2 Tim. 3:1; Heb. 3:14) Okudilonga komanyamukulo omapulo a tya ngaho otaku ke tu kwafela tu ulike kutya otu li metwokumwe naasho twe lihonga.

6. (a) Ongahelipi hatu dulu oku ka mona omwenyo waalushe? (b) Ongahelipi omukulunhuongalo umwe he lilongekidile Edimbuluko omudo keshe, nongahelipi to dulu okuninga sha faafana?

⁶ Lesha nokudilonga kouyelele wopamishangwa oo tau popi efimano lEdimbuluko. (Lesha Johannes 3:16; 17:3.) Opo tu ka mone omwenyo waalushe, otwa pumbwa ‘okushiiva’ Jehova ‘nokwiitavela’ mOmona waye ewifa, Jesus. Opo u lilongekidile Edimbuluko, mbela omolwashike ito hoolola oitukulwa imwe yokukonakonwa oyo tai dulu oku ku kwafela u ehene popepi naJehova nosho yo naJesus? Natu ka taleni koshihopaenenwa shomumwatate umwe oo kala omukulunhuongalo efimbo lile. Oule womido, okwa kala ha ongele oitukulwa yOshungonangelo oyo tai popi kondadalunde kombinga yEdimbuluko nosho yo ohole oyo Jehova naJesus ve tu ulikila. Oivike oyo ya tetekela Edimbuluko, oha leshulula oitukulwa oyo nokudilonga kombinga yefimano lEdimbuluko. Oha weda mo oshitukulwa shimwe ile ivali omafimbo amwe. Omukulunhuongalo oo okwa mona kutya okuleshulula oitukulwa oyo nosho yo okulesha nokudilonga kelesho lOmbiibeli lEdimbuluko ohe lihongo oinima ipe omudo keshe. Osho sha fimanenena oshosho kutya, ohole yaye yokuhola Jehova naJesus ohai kulu omudo keshe. Onghedi ya tya ngaho yokukonakona otai dulu oku ku kwafela u kulike olupandu nosho yo ohole yoye yokuhola Jehova naJesus naasho otashi ke ku kwafela u mone ouwa pauyadi pEdimbuluko.

7. (a) Jesus okwa li a ilikana kombinga yashike moufiku oo a dika po Ouvalelo wOmwene? (b) Oshike tashi ulike kutya Jehova okwa li a nyamukula eilikano laJesus?

⁷ Oufiku oo Jesus a dika po Ouvalelo wOmwene, okwa li a ilikana kutya ovashikuli vaye nava kale va hangana nova hafele oukumwe oo ye naXe va lenga. (Lesha Johannes 17:20, 21.) Jehova okwa li a nyamukula eilikano lOmona waye, nopaife ovanhu omamiliyona ova itavela kutya Jehova okwa li a tuma Omona waye. Ngaashi ashike okwoongala keshe kwoshiwana shaKalunga, Edimbuluko ohali yandje oumbangi uhe fi okulidimbikwa kutya Eendombwedi daJehova oda hangana shili. Ovanhu vomoiwana ihapu novomomaludi aeshe ohava ongala pamwe peenhele dokwoongalela mounyuni aushe. Moitukulwa imwe, okwoongala pamwe pelongelokalunga kwomihoko da yoolokafana inaku udika nale ile vamwe ve ku yemba. Ashike oukumwe wa tya ngaho owa wapala momesho aJehova naJesus.

8. Jehova okwa li a pa Hesekiel etumwalaka lilipi li na sha noukumwe?

⁸ Tu li oshiwana shaJehova, ihashi tu kumwifa eshi hatu hafele oukumwe. Jehova okwa kala nale eshi xunganeka. Diladila ketumwalaka olo a li a pa omuprofeti Hesekiel li na sha nokutula kumwe oiti ivali, oshiti ‘shaJuda’ nosho yo ‘shaJosef.’ (Lesha Hesekiel 37:15-17.) Oshitukulwa “Omapulo a dja kovaleshi” shi li mOshungonangelo ya Juli 2016, osha yelifa sha ti: “Jehova okwa yandja kuHesekiel etumwalaka leteelelo ta udaneke okuhanganifwa kwoshiwana shaIsrael konima eshi sha li tashi ka alulilwa kEdu lEudaneko. Etumwalaka olo ola li yo la xunganeka okuhanganifwa kwoshiwana shaKalunga oko kwa hovela momafiku axuuninwa.”

9. Ongahelipi ewanifo lexunganeko laHesekiel hali limonikila omudo keshe pEdimbuluko?

⁹ Okudja momudo 1919, Jehova okwa li a hoolola nokuhanganifa ovavaekwa oshikando shotete, ovo va li tava fanekwa koshiti ‘shaJuda.’ Eshi ovo ve na eteelelo lokukala kombada yedu, ovo tava fanekwa koshiti ‘shaJosef,’ va enda tava hapupala ova waimina ovavaekwa, neengudu odo mbali oda ninga “oshuunda shimwe.” (Joh. 10:16; Sak. 8:23) Jehova okwa li a udaneka kutya ota ka tula kumwe oiti oyo ivali, ndele tai ningi shimwe meke laye. (Hes. 37:19) Eengudu adishe paife ota di longo pamwe koshi yewiliko lOhamba, omutumbalekwa Jesus Kristus, oo a popiwa mexunganeko taku ti kutya “omupiya wange David.” (Hes. 37:24, 25) Oukumwe u na ondilo oo wa popiwa muHesekiel ohau limonikila omudo keshe eshi oshixupe shovavaekwa nosho yo ‘eedi dimwe’ hadi ongala pamwe di dane Edimbuluko lefyo laKristus. Oshike hatu dulu okuninga pauhandimwe opo tu dule okukaleka po nokuxumifa komesho oukumwe?

10. Ongahelipi hatu dulu okuxumifa komesho oukumwe mokati koshiwana shaKalunga?

¹⁰ Onghedi imwe omo hatu dulu okuxumifa komesho oukumwe woshiwana shaKalunga omokukulika elininipiko. Eshi Jesus a li kombada yedu, okwa li a ladipika ovahongwa vaye va kale ova lininipiki. (Mat. 23:12) Ngeenge otu va lininipiki momutima, itatu ka nwefwa mo komhepo younyuni yelinenepeko. Ponhele yaasho, elininipiko letu otali tu kwafele tu dulike kwaavo tava kwatele komesho, nomhepo yeduliko oya pumbiwa opo eongalo li kale moukumwe. Komesho yaaishe, elininipiko letu otali ka hafifa Kalunga oo “ha tondo ovalinenepeki, ndele ovalininipiki te va file onghenda.” — 1 Pet. 5:5.

11. Ongahelipi okudilonga keityo lomadidiliko oo haa longifwa pEdimbuluko haku tu kwafele tu xumife komesho oukumwe?

¹¹ Onghedi itivali omo hatu dulu okuxumifa komesho oukumwe meongalo omokudilonga  keityo lomadidiliko oo haa longifwa pEdimbuluko. Omafiku oo a tetekela oufiku oo we likalekelwa naunene tuu oufiku oo, diladila moule kombinga yefimano lomungome inau ya onhafi nomaviinyu matilyana. (1 Kor. 11:23-25) Omungome otau faneke eyambo lolutu laJesus lihe na etimba, nomaviinyu otaa faneke ohonde yaye oyo ya tika. Otwa pumbwa okukala tu na eudeko lashili leityo lomadidiliko oo. Dimbuluka kutya ekuliloyambo laKristus ola kwatela mo ohole ya tongomana oyo Jehova e tu ulikila eshi a yandja Omona waye ponhele yetu nosho yo oyo Jesus e tu ulikila eshi a yamba po omwenyo waye nehalo liwa omolwetu. Okudilonga kohole yavo otashi ke tu linyengifa tu kale tu va hole. Ohole yaJehova oyo hatu hafele pamwe novaitaveli vakwetu oya fa ongodi oyo ye tu mangela kumwe nohai tu pameke tu kale moukumwe.

12. Ongahelipi Jesus a yelifa kutya Jehova okwa teelela tu kale hatu dimine po vamwe mefaneko laye li na sha nohamba oyo ya li tai valula oikolo?

¹² Onghedi onhinhatu omo hatu dulu okuxumifa komesho oukumwe omokudimina po vamwe nehalo liwa. Ngeenge ohatu dimine po vamwe ovo ve tu udifa nai, ohatu ulike kutya otwa pandula ekuliloyambo laKristus olo le shi ningifa tashi shiiva tu diminwe po omatimba etu. Diladila kombinga yefaneko limwe laJesus olo li li muMateus 18:23-34. Lipula kutya, ‘Mbela ohandi linyengifwa ngoo ndi tule moilonga osho Jesus a honga? Mbela ohandi ulike ngoo elididimiko nokuuda ko Ovakriste vakwetu? Onde lilongekida ngoo okudimina po vamwe ovo va udifa nge nai pauhandimwe?’ Oshoshili kutya omafimbo amwe ohashi kala shidjuu kovanhu inava wanenena okudimina po vamwe ovo ve va udifa nai ile va nyona sha kwata moiti. Ashike efaneko olo otali tu hongo osho Jehova a teelela tu ninge. (Lesha Mateus 18:35.) Jesus okwe shi yelifa nawa kutya Jehova ite ke tu dimina po ngeenge ihatu dimine po ovamwatate, ngeenge ope na etomheno loku shi ninga. Osho itashi hekeleke tuu! Ohatu amene nokukaleka po oukumwe wetu u na ondilo ngeenge hatu dimine po vamwe ngaashi Jesus e tu honga tu ninge.

13. Ongahelipi okuulika kutya otu li ovanambili haku xumifa komesho oukumwe?

¹³ Ngeenge hatu dimine po vamwe, ohatu  ulike kutya fye ovanambili. Dimbuluka omayele omuyapostoli Paulus oo a ti kutya natu kale twa hala “shili okudiinina oukumwe mOmhepo omekwamo lombili lokumanga kumwe.” (Ef. 4:3) Pefimbo lEdimbuluko, unene tuu moufiku wEdimbuluko, diladila moule shi na sha nanghee ho ungaunga navamwe. Lipula kutya, ‘Mbela ohandi ulike ngoo kutya ihandi kwatele vamwe onghone? Mbela onda shiivika ngoo handi xumifa komesho ombili noukumwe?’ Oo omapulo a fimanenena twa pumbwa okulipula pefimbo eli lomudo.

14. Ongahelipi hatu dulu okuulika kutya ohatu “lididimikilafana mohole”?

¹⁴ Onghedi onhine omo hatu dulu okuxumifa komesho oukumwe omokuulika ohole hatu hopaenene Jehova, oo e li Kalunga omunahole. (1 Joh. 4:8) Inatu hala nande okupopya shi na sha novalongelikalunga vakwetu kutya, “Ondi na okukala ndi va hole nonande kandi na lela onghwa navo.” Okudiladila ngaho oku li omhinge nomayele aPaulus oo kutya natu kale “nokulididimikilafana mohole.” (Ef. 4:2) Didilika kutya ina tya ashike natu kale “nokulididimikilafana,”ndele okwa weda ko kutya otu na oku shi ninga “mohole.” Ope na eyooloko. Momaongalo etu omu na ovanhu vomaludi aeshe ovo Jehova a nanena kuye. (Joh. 6:44) Jehova oku na okukala e va hole, molwaashi oye e va nanena kuye. Mbela ope na ngoo umwe womufye ta dulu okutokola kutya ovalongelikalunga vakwetu inava wana okukala tu va hole? Katu na okungungunina ohole oyo Jehova e tu lombwela tu ulike. — 1 Joh. 4:20, 21.

15. Otu shi shii ngahelipi kutya otaku ka kala Edimbuluko laxuuninwa?

¹⁵ Efiku limwe Edimbuluko otali ka danwa oshikando shaxuuninwa. Otu shi shii ngahelipi? Eshi Paulus a shangela Ovakorinto onhumwafo yaye yotete, okwa shangela Ovakriste ovavaekwa kutya mokudimbuluka efyo laJesus omudo keshe, otava “hepaulula efyo lOmwene fiyo ote uya.” (1 Kor. 11:26) Oshitya “uya” pomhito ei otashi ulike koshiningwanima sha faafana “neuyo” olo Jesus a popya mexunganeko laye li na sha nefimbo lexulilo. Jesus okwa popya shi na sha noudjuu munene oo tau ke uya, a ti: “Edidiliko lOmona wOmunhu tali monika keulu, opo nee oiwana aishe yedu tai lilaana; ndele tai ka mona Omona wOmunhu te uya kombada yoilemo yeulu e neenghono dihapu noshinge; ndele [Jesus] ta tumu ko ovaengeli vaye ve nomanghuma e neendaka dopombada, ndele tava ongele ko ovahoololwa vaye keembinga nhee, okominghulo deulu fiyo okudikwao.” (Mat. 24:29-31) ‘Okwoongelwa kwovahoololwa’ okwa yukifa kefimbo olo eshi Ovakriste ovavaekwa aveshe ovo ve li natango kombada yedu tava ka pewa ondjabi yavo yomeulu. Osho otashi ka ningwa konima ngeenge oshitukulwa shotete shoudjuu munene sha piti po, ashike ofimbo oita yaHarmagedon inai hovela. Opo nee aveshe 144 000 otava ka kufa ombinga pamwe naJesus mokufinda eehamba dokombada yedu. (Eh. 17:12-14) Edimbuluko laxuuninwa olo tali tetekele okwoongelwa kwovavaekwa vaye meulu olo tali ka kala laxuuninwa Jesus e ‘uye.’

16. Omolwashike wa tokola toko oku ka kala pEdimbuluko omudo ou?

¹⁶ Natu kale twa tokola toko opo tu ka mone ouwa pEdimbuluko olo tali ka kala ko mo 31 Marsa 2018. Natu pule Jehova e tu kwafele tu twikile okuyambidida oukumwe woshiwana shaye. (Lesha Epsalme 133:1.) Dimbulukwa kutya, efiku limwe Edimbuluko itali ka kala vali hali danwa. Fimbo twa teelela natu ninge ngaashi hatu dulu opo tu ka kale po, nokukala twa lenga oukumwe oo tau ka ulikwa pEdimbuluko.