1. Omuyapostoli Paulus okwa li a dimina shike?

OMUYAPOSTOLI Paulus okwa li a dimina kutya omafimbo amwe okwa li ha kala a nghundipala. Okwa li e shii kutya olutu laye otali “nyonauka po,” nokwa li e na okukendabala opo a longe osho sha yuka, na Jehova ka li alushe ha nyamukula omailikano aye monghedi omo a li a teelela. (2 Kor. 4:16; 12:7-9; Rom. 7:21-23) Paulus okwa li yo e shii kutya ovatondi vaye ove mu tala ko e li omunghundi. * Ashike ka li a pitika etaleko lii lavamwe ile ounghundi waye mwene u mu ningife a kale e udite ehe na oshilonga. — 2 Kor. 10:10-12, 17, 18.

2. Metwokumwe 2 Ovakorinto 12:9, 10, oilihongomwa ya fimana ilipi Paulus e lihonga?

² Paulus okwe lihonga oilihongomwa ya fimana kutya omunhu ota dulu okukala omunaenghono nonande okwa nghundipala. (Lesha 2 Ovakorinto 12:9, 10.) Jehova okwa lombwela Paulus kutya eenghono daYe otadi dulu oku mu ‘pameka ngeenge a nghundipala,’ sha hala okutya eenghono daJehova oda li tadi ka pameka Paulus. Tete, natu ka taleni kutya omolwashike tuhe na okuhanduka ngeenge ovatondi vetu tave tu tuku.

3. Omolwashike tu na okukala twa hafa ngeenge hatu tukwa?

³ Kape na oo e hole okutukwa. Ashike ngeenge ovatondi vetu tave tu tuku ohatu kala hatu lipula unene shi na sha naasho va popya, nohashi tu teya omukumo. (Omayel. 24:10) Otu na okukala twa tala ko ngahelipi omatukano ovapataneki vetu? Ngaashi Paulus, ohatu dulu okukala twa ‘hafa ngeenge hatu tukwa.’  (2 Kor. 12:10) Omolwashike mbela? Omolwaashi omatukano nosho yo omapataneko otaa ulike kutya fye otu li ovahongwa vaJesus vashili. (1 Pet. 4:14) Jesus okwa popya kutya ovashikuli vaye otava ka hepekwa. (Joh. 15:18-20) Naasho osho sha li sha ningilwa Ovakriste vomefelemudo lotete. Vahapu ovo va li va nwefwa mo keputuko lOshigreka ova li va tala ko Ovakriste kutya ovanhu vongaho inava hongwa nova nghundipala. Ovakriste vamwe Ovajuda ovo va li va talika ko ovanhu vongaho “inava hongwa,” ongaashi omuyapostoli Petrus naJohannes. (Oil. 4:13) Ovakriste ohava monika va nghundipala molwaashi inava nwefwa mo keepolotika, nokave na etangakwaita leameno, naasho osho sha ningifa ovanhu va kale ve va tala ko ve li ovanhu vongaho.

4. Ovakriste votete ova li ve linyenga ngahelipi ketaleko lii olo la etifwa kovapataneki vavo?

⁴ Mbela Ovakriste vonale ova li va efa etaleko lii lovapataneki vavo li va ye moshipala? Ahowe. Pashihopaenenwa, omuyapostoli Petrus naJohannes ova li ve shi tala ko shi li efimano okuhepekwa eshi tava shikula Jesus nokuudifa omahongo aye. (Oil. 4:18-21; 5:27-29, 40-42) Ovahongwa kava li ve na etomheno lokukala va fya ohoni. Nonande ovanhu vomomudingonoko kava li va fimaneka Ovakriste vomefelemudo lotete, ova li va ninga shihapu opo va kwafele ovanhu vakwao. Pashihopaenenwa, omambo a nwefwa mo oo a shangwa kOvakriste ovo otaa twikile okukwafela ovanhu omamiliyona opo va kale ve na eteelelo. Ova kala tava udifa kombinga yOuhamba oo tau pangele meulu paife, na mafiku otau ka pangela ovanhu aveshe. (Mat. 24:14) Mepingafano naasho, epangelo enaenghono laRoma shonale, olo la li la hepeka Ovakriste ovo, inali kala po oule wefimbo. Kakele kaasho, ovahongwa ovo ovadiinini paife ove li eehamba meulu. Ashike ovatondi vavo ova fya; ndele ngeenge ova nyumuka otava ka pangelwa kOuhamba oo wa li hau udifwa kOvakriste ovo va li ve tonde. — Eh. 5:10.

5. Metwokumwe naJohannes 15:19, omolwashike ovapiya vaJehova va dinika?

⁵ Kunena, ovapiya vaJehova ova dinika nohava shekwa eshi inava hongwa nova nghundipala. Omolwashike mbela? Omolwaashi katu na oikala ya fa yovanhu ovo ve tu dingilila. Ohatu kendabala okukala ovalininipiki nohatu dulika. Mepingafano naasho, ounyuni owa lenga ounhwa, etumba nosho yo ounashibofa. Shimwe vali, ihatu kufa ombinga meepolotika ile moita. Otwa yooloka ko kovanhu vomounyuni, nomolwaashi ve tu tala ko tu li ovanhu vongaho. — Lesha Johannes 15:19; Rom. 12:2.

6. Ovapiya vaJehova ova pondola shike kekwafo laye?

⁶ Nonande ovanhu ove tu tala ko twa nghundipala, Jehova okwe tu kwafela tu pondole moinima ihapu. Okwa pondola unene moshikonga shokuudifa mounyuni aushe pandjokonona yovanhu. Kunena, ovapiya vaye ohava toloka nokwaandjakaneka oishangomwa mounyuni aushe nohava longifa Ombiibeli opo va kwafele ovanhu omamiliyona va xwepopaleke onghalamwenyo yavo. Olupandu alishe li na sha naasho sha pondolwa moilonga oyo oli na okuyukifwa kuJehova, oo a longifa ongudu oyo tai monika ya nghundipala, opo i wanife po oilonga ya tya ngaho. Ndele ongahelipi shi na sha nafye pauhandimwe? Mbela Jehova ota dulu oku tu kwafela tu kale ovanaenghono? Ngeenge osho, oshike tu na okuninga opo e tu kwafele? Natu ka kundafaneni oinima itatu yokondadalunde oyo hatu dulu okulihonga koshihopaenenwa shomuyapostoli Paulus.

7. Oshilihongomwa shimwe shilipi hatu lihongo koshihopaenenwa shaPaulus?

⁷ Oshilihongomwa shimwe osho hatu lihongo kuPaulus oshosho kutya: Ino lineekela  meenghono doye mwene ile mokudula kwoye eshi to longele Jehova. Pataleko lopanhu, Paulus okwa li ta dulu okukala e na ounhwa nokulineekela muye mwene. Okwa kulila muTarsus, oshilandopangelo shoshitukulwalongo shaRoma. Tarsus osha li sha punapala nosha li ondingandinga yehongo lopombada. Paulus okwa li omuhongwanhu, nokwa li a hongwa komuwiliki Omujuda, oo a li a lengwa pefimbo lavo, wedina Gamaliel. (Oil. 5:34; 22:3) Pomhito imwe, Paulus okwa li a fimanekwa mokati kOvajuda vakwao. Okwa ti: “Onda li yo nda ninga exumokomesho melongelokalunga lOshijuda ndi dule vahapu vepupi lange moshiwana shetu.” (Gal. 1:13, 14; Oil. 26:4) Ashike Paulus ka li e lineekela muye mwene.

8. Metwokumwe nOvafilippi 3:8 nosho yo eshangelo lopedu, Paulus okwa li a tala ko ngahelipi oinima oyo a li a fiya po, nomolwashike a li ha kala a ‘hafa ngeenge e na oungone’?

⁸ Paulus okwa li a hafa eshi a fiya po oinima oyo ya li ye mu ningifa a kale a fimana pataleko lounyuni. Okwa ka mona kutya oinima oyo oi li “oimbodi yongaho.” (Lesha Ovafilippi 3:8 nosho yo eshangelo lopedu.) Paulus okwa li a shakeneka omaupyakadi mahapu molwaashi e li omushikuli waKristus. Okwa li e tondike koshiwana shavo. (Oil. 23:12-14) Okwa li a dengwa nokutulwa modolongo kovanhu vomoshilongo shavo muRoma. (Oil. 16:19-24, 37) Shikwao vali, Paulus okwa li omulunde, nokwa li shidjuu kuye okulonga osho shiwa. (Rom. 7:21-25) Ashike ka li a efa po okushikula Kristus molwaashi ta patanekwa kuvamwe ile eshi e udite ondjo, ndele ponhele yaasho, okwa li ha kala a ‘hafa ngeenge e na oungone.’ Omolwashike mbela? Omolwaashi ngeenge e na oungone okwa li ha mono nghee Kalunga te mu yambidida. — 2 Kor. 4:7; 12:10.

9. Otu na okukala twa tala ko ngahelipi oinima oyo hai tu nghundipaleke?

⁹ Ngeenge otwa hala Jehova e tu kwafele, katu na okudiladila kutya otwa fimana omolweenghono dopalutu odo tu na, ouhongelwe, eputuko, ile oinima yopamaliko oyo tu na. Oinima oyo hayo hai tu ningifa tu kale tu na ondilo momesho aJehova. Molwaashi ovapiya vaJehova vahapu pataleko lopanhu kave fi ‘ovanaendunge, ovanaenghono noinava dja momapata a punapala.’ Ponhele yaasho, Jehova okwa hoolola oinima oyo pataleko lounyuni  “ihe na ekwafo lasha.” (1 Kor. 1:26, 27) Onghee hano, ino diladila kutya ngeenge ku na oinima oyo ya tumbulwa pehovelo lokatendo aka, ito dulu okulongela Jehova. Ndele i tala ko i li omhito yokuulika kutya Jehova ote ku yambidida. Pashihopaenenwa, ngeenge oho kala wa mbadapalekwa kovanhu ovo tave ku ningifa u kale wa limbililwa eitavelo loye, ilikana kuJehova e ku pe ouladi u dule okupopila eitavelo loye. (Ef. 6:19, 20) Ngeenge oto kondjo nomukifi wa kwata moiti, ilikana kuJehova e ku pe eenghono u kale we lipyakidila moilonga yaye. Efimbo keshe to mono nghee Jehova te ku kwafele, eitavelo loye otali ka enda tali kolo.

10. Omolwashike tu na okukonakona oihopaenenwa yovapiya vaJehova ovadiinini ovo va popiwa mOmbiibeli, ngaashi ovo va tumbulwa mOvaheberi 11:32-34?

¹⁰ Paulus okwa li ha konakona noukeka Omishangwa. Okwa li ha konakona Eendjovo daKalunga, nokwa li e lihonga oinima ihapu koihopaenenwa yovapiya ovadiinini vaJehova ovo a lesha kombinga yavo. Eshi Paulus a shangela Ovakriste Ovaheberi okwa li e va lombwele va diladile koihopaenenwa yovapiya vaJehova ovadiinini ovo va li ko nale. (Lesha Ovaheberi 11:32-34.) Ohamba David oyo imwe yomovapiya ovo. David ka li ashike e lididimikila omafininiko oo a li taa dilile kovatondi vaye, ndele pomhito imwe okwa li te lididimikile omafininiko ookaume kaye. Eshi hatu konakona oshihopaenenwa shaDavid, ohatu ka mona kutya Paulus okwa li a pamekwa eshi a dilonga konghalamwenyo yaDavid, nohatu ka tala nghee hatu dulu okuhopaenena Paulus.

11. Omolwashike tashi dulika David a li ta monika a nghundipala? (Tala efano kombada yoshifo.)

¹¹ David okwa li ta monika a nghundipala oku mu yelekanifa nomukwaita omunaenghono Goliat. Goliat okwa li a “dina” David eshi e mu mona. Shikwao vali, Goliat okwa li munenenene, a deukika noku na owino wokulwa moita. Mepingafano naasho, David okwa li ta monika okamatyona kehe na owino nandenande nokehe shii okulwa. Nonande David okwa li ta monika a nghundipala, okwa ninga omunaenghono. Okwa li e lineekela meenghono daJehova, nokwa li a finda omutondi waye. — 1 Sam. 17:41-45, 50.

12. David okwa li vali e na okuungaunga neshongo lilipi?

¹² David okwa li vali a taalela eshongo limwe, olo la li tali dulu oku mu nghundipaleka. David okwa li ha longele noudiinini ohamba yaIsrael, Saul, oyo ya li ya nangekwa po kuJehova. Ohamba Saul oya li ya fimaneka David pehovelo. Lwanima, ounhwa owa li wa ningifa Saul a twile ondubo David. Saul okwa li ha ungaunga naDavid nai, nokwa kendabala oku mu dipaa. — 1 Sam. 18:6-9, 29; 19:9-11.

13. David okwa li e linyenga ngahelipi eshi a ungaungiwa naye shihe li pauyuki kohamba Saul?

¹³ Nonande David okwa li ta ungaungiwa naye shihe li pauyuki kohamba Saul, David okwa twikila okukala a fimaneka ohamba oyo ya nangekwa po kuJehova. (1 Sam. 24:6) Inapa Jehova ombedi omolwoinima ii oyo ya ningwa kuSaul. Ponhele yaasho, David okwa li e na elineekelo kutya Jehova ote mu pe eenghono a dule okulididimikila onghalo oyo idjuu. — Eps. 18:1.

14. Onghalo ilipi ya li ya taalelwa komuyapostoli Paulus ya faafana naayo yaDavid?

¹⁴ Omuyapostoli Paulus okwa li a taalela onghalo ya fa yaDavid. Ovatondi vaPaulus ova li ve na eenghono dihapu ve mu dule. Ovawiliki vahapu vopefimbo laye ova li ve mu tonde. Luhapu ova li have mu denge noku mu tula modolongo. Ngaashi David, Paulus naye okwa li a ungaungiwa nai kovanhu ovo va li ookaume kaye. Meongalo namo omwa li mu na Ovakriste vamwe ovo va li tave mu pataneke.  (2 Kor. 12:11; Fil. 3:18) Ashike Paulus okwa li a dula okufinda aveshe ovo va li tave mu pataneke. Ngahelipi mbela? Okwa li a twikila okuudifa nonande okwa li ta patanekwa. Okwa kala omudiinini kovamwatate novamwameme nonande ova li ve mu udifa nai. Naasho sha fimanenena, okwa kala omudiinini kuKalunga fiyo osheshi a fya. (2 Tim. 4:8) Okwa dula okupondola meenghalo adishe odo molwaashi okwa li e lineekela muJehova, ndele hameenghono daye mwene.

15. Elalakano letu olashike, nongahelipi hatu dulu oku li hanga?

¹⁵ Mbela oto ungaunga nomatukano ile nomahepeko okudilila kovanafikola vakweni, kovanailonga ile kovapambele ovo vehe fi Eendombwedi? Mbela meongalo omu na umwe oo ha ungaunga naave nai? Ngeenge osho, dimbuluka oshihopaenenwa shaDavid naPaulus. Oto dulu ‘okufinda owii mokulonga ouwa.’ (Rom. 12:21) Ngeenge hatu patanekwa ihatu lu ngaashi David a li a lwifa Goliat, ndele ponhele yaasho ohatu findi owii mokukwafela ovanhu ve lihonge kombinga yaJehova nosho yo oshili yOmbiibeli. Oto dulu okuhanga elalakano olo mokukala ho longifa Ombiibeli eshi to nyamukula ovanhu ovo tave ku pula omapulo, okuungaunga nefimaneko nonolukeno naavo tava ungaunga nai naave, nokuningila aveshe ouwa nokuli novatondi voye. — Mat. 5:44; 1 Pet. 3:15-17.

16-17. Oshike Paulus a li ina dimbwa?

¹⁶ Ofimbo omuyapostoli Paulus ina ninga omuhongwa waKristus, okwa li omunyasha ehe na eenghedi, oo a li ha hepeke ovashikuli vaJesus. (Oil. 7:58; 1 Tim. 1:13) Jesus oye mwene a li a kangheka Paulus, oo a li a shiivika nawa Saul, eshi a li ta hepeke eongalo lopaKriste. Jesus okwa li a popya naPaulus okudja meulu noku mu twikifa. Opo a twikuluke, Paulus okwa li a fininikwa opo a ka konge ekwafo kovanhu ovo a li ha hepeke. Okwa li a tambula ko ekwafo nelininipiko komuhongwa Ananias, oo a li e mu twikulula. — Oil. 9:3-9, 17, 18.

¹⁷ Lwanima, Paulus okwa ka kala e na ondodo meongalo lopaKriste, ashike ka li a dimbwa oshilihongomwa osho a hongwa kuJesus mondjila oyo ya finda kuDamaskus. Paulus okwa  kala omulininipiki nokwa li ha tambula ko nehalo liwa ekwafo olo ta pewa kovamwatate novamwameme. Okwa li a mona kutya ove mu “pameka.” — Kol. 4:10, 11, esh.

18. Omolwashike omafimbo amwe tashi dulika tu ongaonge okutambula ko ekwafo lavamwe?

¹⁸ Oshike hatu lihongo kuPaulus? Eshi twa hovela okweendafana novapiya vaJehova, otashi dulika twa li hatu tambula ko ekwafo lavamwe molwaashi otu shii kutya otu li ouhanana pamhepo notwa pumbwa okulihonga shihapu. (1 Kor. 3:1, 2) Ndele mbela ongahelipi paife? Ngeenge otwa kala hatu longele Jehova omido dihapu nokulikola owino muhapu, otashi dulika tuha tambule ko ekwafo lavamwe, unene tuu ngeenge ohatu li pewa kwaao ina kala moshili omido dihapu ngaashi fye. Ashike nande ongaho, Jehova oha longifa ovamwatate novamwameme ve tu pameke. (Rom. 1:11, 12) Onghee hano, ngeenge otwa hala Jehova e tu pameke, otu na okukala hatu tambula ko ekwafo olo hatu pewa kovamwatate novamwameme.

19. Omolwashike Paulus a li ha pondola?

¹⁹ Paulus eshi a ninga Omukriste okwa li ha pondola moinima imwe. Omolwashike mbela? Omolwaashi okwa li e lihonga kutya okupondola inaku likolelela keenghono dopaushitwe, kehongo, koupuna, ile keputuko, ndele okwe likolelela kelininipiko nosho yo okulineekela muJehova. Atusheni natu hopaeneneni Paulus (1) mokulineekela muJehova, (2) mokukonakona oihopaenenwa yopaMbiibeli nosho yo (3) okutambula ko ekwafo lovaitaveli vakwetu. Kashi na nee mbudi kutya otu udite twa nghundipala, Jehova ote ke tu pa eenghono!